YOELI 2
2
Nzihe tsaloṟa icha lya mkonu fo Mndumii-Ruwa
1Kapenyi membe ipfo Sioni;
kapenyi iranda huye ya ifumvu lyako liele!
Wandu wose wa oruka lo Yuda,
dedemenyi kipfa mkonu fo Ruwa fotikiria!
2Mkonu fo nyi fo mema na isumkia;
nyi mkonu fo mapuchi na mtima.
Mbahanyi ing'anyi ya nzihe ikeri kufui,
ikeri cha isulia lya mema liliale mafumvunyi.
Kindo cha iki kilemeutike male-pfo,
ma kechikaa kiutike se marika hose haicha-pfo.
3Chandu modo fukeṟumatsa,
mbahanyi yo irumatsa orio kindo kikeri oshangunyi loyo,
na ida mrumatso fung'amnyi fo orio kindo kikeri nduma yafo;
mandi mbahanyiyo ilameidapfo, oruka luwekeri cha bustani ya Edeni;
kyaindi ikameida, oruka lokedeo lui nuka ya msanga.
Kuwode kindo kechiidima iliashukapfo!
4 Wakawoneka wai cha frasi tsifoi,
waipufukia cha frasi tsa shida.
5Kiheri tserundukarunduka matsitsionyi ha mafumvu,
tsikaṟuṟuma cha magari ha frasi ha shida,
ang'u tsikaṟunduma cha modo foida fochikoṟa masaho ha maimba.
Wakuṟeheṟie cha mbahanyi tsing'anyi,
tsikuṟeheṟie ikapana shida.
6Wandu waiweidia na uowu wung'anyi,
na shamu shawo shikaalachika.
7Wakeri isarikia cha mbahanyi njikari tsa shida,
na iseṟa omombo mteeṟa cha askari wa shida.
Wose wahenda mbele,
kulawade ma umuho aambuya mbai ang'u iteṟeshuka njienyi yake.
8Wakeri ichumia walakapana mtulia;
orio mndu nachumia mstarinyi foke.
Wakeriida, kiidi kya njomombo tsinjiiṟihiye na shisha sha shida,
ma tsilaidime iwatirimisha.
9Wakeriihoya mṟi,
na iseṟa njomombo tsafo cha wasikari,
na ihoya mba na iida na mba,
koiidia matiṟishenyi cha waiwi.
10 Oruka lukadedema osehu lowo,
na ruwehu tsikakusingitsa.
Mnengeṟi na meṟi shikawa mema;
na ngela ya nyenyeri ikaruma.
11 Mndumii-Ruwa naiachikia wasikari wake ko ṟu ling'anyi.
Wasikari wake wafoi mnu,
walya wekeindia iwawaso lyake wechiidima italopfo.
Kya lohi mfiri fo Mndumii-Ruwa fumnene na foowesha mnu!
Nyiu echiidima itirisia?
Ndaho yehalukia Ruwa
12“Kyaindi Ma ulalu,
Inyi Mndumii-Ruwa ngahamba,
‘Njihalukienyi na mrima yanu yose,
ko ikuotoya na ifihiṟa na iwado nyi fowa.
13Ma mularanduo nguo tsanu mochiloṟa fowa,
randuonyi mrima yanu.’
Wuyenyi Mndumii-Ruwa, Ruwa onu.
O naichuo wutonga na isaṟia ling'anyi;
ekesuo owinyi-pfo, nawode wucha wung'anyi wo mrima;
ma ekechihiyo ikapa wandu-pfo.
14Nyiu iaichi? Kofia Ruwa nechiidima imusaṟia;
na imuinenga mboṟa tsa mademehu,
mumnenge shidaso sha mbeu na shenyo.
15Kapenyi ombe ipfo Sioni!
Wawasenyi wandu wakuotoye;
lahenyi shisanzio sheadapfuma Ruwa.
16Sanyienyi wandu wose handu hamu muwashimbuo.
Endenyi wameku,
sanyienyi wana,
endenyi ma walya waionga.
Wenyi wali,
wawuke mmbenyi yawo.
17Makuhanyi na waṟundi wa Ruwa,
wahoṟoke kiidi kya wandu na rasionyi wechifihiṟa na iterewa:
‘Saṟia wandu wapfo, hoi Mndumii-Ruwa odu.
Kulaleke wandu walaichi Ruwa wawachilie, kipfa nyi wandu wapfo.
Makulalekie wandu walaichi Ruwa wawamine na iwataluo wechihamba,
‘Oku Ruwa owo? Nai mfafa na awode pfinya pfo.’”
Ruwa nechioṟisha oruka
18“Kyasia Mndumii-Ruwa kakunda oruka loke,
na isaṟia wandu wake.
19Kaadanyia na ihaluo shiterewo shawo; kahamba,
“Ambuyenyi ulalu njikerimudikia maimba hafoi, na mvinyo na mafuda muihude;
ma njechileka wandu wa mkambo wamuminese-pfo.
20Njechidichiṟa watuuri wanu wawukie ora lo mtsudu,
Njechiwadichiṟa mṟasa nuka ya msanga;
na olemali walya wasonguo njechiwakumba ipalipalyinyi lya monyo;
na walya wa nduma, njechiwakumba ipalyipalyinyi lya Mediteranea.
Wechipuo na idaa na iwuta mṟufu mbicho,
iwo wautie mawicho hang'anyi.
21“Mulaowuo wandu wa oruka,
kyaindi chihiyonyi na ikapa ngululu,
cha kipfa Mndumii-Ruwa amewuta ṟiho tsing'anyi.
22Mulaowuo, nyo mando ha ngeṟenyi,
kipfa maṟa ha nuka, hameoṟa necha,
mashidi haoṟa ndunda tsaho;
na msabibu na mkuyu haikumbia mfoeṟa.
23“Chihiyonyi nyo wana wa Sioni,
kapenyi ngululu cha kipfa, Mndumii-Ruwa, Ruwa onu,
amemuinenga mvuo ya kisie,
amemuinenga mvuo ishikie ;
mvuo ya kisie na fuli chandu kuwei kuwoka.
24Handu hehuya hechiichuo shelya,
na mapipa hanu hechiichuo mvinyo na mafuda.
25Njechimuwihiṟia shilya shoshe shileliyo makayo ya nzihe,
na orio kindo kileliyo nyi okamba njilemudikia lo tunutu, paraṟe na matumatu,
mbahanyi yo inga'nyi njilewadikia!
26Mochiinengo kelya kifoi muihude;
nanyo mochiṟumisha Mndumii-Ruwa, Ruwa onu,
ichu alemuwutia ṟiho tsing'anyi.
Wandu wako, wechikaa waminose malepfo.
27Nyi lyondi mochimanya ke njikeri kiidi kyanu,
nyo wandu wa Israeli;
mochimanya ke inyi Mndumii-Ruwa,
nyio Ruwa onu, manya kuwode Ruwa ungi-pfo.
Wandu wako wechikaa waminose nyi mndu malepfo.”
Mkonu fo Mndumii-Ruwa
28“Kyasia kuwode kiheri kiicha,
mkonu njechipusuya mumuyo foko huya wandu wose.
Kiheri kyo wana wanu wakika na wakisoṟo wechiwuta wuiikimbi,
na wameku wanu wechiilodia ndodo,
na wanake wanu wechiwona ndodo.
29Kiheri kyo njechipusuya mumuyo foko,
huya waṟundi wanu wakisoṟo na wakika.
30“Njechiwuta kichano ruwehu na wuyanenyi;
kochiwapfo samu, modo na mnaṟa ya mtsu.
31 Mmbaṟi fochiwa mema,
meri fochifana samu,
mkonu fo Mndumii-Ruwa fulameshika,
mkonu mnee na foowesha.
32 Kiheri kyo wandu walya wose wechiterewa,
ko rina lya Ruwa Menyi Matorito,
wechikiṟo.
Chandu Mndumii-Ruwa awehambie,
Kiidi kya fumvu lya Sioni na Yerusalemu,
kuwode wandu sa wechikia;
chandu njilehamba inyi Mndumii-Ruwa.
Walya njilewasambuṟa wechikia.”
Currently Selected:
YOELI 2: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
