DANIELI 6
6
Kyama kyewaha Danieli
1Kilechihiṟa mangi Dario iwika wachili ihana na makumi hawi (120) kiidi kya wumangi woke wose. 2Na huyawo kawika wasongoru wanene waṟaṟu Danieli ai umu owo; kundu wachili waende mbonyi tsawo ko wasongoruwa mangi nalawone kechisuka. 3Kyasia Danieli kakundika kota wasongoru walya wengi, kipfa mumuyo fo Ruwa fuwei nao, kikatewa Mangi kambika huya wumangi woke wose. 4Kyasia walya wawewawike wesongoya wengi wakashiha mnu chandu wechiwika kundu Danieli nawuto iṟundenyi lyo lya mbonyi tsa wusongoru; indi walaidime immbonyia mti; kyamba nawei mhendeli nalawade kindo awewutie kya mtambo. 5Wandu walya wakawiana; luwode chandu lochiidima iwika luduo Danieli mengenyi lulameida ipfo sumuhana na mawawaso ha Ruwa chu okepfo.
6Kyasia walya wawewawike wesongoya wengi wakahenda ikuwumbia ko mangi wakambia wadi, “lyo mangi Dario kukaeho na moo. 7Wasongoru wose wa mangi na watarami na wachili na wai wanda yawo walewika chila handu hamu kundu kochiwiko iwawaso lya wumangi; kulawode momu fo mndu ose echiterewa ko Ruwa ungi shile nyi kopfo iyo Mangi, handu ha mkonu makumi haṟaṟu (30). Ichu motehia nechikumbo ṟungunyi lya miiso. 8Wulalu iyo mangi wika iwawaso lyo nowewikaho na mṟeho fo kichano kulawode miilacho chando kisumuhanyie so Wamedi na Waajemi kilailachike.” 9Nahong'u Mangi Dario kawikaho mṟeho na kichano ke nyi iwawaso sa inene lilawode iilachika. 10Danieli kekimanya ke mṟeho fometeseheṟo na kichano kyamemaa iwiko, kakuidya na ipfo kanyi koke matiṟisha ha mba yake ha kiṟihenyi haweambuyanyi na Yerusalemu. Kapfira ndi kaṟaṟu orio mkonu kechiterewa na iana Ruwa oke, chandu awekewuta wokia mbooko.
11Kyasia wandu wo wakawada chila kihadi na Danieli, wakaida na mba, wakakoya Danieli kechiterewa na ifuhia Ruwa oke. 12Wakahenda ko Mangi na imdaaya mbonyi tsilya tsa kishingo wakambia: “Iyo mangi chi kulewika kishingo kiwode na kichano kyapfo ke kusie mkonu makumi haṟaṟu (30) kulawode momu mndu ose nalaterewe ruwa ma uhya ma uhya shile kopfo iyo mangi na mndu motehya nechikumbo ṟungunyi lya miiso?” Mangi kahaluo kahamba, “Ee da chandu wuwawaso wo Wamedi na Waajemi wulechiwa iilacha.” 13Nawo wakahaluo wakawia Mangi, “Ambuya Danieli ulya ai umu o wana walya walesamiṟo o Yuda ekekuindia pfo mangi ma akuwonyi iyo nyi kindopfo mangi kishingo kilya nalekimina kuchu. Ambuya neketerewa kaṟaṟu mkonu fumu ikyo shila nyi imina Mangi nyi kiki?”
14Mangi kekiicho madedoho kaichuo nyashi, karihinyika mrimenyi kechihia chando echikiṟa Danieli itane mnengeṟi foolokia. 15Wandu walya wakawada chila lya kawi wechiwia mangi - mmanye nyi idedo lilechiwa iilacha kui wuwawaso wo Wamedi na Waajemi kishingo nyi kishingo na iwawaso lya mangi liindio.
Danieli ṟungunyi lya miiso
16Mangi kawawasa Danieli kaendo kakumbo ṟungunyi lya miiso. Mangi kadeda kambia, “Danieli Ruwa chu opfo okemṟundia mfiri yose nechikuringa.” 17Likaendo iho likapiṟimitsio o mongo fo mruma fulya; mangi kawikaho teeso yake amonyi na tsa wanene wa wandu kulailachike idedo lyose lya mbonyi tsa Danieli. 18Kiidima mangi kakuhendia kanyi koke kalaa dembo taṟaṟaa, nalakunde ma ilya - shinanda shikadeo; katuṟa mado tusu.
19Ngamenyi kilawo mangi kakure kahenda kulya mrumenyi fo miiso. 20Ai kufui nashike; kafihiṟa na isokio mfowa kya Danieli Mangi kawia Danieli, “Oo Danieli mṟundi o Ruwa menyi moo, a ngesa Ruwa chu opfo okemṟundia mfiri yose akukiṟa na miiso yo?” 21Kudi Danieli kahaluo mangi, “Kukaeho na moo Mangi! 22Ruwa oko naleduma wamalaika wake wakawada madumbu ha miiso ilanjiwutie ma kindo; kipfa kuwode kindo njilenyamaṟa ma kya mtambopfo mangi, ma oshangunyi lopfo pfo.” 23Mangi kekiicho ado kachihiyo mnu kawawasa Danieli nawuto kulya mrumenyi fo miiso. Kawutopfo nalawono ma kifaṟe mbihunyi foke, kyamba nawekusirie Ruwa oke. 24Mangi kawawasa walya wose welekumba Danieli koke wakumbo kulya mrumenyi fo miiso, wo na wana wawo, na waka wawo; miiso iya ikawailama ikapopoṟa mafuo hawo walameshika wanda.
25Kyasia Mangi Dario kaṟehia wandu wa mbaṟi tsose na mkambo fo wandu ko mdedie yawo, wandu wai na moo: “Ofoṟo luengeṟeke konu. 26Inyi ngawika iwawaso kiidi kya wumangi woko ke: Wandu wose waowuo Ruwa chu o Danieli:
‘Kipfa o nyi Ruwa menyi moo mokaa mlungana,
wumangi woke wulamanda wuitoṟi woke wo mlungana.
27O nekekiṟa na ichiṟa nekewuta ngata tsing'anyi ruwehu na orukenyi,
nyi alekiṟa Danieli na pfinya tsa miiso.’”
28Kyasia, Danieli cho kawona mboṟa na ona kiheri kya mangi Dario na kiheri kya mangi Koreshi, Mwajemi.
Currently Selected:
DANIELI 6: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
