MFANANO 3
3
Mapfundo ha warika
1Manoko, ulahadime wuwawaso woko,
Indi mrima fopfo furinge mawawaso hako.
2Kipfa nochiengeṟyo mkonu ifoi,
Na maaka ya moo na ofoṟo.
3Osaṟyo na lohi shilalekane na iyo;
Shipfunge nzingonyi yapfo;
Shiṟehiye ihohu lya mrima fopfo.
4 Nlyondi ochiidikyo na oṟongo lucha
Oshangunyi lo Ruwa na oshangunyi lo wandu.
5Kusirie Mndumii na mrima fopfo fose,
Ma kulakusirie wuṟango wopfo kumonyi
6Kiidi kya ohendo lopfo mwidikie o,
Nao nechihoṟotsa njayo tsapfo.
7 Ulawe meenyi wulaanyi mesonyi hapfo,
Idikia Ruwa nodiche wuwicho.
8Isho nyi shi shicha imanya,
Nochiwa cha moongo mafuonyi hapfo.
9India Mndumii na masaa hapfo,
Na shilimu shapfo shose.
10Nlyondi shikumbi shapfo shechiichuo pacha,
Na nanda tsapfo tsechiletseka mvinyo mhya.
11 Manoko, ulamine ilyi okapo nyi Mndumii,
Manya kulawone nyi wukiwa ilyi echikuhoṟwo
12 Kipfa ulya amkunde nyi Mndumii nekemkapa,
Chandu ndee o mndu ulya amkundi.
13Nanga mndu ulya ekewona wuṟango,
Na mndu ulya ekeinengo imanya.
14Kipfa mbucha yake injicha kota mbucha ya fesa,
Na iṟimiṟa lyake nyi lyifoi kota sahabu njicha
15O nyi awode wuhuru kota mafuda ha wuhuru wung'anyi,
ma shilya ushilangie shiṟinganyi nao pfo.
16Nyi awode mfoeṟa fo mkonu owokonyi loke lo kulyo
Wusuṟi na wuindi owokonyi loke lo kumoso.
17Ohendo loke sa luchihiṟiye mnu,
Na njienyi tsake tsiwode ofoṟo.
18Nyi ikidi lya moo ko walya wakuwode nao mnu
Nawode nanga mndu ulya awadanyi nao.
19Kui wuṟango Mndumii nalewika njotende tsa oruka.
Kui wulaanyi kawewika ruwehu iwange;
20Kui mhio foke makidi hawi ha ipalyipalyi kulehawukana
Mapuchi hakatonyitsa ṟauṟa.
21Manoko, ishi shilawuke mesonyi hapfo,
Wada wuṟango tapu na wulaanyi
22Kyasia shechiwa moo mbihunyi kopfo,
Na osaṟio nzingonyi kopfo
23Nlyondi ochikuhendya njienyi yapfo kipuo,
Manya ochikapa odende lopfo mtulia pfo.
24Ochiowuo ili olaa pfo;
Ee da, nochilaa na mado hapfo hechichia.
25Ulaowesho nyi kindo kya kitusu,
Manya kiheri kya kiṟaache kya wawicho ili kechishika.
26Kipfa Mndumii nechiwa mkusirie fopfo,
Nao nechiringa kudende kopfo kulawado.
27Kulaime wandu shilya shawo shiwaṟi shii shicha,
kokoya shikeri mawakonyi hapfo iwuta kudo.
28Kulawie wamṟasa opfo,
Henda nowuye se, na ngama njechikuinenga;
Na iyo nowode kindo kilya hafui na iyo.
29Ambuya kulakusaṟe mawicho kya wamṟasa opfo,
Icho ai hafui na iyo kawona nyi ngaya yake.
30Ulakuhode na mndu kulawode kitewe,
kokoya alamekuwutie kiwicho kyose.
31Kulalange mndu awode mtoolo,
Ma kulasange ho ma njia yake imuho.
32Kipfa mndu mtimbiri nyi asuiṟiye Mndumii,
Indi shiṟike shake nyi kimu na wahoṟotsu.
33Oseso lo Mndumii lui kiidi kya mba ya wawicho,
Indi nyekewikia ona mba ya wewuta shisumhanyi.
34 Mndumii nekemina walya wemina,
Nekeinenga wakunyiṟiye osaṟio.
35Wenyi wuṟango wechioṟa wuitoṟi
Indi iichika matondo nyi mai na mai.
Kimochi Bible © Bible Society of Tanzania, 2016.