LUKA 2
2
1Mandi halya kukawuka iwawaso kulya ko Kaisari Augusto, ke masanga hose hahende iṟehio paruonyi kya okamba. 2Na kiṟehio-kyo nyikyo kya kuwoka, lilya mandi Kirenyio akeri mchili o kulya Siria. 3Kyasia wandu wakahenda ṟehio wose, orio mndu na mṟinyi foke. 4Na Yosefu nao kawewuka kulya Galilaya, mṟinyi fo Nasareti, kahenda ido na kulya Yudaya, mṟinyi fo Dawidi, fumlahe nyi Betlehemu, kipfa awekeri mndu o mbaṟinyiya Dawidi, mpfo kikunyi kyake. 5Kundu nahende ṟehio-pfo hamu na Maria ulya awemkosie, nao nyi awei mnene. 6Kyasia wakeri kundu kulya kiheri kyake kyefee kikashika. 7Kafee manoke mbee o womi kamwoṟowia shidami kamlaṟa mponyi, kipfa walalewonyia handu kulya mchalonyi fo wahenu.
Walisi wainengo mbonyi nyi Malaika
8Kyasia na kulya kihongonyi nyi kuwekeri-pfo walisi wai patehu wechiringa poo lyawo kui makamba kiheri kyakio. 9Wadi a ulya malaika o Mndumii, kacha ihoṟoka alyando wai, na ngeela ya Ruwa ikawaṟingichya riti; nawo wakahoyo nyi wowu wung'anyi. 10Malaika lulya kawawia, “Manya mulaowuo, ambuyenyi njiimwongoya mbonyi tsiwode sia ing'anyi, nayo nyi yekaa ishike ko wandu wose. 11Kipfa ili momefeeyo mkiṟa inu; nao nyi Kristo Mndumii kulya mṟinyi fo Dawidi. 12Na kitaanyio kyanu kyemumanyisha nyi iki, nyi mochiwona mkoku-cho amwoṟowie shidami amlaṟe mponyi.”
13Naalyo peṟeseng'u kukocha mamwingi fo siṟi tsa ruwehu, fukasanza na malaka ulya, wakaidapfuma Ruwa wakahamba,
14“Kiṟumi nyi kya Ruwa kulya huye,
na orukenyi nyi ofoṟo, ipfo ko wandu wakundikie!”
15Kyasia wamalaika walya wekiwuka kulya kowo wakahenda ruwehu, walisi walya wakawiana wo wenyi na wenyi wakahamba, “Kendenyi-ng'u lanye; lukehenda kulya Betlehemu, isahia kindo-kyo kyambutika; ikyo Mndumii aluongoya.”
16Wakahenda wekambia owinyi; wakakoya-pfo Maria na Yosefu; na mkoku ulya amlaṟe alya mponyi. 17Wameidima iwona wakahenda wechionguo mbonyi tsilya tsa kidedo kilya walewio kya kimana kilya. 18Na walya waleicho wado wakaṟihio wose shilya waongoyo nyi walisi walya. 19Na Maria kasuṟuma mbonyi tsilya tsose na mrima ketsihia-hia. 20Kyasia walisi walya wakawuya na kulya kowo, wakaidapfuma Ruwa na imwana kya shindo shilya waleicho shose na ishiwona chando walewewio.
Mana aninengo rina
21 Kyasia mkonu nyanya yameida-ho, kushike madinyionyi hake, wakamdumbuya rina lyake nyi Yesu; lilya lilehambo nyi malaika ulya lilyandi alawememoho.
Yesu adao hekalunyi
22Kyasia wekimarisa mfiri iya yekuheṟemtsa, iya isumhanyi, chando kiwekiteṟie ipfo wuwawasonyi wo Mose, naalyo wakamduo kulya Yerusalemu wahende imloṟa Mndumii. 23 Chando kiwei kiṟehie ipfo wuwawasonyi wo Mndumii ke, orio mana mbee o womi nyi echidambikio Mndumii nalaho nyi kyele kyake. 24 Wawewika na kidaso chando kiwei kiwawase ipfo wuwawasonyi wo Mndumii; nakyo nyi kya mbeta tsa ngeṟenyi tsiwi, ang'u tsa mba tsiwi-njikoho. 25Maheri halya kuwekeri mndu kulya Yerusalemu, rina lyake nyi Simeon, na mndu-chu nyi awei mndu mcha, asumuhanyi, aweowoye mnu Ruwa, kechiwedia ulya mowihiṟa Israeli moo, na Mumuyo Mwele nyiawekeri nao. 26Nao nyiawewembikie kyaasa nyi Mumuyo Mwele ke, echipfa shile awona Kristo o Mndumii kuwookapfo. 27Nao kacha na kulya hekalunyi amwamtse nyi Mumuyo Mwele. Kyasia ndee o mana ulya Yesu wekimwitsa na kulya mba, wo hamu na mae, wambutie chando kikiteṟie kyake ipfo wuwawasonyi. 28Nao kamwambia mawokonyi, kaichika Ruwa kahamba,
29“Mndumii, wulalu omeinutsia kyasa kyapfo,
inenga mṟundi opfo momu nakuhendie na ofoṟo.
30Kyamba meso hako hamekuwonyia ikiṟa lyapfo.
31Lilya uweṟeheṟie sumuhana na njoshangu tsa wandu wose.
32 Lya ngeela yedambuya wandu wa orio mbaṟi mbonyi;
na lya kiṟumi kya wandu wapfo Israeli.”
33Kyasia ndee na mae wakawa moṟihio kilya kyahambo kyake. 34Na Simeon kawawikia mboṟa, kawia mae oke Maria, “Ichu nyi ambike mohutsa na iira wafoi wa wana wa Israeli; nawewa kichano kyechidedo-dedo wokaṟuo. 35Na iyo kumonyi oshu nyi lochikuambada ipfo makiidi hawi ha mrima fopfo; kundu mahio na ngoo tsifoi hamanyike napata.”
36Napfo kuwekeri-se mwikimbi mka, elaho nyi Ana; mana o Fanueli; o kisharinyi kya Aseri; nao kui makuyenyi hake nyi awe-mku kaṟatsia; nyiawemkaa na mii maka mfungade numa ya wupora woke. 37Kawekaa-se ai mkusu itane ashitsa maka makumi nyanya na iina, nao alawekelekana ipfo hekalunyi; kahenda kewuta shindo sha Ruwa tupu kekuotoya na iterewa kio na mfiri. 38Nao kawecha naho, saa na iya, kaidapfuma Ruwa; kahenda kyechionguo kyake ko walya waweiwedia maletsionyi ha Israeli wose.
Iwuya Nasareti
39 Kyasia nawo wekimaa yawutsia shisumuhanyi na wuwawaso wo Mndumii shose, wakahenda ikuwuuya na kulya Galilaya wakashika kulya Nasareti, mṟinyi fowo. 40Na mana ulya kang'ana-ng'ana, kahenda kewada pfinya, kaweichuṟo wuṟango, na osaṟio lo Ruwa lukamkaika.
Yesu ai hekalunyi amarisiye maaka ikumi na iwi
41 Kyasia ndee na mae nyi wawekehenda-henda kulya Yerusalemu orio maka yose ili mkonu menene fo Pasaka. 42Nao kekishitsa mndu o maka ikumi na iwi, wakado nao, chando kiweikido kya mkonu fulya mnene. 43Wekimarisa mfiri iya, warie njia yewuya, mana ulya Yesu kafurumia kulya Yerusalemu, ndee na mae walaichi. 44Wakakusaṟa kulako nyi akeri na walya wa kyaṟonyi, wakatsinda wehenda njienyi ohendo la mfiri fumu, wakampfula ipfo ko walya wa oshari lowo na ko walya waichianyi nawo. 45Wameda walambona-pfo, wakawuya na kulya Yerusalemu wechimpfula. 46Wamemaa mfiri iṟaṟu, wakambona kulya hekalunyi adamie na walosha kewaadanyia na iwawesa-wesa mbonyi. 47Na walya wemadanyia wakatiri mnu wose kipfa kya wuṟango wulya woke na mahaluyenyi hake. 48Kyasia ndee na mae wambona wakauma mkahai, na mae kambia, “Nki ili olutana kudi manoko? Keambuya nyi lomekushiha mnu na madima ndeo na inyi.” 49Nao kawawia, “Aikyo mbeinshihia nkyo kiki? Mlaichi ke nyinjiwaṟi ikukaya ipfo shindonyi sha Wande?” 50Nawo walamanye kidedo kilya awawia. 51Naalyo kahenda kusotsanyia nawo, kacha na kulya Nasareti kawa mowahidia. Na mae kasuṟuma mbonyi tsilya mrimenyi tsose. 52 Kyasia Yesu kahenda kechiengeṟekia wuṟango na mng'ano na mkundye fokunda Ruwa na wandu.
Mwongoye fo Yohane Mpatisi
(Mat 3:1-12; Mar 1:1-8)
Currently Selected:
LUKA 2: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
