MAWOOKIONYI 33
33
Yakobo akoyana na Esau
1Yakobo kairia meso hake, kaambuo, aulya Esau aicha na wandu mahana haana (400), warianyi nao. Kawahawia Lea, na Raheli wana na shisinga shilya shiwi, wana wawo. 2Kawika shisinga shilya na wana wawo kusonguo, na Lea na wana wake numa yawo, na Raheli na Yosefu wafurumi. 3O amonyi kasonguo mbele yawo, kaarama mṟasa wanda ka mfungade, tane ashikia mano mae.
4Esau kakapa mteeṟa icha imwambia, kamchunguṟia, kamwolokia nzingonyi, kamhekia momu; nawo wakafihiṟa. 5Esau kairia meso hake, kawona waka walya na wana walya, kawesa. “Iwa wai na iyo waki?” Yakobo kahamba, “Nyi wana Ruwa aleinenga isinga lyapfo kui woloru woke.” 6Nyilyondi shisinga shilya, na wana wawo, waletikiria hafui wakaarama. Numa Yosefu na Raheli wakatikiria, wakaarama 7Nao Lea, na wana wake wakatikiria hafui wakaarama.
8Esau kahamba, “Ipo lyi lyose ngalikumbuhana, lyaloṟa ki?” Yakobo kahamba, “Lyinjiwonyie iidikio oshangunyi lo mndumii oko.” 9Kyaindi Esau kahamba, “Njiwode shiingiki, mano wama oko, isho uwode shikekuwia shapfo.” 10Yakobo kahamba, “Chi wudo-pfo ngakuterewa; kokoya ngaidikio mesonyi hapfo hoi ukeambia kiinengo kyako mawokonyi hako, kyamba ngawona kyamu kyapfo cha ili ngawona kyamu kya Ruwa, kochihiṟo nyi inyi, 11‘Hoi, keambia mboṟa yako, oendio, kipfa Ruwa nalenjionyishia, ko ikyo njiwode ishi shose.’” Kamuidikia, nao kaambia.
12Kiidima Esau kambia, kennde luire kyaṟo, na inyi njechikusongoya. 13Yakobo kamhaluo, “Mndumii oko naichi ke wana nyi wakoku, na kingise machondi na mmbe njiwode tsiionza. Shumasho shikaitiko mkonu fumu shechipfa shose. 14Hoi mndumii oko nakesongoya isinga lyake; na inyi njechishiteteṟa sa ombuho chandu mchumiefo fo shuma shinjisongoye, na chandu mchumie fo wana; tane njechishika ko mndumii oko ipfo Seiri.”
15Esau kahamba, “Njikudeyang'u wandu maata warianyi na inyi.” Kahamba, “Nyi waki? Njikekuwonyia iidikio tupu oshangunyi lo mndumii oko.” 16Nahong'u Esau kawuya mkonu fulya fulya kawada njia yake mṟasa Seiri. 17Yakobo kahenda mṟasa Sukothi. Kakuwikiapfo mba, kasungusiapfo na matengo ha shuma shake. Ko ikyo rina lya handu halya kukalaho nyi Sukothi.
18Naho Yakobo kacha na kipuo mṟasa mṟinyi fo Shekemu, fui orukenyi lo Kanaani, kekicha awuka Padan-aramu; kawika ihema lyiambuyanyi na mṟifo 19 Kahuṟa ora lo oruka; lulya alewika ihema lilya lyake kuwuka mawokonyi ha wana wa Hamori, ndee o Shekemu ko shipeṟengu ihana sha pesa. 20Kasungusiapfo rasionyi, kalilaha nyi El-elohe-Israeli.
El-elohe-Israeli nyi kimu cha Ruwa, Ruwa o Israeli.
Currently Selected:
MAWOOKIONYI 33: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
