WAFILIPI 3
3
1Lyefurumia, wanawawama wako, ke-chihionyi kui Mndumii. Ili ngamusumutsa njidi lyo lyanjipfulutsa inyipfo kya indi lyamfeṟya nyo owanzo. 2Ringenyi wai mashite, keweringenyi wewuta sha wuwicho muwe moringa weweha wotahacha. 3Kyamba odino lulya nyi lodu so lokewikya Ruwa wuindi kui Mumuyo lukakuichika kui Kristo Yesu lulechikusirya na nyama tsa mbihu. 4Ma kuwode kiwentewa inyi njiwechikusirya na mbihu. Kokoya kwipfo mndu ma kawa u akusirye na nyama tsa mbihu, kya ngoseṟa nyio inyi. 5 Inyi m mndu njii mdine mkonu fo nyanya, o mkambo fo Israeli, o kipaṟika kya Benyamin, Mwebri o Waebri, moindya wuwawaso mbaṟi ya kifarisayo. 6 Njiwei mlang'a moterengya siṟi, kya wusumuhanyi wuwukie wuwawasonyi kuweipfo anjiwonya owingopfo. 7Kya indi ishi shiwenjiwiia sha meenasho ngameshitana sha mawuṟa kimaduma kya Kristo. 8Ee-da na shindo shose ngashihamba shii sha mawuṟa sumuhana na imanya Kristo Yesu Mndumii oko lisuṟye lidi. Nao nyio annengye ngatanyo shindo shose mawuṟa ngashihamba mbosha kundu njihende iwada Kristo. 9Njishike ikoyo njii nao, njilai na wusumuhanyi womba woko wuwewukie wuwawasonyi kya indi njii na iwu wohendewa kui wuidiki woidikya Kristo, nyiwo wusumhanyi wowiko nyi Ruwa ipfo kiwanje-hu kya wuidiki wulya. 10Wo immanya o na pfinya ya maṟukyenyi hake na kyando kya mawawyo hake njihende fananyisho nao ma ipfo kipfionyi. 11Njikuwutie-ho ishika ikoya alya maṟukyenyi ha wapfu. 12Manya njilemshika ilikoya ma imarisikia ichiapfo kya indi ngakulasa na njia kulako njechiliwada kitewe nyi kipfa njilembado nyi Kristo Yesu. 13Wanawawama, chi ngakuhamba njimonyi cha ili ngamaa iliwadapfo, kya indi kimu tupu kinjiwode, nyi ngahadima shilya shii mhongo njikuleshya shii mdonyi. 14Njikambia njekuṟungamisha wowinza wulya wo ndaho iya iwukie ipfo huye ikeri ya Ruwa kui Kristo Yesu. 15Kyasia so lui waholotsi na iki luwe lochikihia. Kokoya kwipfo ma kingi muihiahia kyakyo na Ruwa echikimtambahaluya. 16Aka-wo oondo lushikye itisiki lutisiki. 17 Wanawawama, muwe waitumanyi wako mbeambuya na iwo wekechumia wado chando muluwade so lui kila kya moo. 18Cha kipfa kwipfo wafoi wekechumia mbaṟi njilembia kyayo kafoi ngawuya iwahamba-se na wulalu njefuha, ke nyi wai wakituwa wa msalaba fo Kristo. 19Hando wakeri ikushitsya-ho wawenyi ipfo odetsonyi ndewu nyiyo Ruwa owo, kiṟumi kyawo kiwaendye wuṟenze, nawo nyiwo wekekumbuo shikeri sha wanda ii. 20Indi kiluwikye so kanyi kulya ruwehu kikeri. Nyi hondo luiwedya Mndumii Yesu Kristo nachee-pfo ai mletsi. 21Nao nyio echikaa nailache mbihu fodu fo wunyonge fuwute-ho ifanana na mbihu foke fui na wuitoṟi. Kechiwa kidi kisumhanye pfinya iya awode yemnenga echilaṟa shose shi yake.
Njopfundo maata
Currently Selected:
WAFILIPI 3: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
