ESTA 7
7
1Nahong'u mangi na Hamani wakahenda ilya choonga kulya ko mkamangi Esta. 2Mangi kawia Esta ili lya mkonu fo kawi alya alya kilyionyi na kinyoyonyi kya mvinyo, “Wulalu le mkamangi Esta, nkiki ukundi? Njiwia na iyo nochiinengo. Kiterewo kyapfo nyi kiki? Ma kokoya nyi kyenga kya wumangi woko nochiinengo.” 3Mkamangi Esta kahaluo, “Kokoya ngawona osu kopfo iyo mangi, na kokukundia injiinutsia kiterewo kyako, nyi inyi njikukae na moo na wandu wako. 4Kipfa inyi na wandu wako luiwakumbe mbuchenyi ye woho, irumatso na isenekia kuchu. Kokoya luwekumbo luwe masinga na isingia wandu njiwekutsiia sau, ma njiwekulisa wukiwa pfo. Ma lukarumatso kuwode mkituwa echiidima iichuṟa wufafa wu wo mangi pfo.”
5Kyasia mangi Ahasuero kawesa mkamangi Esta, “Nyiu ichu na nyiku akeri, ichu mrima foke fokaria iwuta adi?” 6Esta kahamba, “Nyi mnesi, na mkituwa, nyi Hamani mndu mbicho nakamu.” Nalyo lyiyenyi Hamani kawodo nyi wuowu wung'anyi mnu oshangunyi lo mangi na Mkamangi.
7Naalyo mangi kakure alya handu wawedamie kilyiionyi kya choonga na inyo mvingo awodo nyi nyashi, kahenda nja katengeta ipfo mdeminyi fo otiṟiwa. Hamani nao kahoṟoka kulako kechiletsa moo foke ko mkamangi Esta, kipfa nalewona ke mangi akusaṟie kicha kyake pfo. 8Nalyo mangi kawuya na alya kilyiionyi kya choonga awuka alya otiṟiwenyi. Hamani nawekukumbie kitaṟenyi handu Esta awei. Mangi kahamba na ṟu lying'anyi, “Nyi kiki mndu chu akundi iwuta, nakaria iwada mkamangi ko pfinya iya oshangunyi loko kanyi koko?” Mangi alamemaa ideda wakashikia Hamani kyamu kyake. 9Na Harbona, awei mohoṟokia mba umu o walya wepfuṟukanyia mangi kahamba, “Hamani nalekaria isungusia ikidi lyewahia Mordekai ulya alekuashuo kulawoho iyo mangi. Ikidi lyo lya mawoko makumi hatanu nyi ipfo kanyi koke likeri.” Kyasia mangi kawawasa, “Masenyi Hamani napfiieho.” 10Kyasia wakaduo Hamani wakamasa alya ikidihu handu ha Mordekai. Nyashi ya mangi ikahuo.
Kimochi Bible © Bible Society of Tanzania, 2016.