MAWOOKIONYI 4
4
Kaini na Abeli
1Adamu kamanya mka oke Ewa,
nao kakapika, kafee Kaini, kahamba,
“Ngameinengo mana o womi kuwuka
ko Mndumii-Ruwa.”
2Kaengeṟa kafee mano mae Abeli. Abeli kawikya machondi na Kaini kawa mdemi o madema. 3Kikawa lyefurumia, Kaini kawikya Mndumii-Ruwa mwano shilimu sha mdeminyi. 4 Nao Abeli kaende mwano mashao ha kawoka ha shuma shake, na shuma shilya shinoru. Mndumii kaambia Abeli na mwano foke; 5kyaindi nalaambie Kaini, manya kidaso kilya kyake. Kaini kawado mnu nyi fowa, na kyamu kyake kikarihinyika. 6Mndumii-Ruwa kawia Kaini, “Nki ilyi uwodo nyi nyashi na nki ili kyamu kyapfo kyarihinyika? 7Kowuta mecha; ochiidikio? Kulamewute mecha wunyamaṟi wuipfo; wuikuwedia o mongo, wukulangie iyo, kyaindi kikuwaṟi uwuwinze.”
8 Kaini kawia monomae Abeli, “Nnde luhende kulya mdemenyi.” Wadi wechihenda kulya mademenyi Kaini kapufukia monomae Abeli kambaha. 9Mndumii-Ruwa kawia Kaini, “Monomayo Abeli nku ai?” Kahamba, “Njichi-pfo, inyi nyi mringi o monowama?” 10 Mndumii-Ruwa Kahamba: “Nkiki owuta iki samu ya monomayo injieṟeṟia ipfo terinyi. 11Ko ikyo wulalu, ui msese iya terinyi, ileambia samu ya manomayo iwuka mawokonyi hapfo; 12kodema wandai yechikaa ikumbie-sepfo; nochihenda kochiwuṟi-wuṟi na iṟahaṟaha masangenyi.” 13Kaini kawia Mndumii-Ruwa, “Ngapo yako yanjing'anyia mnu, ilawa ikudika. 14Ambuya, nokunjifunyiang'u iya orukenyi inu, njiwe mokushowa na oshangu lopfo, njiwe mowuṟiwuṟi na iṟahaṟaha iya orukenyi, na orio mndu echinjiwona nanjiwaahe.” 15Mndumii-Ruwa kambia, “Kui kipfa kya ikyo, msa echiwaaha Kaini, nechitao kiṟache ka mfungade.” Mndumii-Ruwa kawikya Kaini kichano, mndu kambona nalamkape. 16Kaini kakure alya oshangunyi lo Mndumii-Ruwa kahenda ikukaya kulya orukenyi lo Nodi mbele ya Edenyi ora lo ngamenyi.
Oshari lo Kaini
17Kaini kamanya mka oke nao kafee mana kamdumbuya rina nyi Enoki; kawika mṟi kafudumbuya rina nyi Enoki, kui rina lya mana ulya oke. 18Enoki kafee Iradi, Iradi, kafee Mehuyaeli, Mehuyaeli kafee Methusaeli; Methusaeli kafee Lameki.
19Lameki kakualikia waka wawi; o kuwoka rina lyake nyi Ada, na o kawi nyi Zila. 20Ada kafee Yabali, nyio ndee o walya wekekaa mahemenyi na iwikia shuma. 21Na monomae kalaho rina nyi Yubali; nyio ndee o walya wekekapa uda na mtoṟiṟo. 22Zila kafee Tubali-kaini, mtsanyi motsana orio kihia kedumbuo kya menya na ilama; na mshiki o Tubali-kaini nyiwe Naama. 23Lameki kawia waka wake:
“Adanyienyi ṟu lyako, Ada na Zila;
Lanye waka wa Lameki adanyienyi madedo hako;
Kyamba njilewaha mndu alenjiwika kifaṟe;
Manake alenjipirichuo.
24Kokoya Kaini atao kiṟaache ka mfungade, nkya lohi
Lameki nechitao ka makumi mfungade na mfungade.”
Seti na Enoshi
25Adamu kamanyase mka oke; kafee mana o womi kamdumbuya rina lyake nyi Seti; kipfa nalehamba, “Ruwa amenjiwonyia wufee wungi handu ha Abeli; kipfa Kaini alembaha.” 26Nao Seti kafee mana kamdumbuya rina nyi Enoshi. O nyi hondo wandu walewoka iindia rina lya Mndumii.
Currently Selected:
MAWOOKIONYI 4: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.