MAWUTO HA WASU 27
27
1Kikasia kekidumbwo ke luhenda kyaṟo kya Italia wakawika Paulo na wapfungo wengi-se maata mawokonyi ha mchili o siṟi ya Kaisari elaho rina lyake nyi Yulio. 2Lukaadoya ngalawenyi ya Adaramiti iwekeri-ho yehenda ishike ipfo mamṟinyi ha chombenyi lya Asia, lukaira mta; Aristariko Mmakedonyia o kulya Tesalonyikye arianyi naso. 3Ili lya ngama lukashika Sidon. Yulio kawutya Paulo kicha mnu kambikya momu fo ihenda ko mbuya tsake yembeṟyo-pfo nyiwo. 4Wuka-pfo lukaira mta lukaida shi ya Kipro kundu lulenge otanu kipfa njotanu tsiwei tsa ngumbuhana. 5Lukaaida ipalyipalyi lya ora lo Kilikia na pamfilia lukashika Mira mṟi fo Likia. 6Na ipfo mchili ulya kakoya-pfo ngalawa ya Aleksandria ikuṟehyeṟye ihenda ishike Italia, kaludosya-pfo. 7Lukaahenda kyaṟo kya ombohomboho komiida-ho mkonu sa ifoi lukashika ora lo Nido otanu luweiluima. Lukaaida seri ya Kreta lushikie kufui na Salmone. 8Lukaaida kui ngataṟa lochiwambaṟa kya chombenyi lukashika kundo kochihambo Maowonyi mecha. Kufui naho kukeri mṟi fochilaho Lasaya. 9Komeida-ho maheri sa hafoi na kyaṟo kyamba kiwode ngataṟa wulalu, kipfa mfiri yekuotoya iwemeida Paulo kawatutuma. 10Kawawia, “Lanye womi, njiwonyi ke kyaṟo ki nyi kyechiwa kya mawukiwa na shihutsa shifoi, chi kya nzohoṟa na ngalawa tupu pfo indi na kya moo yadu daa.” 11Kya indi mchili ulya kaidikya kya ulya moduo ngalwa iya na menyi oyo kota kilya kya Paulo, alehamba. 12Na ili indi ṟuko lilya lilawesumhanyi necha wandu wakae-ho kiheri kya mbeo wafoi wakahamba ke kichie iwuka kundo ku kundu kyaṟo kishike Foenike kokoya kyechiidimika, na ikaa wakae-pfo shiheri sha mbeo; napfo nyi ṟukonyi lya Kreta liringa njotanu tsa ora lo kyukanyi.
Masinamu hang'anyi Ipalyipalyinyi
13Na otanu lo ora lo kingoto loikiwoka ida kitutu wakusaṟye ke wamewona mwaanya fo chila yawo wakaira kyaṟo wakaduo ngalawa kufui na Kreta ipfo kya chombenyi. 14Koiida-ho kidemvu sa kitutu otanu lo pfinya lo mbaṟi ya owira lukaiamkya lolaho mweeka mlandari. 15Ngalawa ikadao cha kipfa ilaleidima ikapana na otanu lukailekya lukadao. 16Lukaadao mnu lukashika kufui na kiṟingiti kyelaho Kauda lukakumba mnu pfinya lukaidima iira kingalawa kilya kya mbai luwekiṟa ihenda ifoyo. 17Wekiidima iira wakaṟunda na shitarama shilya wechipfunga ngalawa na ngoi weitsa ipfo shi yayo. Nawo ili waleowuo ke walashike ishitso mṟasa ipalyipalyi lya Sirite wakaala shihia sheduo ngalawa wakawekudayo wadi. 18Na kyamba luweikapo mnu nyi owira lulya ili lya ngama wakawoka ikumba nzohoṟa ipalyipalyinyi. 19Ili lya Kaṟaṟu lukakumba shihia sha ngalawa kui mawoko hadu luwenyi. 20Mkonu ifoi ilemsia mnengeṟi na nyenyeri tsila woneka lukawuta-ho macha hekia.
21Nawo ili kulemsia-pfo mfiri ifoi walalya kindo Paulo kahoṟoka kiidi kyawo kahamba, “Lanye wasoṟo, nyi kiwechiwa nanga nokoe mulenjiidikya mukada mulaire mta kulya Kreta na iwona ngatara tsi na kihutsa ki. 22Na wulalu njimwinenga chila, wuyonyi nyi moo, cha kipfa kulaipfo moo ma fumu kiidi kyanu sa fochideka shile na galawa ii nahong'u. 23Cha kipfa kio kya inu malaika o Ruwa chu inyi njii mndu oke nao nyio njekemṟundya alenjichea. 24Nao kanjiwia, ‘Ma kulaowuo Paulo! Nyi kikuwaṟi ihenda hoṟoka oshangunyi lo Kaisari. Kingi-se ambuya Ruwa amemaa ikuenenga wandu wa wai kyaṟonyi kimu na iyo wose.’ 25Kyasia ng'u le womi, sambukenyi. Cha kipfa njiidikye Ruwa ke nawo kyechiwa kido chando ndewio. 26Kya indi na lukaki na lupwitsyo kiṟingiti-hu kimu.”
27Koikishika kio kya ikumi na kaana lochidao ipfo na ipfo ipalyipalyi hu lya Adria ili kio madumbwo hawi waphuṟukanyi wa ngalawa wakakusaṟa ke wameshika itikiria kundo kuhadutsu. 28Wakaolotsa kiheṟa wakawona shiheṟo makumi hawi sha wuleshe wo mṟingenyi, wakahendahenda kitutu wakaolotsa-se kiheṟa wakakoya shiheṟo ikumi na shitanu. 29Wakawuta-ho yowuo washike ipwitsyo hando hawode ngarahamba wakaolotsa shitirimisha ngalawa shiina wakaterewa kukye. 30Na wapfuṟu-kanyi walya wa ngalawa wo wawerie ihenda idicha na ida-ho ngalawa wakasotsya kingalawa kilya kya mbai ipalyipalyinyi cha ili wakundi yolotsa shitirimisha ngalawa sha kusongwo. 31Paulo kawia mchili na wasikari, “Iwa walamekaa kunu ngalawenyi mochiidima ikiapfo.” 32Nalyo wasikari wakadumbwo shiwoho sha kingalawa kilya wakakilekia kiho. 33Napfo koikishika itambaṟuka Paulo kawawasa wose walye shelya kehamba, “Inu nyi mkonu fo ikumi na kaana mochiweda na ikuotoya mulalya kindo ma kitutu. 34Kyasiang'u ngambawasa ke mulye shelya, kyamba nkyo kyechimwendie wuṟamtsu, cha kipfa kulaipfo ma ochui lo ipfo mdonyi yanu lochideka.” 35Kekimaa ideda adi kaira mkate kaana Ruwa oshangunyi lowo wose kafufunja kawoka ilya. 36Wakasambuka wose wakalya shelya shawo wawenyi. 37Natso chando luwekeri ngalawenyi luweshitsye wandu mahana hawi na makumi mfungade na waṟandaṟu. 38Wekiihuda wakaanguṟa nzohoṟa ya ngalawenyi wakaṟukuta ngano ipalyipalyinyi.
Ngalawa ing'anyi yafunjika
39Kukye walamanye oruka lulya shile nyi walewona ndumba imu-ho iwode kyambado wakadeda chila ke waitse naho ngalawa kokoya kyechiwa. 40Wakadumbwo ngoi tsa shitirimisha ngalawa wakashida ipalyipalyinyi, wakaleheṟwo shiwoho sha shiindutsa ngalawa wakadosa ikungo lilya itutu kundu liwade otanu wakahenda na kya alya kyambadonyi. 41Kya indi wakakoya hando kihongo kya sanga kimandye mṟingenyi wakananza-ho ngalawa. Kulya kusongwo kukawado kukawanga tapu kulakupaye, kya indi kulya kya numa kukafunjika kui pfinya tsa masinanu. 42Chila ya wasikari ikawa ke nyi wapfungo wawoho mndu nalashike ikukumba mṟingenyi na idicha. 43Kya indi mchili ulya ili ekundi iletsa Paulo kawaima walawute chando wakuteseheṟye kawawasa walya waichi iigelea mṟinge-hu wakuolotse ipalyipalyinyi kuwoka washike teri-hu. 44Na walya watsuhae wakukiṟe wechikuwada iwa maṟaṟo-hu na iwa shindo-hu shingi sha ngalawenyi. Na wudo wandu wose wakawuta-ho yafukya oruke-hu na kipuo.
Paulo akoyana na matuuro Malita
Currently Selected:
MAWUTO HA WASU 27: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
