ESTA 2
2
Esta asambuṟo nawe Mkamangi
1Kikashika nyashi ya mangi Ahasuero yekihuo kakumbuo Vashti, kakusaṟa kya orikiki na wutimbiṟi woke na chandu mbonyi tsilehenda kipfa kyake. 2Kyasia waṟundi walya wawemṟundia o amonyi wakadeda nao wechihamba, “Nyi kuwode wana wa waka wafoi wecha, kitewe nalasambuṟo ho umu nki? 3Nochiidima iwia wachili wose wa orio isanga kiidi kya wumangi wopfo uwawie waende wana wa waka wache wose waendo na mbenyi ya waka iya Susa mṟi mnene. Numa wawiko mawokonyi ha Hegai, mnzenge moambuya waka wapfo, wainengo mafuda na shihia shekusungusia kundu wachie ngoseṟa. 4Ulya echikuchihia ngoseṟa nawe nyi mkamangi handu ha Vashti.” Mangi kawona oloho nyi salucha, kawuta ado.
5Kiidi kya mṟi fo Susa kuwewode mndu umu o Kiyuda, rina lyake nyi Mordekai, mana o Yairo mana o Shimei o kishari kya Benyamini. 6 Mordekai nawei umu o wandu waledao wupfungo kiheri kya mangi Yekonia o Yuda alewado nyi mangi Nebkadneza o Babeli.
7Mordekai nawewode mana o washidie alemtoṟisha wafee wake wamepfa kamduo cha mana oke, rina lyake nyi Esta kyaindi rina lyake Kiebrania liwei Hadasa.
8Esta na wana wa waka wafoi wakadao Susa mṟi fung'anyi wakaringo nyi Hegai: Esta kadao mbenyi ko mangi Hegai kamwambia ichu awei mringi o waka. 9Hegai kachihiṟo nyi Esta mṟasa kamkundia kundia kainenga Esta mafuda na kelya kya kyaanya. Kamiira alya awekekaa, kamduo handu hecha ngoseṟa kiidi kya mba ya waka, kamsambuṟia shisinga mfungade wawuka mbenyi ko mangi wampfuṟukanyie.
10Esta awememanyishe kishari kyake ma mbaṟi yake pfo, kipfa Mordekai nawemiimie nalawone kekumanyisha. 11Mordekai kawa moidaida ipfo osehu lo mba ya waka kundu nawone kilya kechihoya Esta na imanya mbonyi tsake.
12Kekishikia kiheri kyake keida na mba ya mangi Ahasuero chando kiwei kiteṟie nao nawemteseheṟe kui iwawaso ke mndu mka nalelo meri ikumi na iwi, nalawade kindo kya ngafu naheṟemke, meri iṟandaṟu nashio mafuda ha manemane, na meri iṟandaṟu ko mafuda hepfaama necha hamu na shihia sheheṟemtsa waka. 13Mana mkeha kaida na mbenyi ya mangi, kakunda kindo kyose kiwukie mbenyi ya waka nahende nakyo ko mangi na nainengo. 14Nekehendapfo kiukanyi na ngamenyi kawuya na mbenyi ya kawi ya waka kaambio nyi Shaashgazi, mṟundi o mangi, na mringi o waka wa mangi. Ke echihenda se ko mangipfo na kokoya achihiṟa mangi na mangi kamlaha kui rina.
15Nahong'u kekishika kamba lya Esta mana o Abihaili ichu aledao nyi Mordekai washidie kamhaluo mana oke, kundu naide na mba ko mangi alekunda kindopfo, shile na shilya shiweishiteṟie nyi Hegai, mokalia mangi, na iringa waka. Esta kakundika oshangunyi lo wose walemmbona. 16Kyasia Esta kadao ko Mangi Ahasuero, mbenyi ya wumangi, meri fo ikumi nyi fo meri fo Tebeti, maka fo mfungade fo wumangi woke. 17Mangi kakunda Esta kota waka wose, nao kawona osaṟio na ikundika kota waka wose, kamṟika oṟo ya wumangi mdohu koke kamhaluo mkamangi handu ha Vashti. 18Mangi kasungusia mfuho fung'anyi kalaha wachili wake wose na waṟundi wake, nyi mfuho fo Esta, kawuta shindo sha nnga shifoi na ihoṟia wandu (chandu kiwei mbuka kiheri kya mkonu mnene), kiidi kya isanga shose.
Mordekai akiṟa Mangi moo
19Kyasia kiheri wakeha walekusanza lya kawi, Mordekai nawedamie mongonyi fo mangi. 20Esta awememanyishe oshari loke ma wandu wakepfo, chandu Mordekai awembawasie, kipfa Esta nawekewada madedo na mapfundo ha Mordekai chandu awei nao kiheri kilya awemtoṟisha.
21Kikashika kiheri Mordekai awekedamia mongonyi fo mangi, wandu wawi kiidi kya matsenge nyi Bigtana na Tereshi wawei weringa mongo wakapfuluko mnu wakakunda iwaha mangi. 22Mordekai kamanya mbonyi i njiwicho, kaongoya Esta, mkamangi, na Esta kawia mangi mbonyi kui rina lya Mordekai. 23Kiheri walesoṟa mbonyi i na iwada wulohi woyo, iwa wawi wakamaso ikidihu. Isho da shikaṟehio kiidi kya kitapu kya mbonyi oshangunyi lo Mangi.
Currently Selected:
ESTA 2: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.