LUKA 6:27-49

Kyaindi nyi ngamuwia nyo muiadanyia, Kundenyi wakituwa wanu, na iwo wamsuo muwewawutia mecha. Kundenyi iwo wekemsesa mboṟa, muweterewia iwo wekemruma. Ichu echikukapa nguchu-yo, mhaluye-se na iyo ingi, na ichu echikusoka ikonya lyapfo, manya ulamiime ma kanzu-yo. Orio akuterewa mnenge, na ichu mokusoka shindo shapfo, ma ulakishiwese-se koke. Nanyo chando mukundi muwutio nyi wandu, nanyo kewewutenyi mudo. Aka nanyo mukakunda walya wamkundi tupu, nyi wucha wuhya muwode? Kipfa ma wadeko na wakundi walya wawakundi-wo. Aka nanyo mukawutia mecha iwo wekumuwutia nyo, nyi wucha wuhya muwode? Ma wandu wadeko na wekewuta wado. Aka mkaakuya iwo mochihamba ke nyi wechiidima imuwihiṟia, nyi wucha wuhya muwode? Ma wandu wadeko na wekeakuya wanyamaṟi wengi iwo wechiidima iwawihiṟia wado kuhyanyi. Kyaindi kundenyi wakituwa wanu, muwewawutia na mecha, muakuye mulakundi iwihiṟio-se kindo; mukawuta mudo nlyodo woṟunda wonu wochifo, nanyo nyi mochiwa wana wa ulya ai huye ya shose; kipfa o nyi aololye wandu wechimwana na walya wawicho. Kyasia, angenyi wesaṟia; chando na Ndeanu ai msaṟi.” “Ma mlawone mochiwonyia wengi wuwicho, nanyo mochiwonyiopfo; ma mulatetekie owingo, nanyo mochitetekyopfo, leheṟenyi, nanyo kundu muleheṟo. Inengienyi, kundu nanyo muinengo; kihesha kicha kii kitsindie kii kisikyesikye kiitsye msanjika, nyikyo wechimbikia ipfo ndenyi tsanu. Kipfa kihesha kilya mokeheshia nakyo, nyikyo mochikaa muheshio nanyo.” Kawuya iwawia ifanano, “Alae mpfu meso na echiidima iduo mpfu meso, ungi na njia ngesa; aka chi wechioloka ṟungunyi wawawi? Molosho naidye momloshapfo; kyaindi orio mndu ainutsie shose nyi eching'ang'ana na mlosha oke. A iyo, nyiki ili okeambuya kinana kii risonyi lya manomayo, na iyo ulawonyi mriti-fo fui ipfo risonyi lyapfo? Aka nyi wuda ochiidima iwia manomayo, Manowama, keleka njiwute kinana-kyo kikeri ipfo risonyi lyapfo, na iyo kulawonyi mriti-fo fui ipfo risonyi lyapfo, iyo? Iyo nyi mokulembetseṟa! Kemewuta kuwoka mriti-fo fui ipfo risonyi lyapfo, numa noambuye-ng'u necha chando ochiwuta kinana kii risonyi lya manomayo.” “Ikidi icha lyechidima ikumbia ndunda njiporu-pfo na ikidi liporu likumbia ndunda njicha-pfo. Kyamba orio ikidi nyi lyekemanyika kui ndunda tsalyo lyilyenyi cha kipfa ipfo mshenyi wandu wechitowa-pfo mkuyupfo, ma isikinyi lya msha kochihao-pfo sabibupfo. Mndu-cho mcha nyi ekeloṟa kilya ki kicha ipfo kisenyi kya mrima foke, na mndu-cho mbicho kaweloṟa kilya kii kiwicho. Kyamba ikyo kiichuo ipfo ngoonyi, na dumbu-lyo naakyo lyechihamba.” “Aka-nyo, nyiki ili mokenjilaha, ‘Mndumii, Mndumii,’ nanyo mlekewuta ikyo njekehamba? Orio mndu mokuchea na koko, kawa moadanyia shidedo shako na ishiwuta, mndu-cho nyi njiechimloṟa sa aṟinganyi nao, nyi aṟinganyi na mndu mowika mba, kaisumia, kaisotsia wanda, kawika itsinde lyayo iṟaṟehu lya iho. Kyasia, mfu fukacha, mṟinga fulya fukatsindika-tsindika mba iya fulaidime iihutsa; kyamba kimae kyayo kiwei kisotsie necha. Kyaindi ichu moicho madedo hako kada alahawuta, nyiaṟinganyi na mndu alewika mba yake terihu ya kimamile, nalawanze kimae kyayo, mfu fulya fukaitsindika itane yawunduka, na mbundukie foyo fukaṟihisha mnu.”