WAKOLOSE 4
4
1 Nyo wanene, muwonye masinga kilya kisumhanyi na wuleheṟi mochimanya ke nanyo mui na Mndumii ipfo ruwehu.
Shitutumo
2Mutsinde kiterewyonyi; mulae nakyo chowe mochiaana Ruwa. 3Muweluterewya naso kundu Ruwa naluṟuhuye kichumi kyeonguo dedo lyake li lyehamba kirikye kya Kristo kipfa njiipfunge kimaduma kyalyo. 4Terewenyi kundu njiidime ikimanyisha chando kinjiwaṟi ideda.
5 Chumienyi mochikaya walya walaidikie kui wuṟango muikurohya na orio mwaanya muwode. 6Dedo lyanu liwe lyenongowya mdonyi kiheri kyose likae lyelodaloda mbala, mumanye chando kimuwari ihaluo orio mndu kiheri kyose.
Shiiṟikiṟo shefurumia
7 Kya oloho lo koko nyi Tikiko echimwongoya shose. Nyio mwanowama mkunde, mtarami mhendeli, mokyando odu kiṟundionyi kya Mndumii. 8Kitewe ngamduma konu, nyi kundu mumanye oloho loko nawekarisha ngoo tsanu. 9 Naicha arianyi na Onesmo, mwanowama ichu mhendeli mkunde nao akeri o ipfo konu. Wo wechimuongoya shose shiwutika kunu. 10 Aristariko lui nao kipfungyonyi nyi amwiṟikiṟa wai, na Mariko manamae o Barnaba. (Kyake momemwambya na shiwawaso, mandi echicha na konu mumwambye.) 11Na Yesu chu esendo Yusto, namuiṟikiṟikira. Wo wakeri kiidi kya wayuda waidikie, nawo wawenyi watarami wako waiṟundya wumangi wo Ruwa, nawo walenjiwiia kitarama king'anyi mnu. 12 Odoyanu Epafra amwiṟikiṟa ai o konu, na isinga lya Kristo Yesu echimkapanya nyo kiheri kyose ipfo shiterewonyi shake kundu muhoṟoke-ho mutimie mui wawanzie orio kindo Ruwa akundi kyose. 13Na inyi ngamṟingishia ke nyi aikuwinyisha mnu kipfa kyanu na kya wa Laodikia na kya wa Hierapoli. 14 Luka amwiṟikiṟa mhanga ichu odu mkunde, na Demasi.
15Iṟikiṟenyi wanawawama wa Laodikia na mana mshiki Nyimifa na siṟi yo ipfo wekesanzia ipfo kanyi koke. 16Kombona momsomyo paruo ii mutambahane kundu isomyo na siṟinyi ya Walaodikia, na iya iledikyo Laodikia kundu nanyo muweisomyo. 17 Muwie na Arikipo, ambuya wai kundu uinutsye oṟundo lulya ulewada kui Mndumii. 18Aiki kiṟikiṟo kii kya owoko loko inyi Paulo. Muwe monkumbuo na mshe i njimpfunge nayo. Wutonga wo Ruwa wukae nanyo.
Currently Selected:
WAKOLOSE 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
