MAWUTO HA WASU 25
25
1Kikasia Festo kekikuidya na ipfo wuchilinyi woke kukaida-ho mkonu iṟaṟu kado na kulya Yerusalemu awuka kulya Kaisaria. 2Nawo wakohanyi wang'anyi na wasongoru wa Wayuda wakamchea kyeira mondu fo Paulo wakamwanjarya na imterewa. 3Ke nawawutye kicha kyewachihiṟa nawawase naendo na Yerusalemu. Nawo nyi wadedye kyama kehenda kumbahya kulya njiehu. 4Festo kahaluo ke Paulo echiringyo kulya Kaisaria, nao amonyi nyi akuṟeheṟye ihenda-pfo mkonu fo afui. 5Kahamba, “Kyasia wandumii wanu wasoke kimu na inyi wahende imkumba kokoya kuwode-pfo kimwendye owingo.” 6Kekimaa-pfo ikaa kowo mfiri maata ilaidye nyanya ang'u ikumi kasoka na kulya Kaisaria. Ili lya ngama kadamya ipfo loṟike-hu loanduya kawawasa Paulo naendo. 7Wayuda walya walesoka wawuka Yerusalemu wekicha wakamṟingichia wakaende-ho ngumba tsifoi sa njilemeri tsemkumba sa walaleidima itsiwanza. 8Paulo kakudedya kyake adi, ke, “Inyi njinyamaṟye kindo kya wuwawaso wo Wayuda ma kya hekalu ma kya Kaisaripfo.” 9Kyasia Festo kakunda ikulopa ko Wayuda kawesa Paulo, “Ngesa nawo kunda ihenda kudoya na kulya Yerusalemu noche idumbuyo-pfo mondu fo mbonyi tso nyi inyi?” 10Paulo kahamba, “Njihoṟoki iya mengenyi ii njidose nyi Kaisari, nyiho hando hanjiwaṟi njidumbuyo-ho mondu fo. Njiwode kindo njidekyo Wayudanyi na chando uwekuichye mnu necha. 11Kokoya njidekyo ang'u koka njitanye kindo kyenjiwonya mti funjiendye njihende iwoho njilehye ipfapfo. Kya indi kokoya idedo li wankumba nalyo lilai lya lohi kwipfo msa echiidima injidambika mawokonyi hawo kui kikundapfo. Mondu foko fuhende kuwuuyo Kaisari.” 12Kikasia Festo kekiidima ideda na wandu wa chila kahaluo, “Omekunda mondu fopfo fuhende kuwuuyo Kaisari, kyasia nochikuhendyang'u ko Kaisari.”
Festo awia Agripa mbonyi tsa Paulo
13Koikiida-ho mkonu maata mangi Agripa na Berenyike arianyi nao wakacha na kulya Kaisaria wache iiṟikiṟa Festo. 14Nawo wamkaa-pfo mkonu maata Festo kaongoya mangi mbonyi tsa Paulo kehamba, “Iya kukeri-ho mndu amde kipfungonyi nyi Felisi. 15Na inyi kiheri mbekeri Yerusalemu wakohanyi wanene na wameku wasongoru wa Wayuda wakanjichea kededa kipfa kyake wakaterewa nawonyo wudeheli. 16Na inyi ngawahaluo ke chi mbuka ya Waroma idambika mndu ma kawa wu ke nawoho mndu cho alamewonana na walya wemkumba kyamu kui kyamupfo na iinengo mwaanya fokudedya-ho kyake kehaluo ngumba tsakepfo. 17Kyasiang'u wekisanzya iya na inyi ndatirime, kya indi ili lya ngama ngadamya loṟike-hu loanduya ngawawasa mndu cho naendo-ho. 18Na walya wemkumba wekimṟingichia walamkumbe na kindo kya wukika kyende mondu lohi chando mbekusaṟie. 19Kya indi wawewode mawesano hawo kya mwidikye fowo wawenyi na kya mbonyi tsa mndu elaho Yesu msa alemmaa ipfa msa Paulo ekewa mohamba ke nyi ai na moo. 20Na inyi ngapfiio nyi mdo kya ipfula ṟingishi ya mbonyi ii ngambesa kokoya akundi ihenda Yerusalemu nahende yanduyo-pfo kya shindo shi. 21Kya indi ili Paulo akuhodye ipfo kundo ahambye ke nadeo naanduyo nyi ichu ang'nyi ngawawasa ke naringo ntane ngamdika ko Kaisari.” 22Agripa kawia Festo, “Inyi na mbekundi njiadanye mndu chu.” Kahamba, “Nawo ochimwadanya ngama.”
Paulo ai ko Agripa na Berenyike
23Kyasia ili lya ngama Agripa wakacha na Berenyike waṟee maṟao ha wuitoṟi wakaida na mba ya maanduyano kimu na wachili na wandu wasongoru wa mṟi. Festo kawawasa Paulo naendo. 24Festo kahamba, “Mangi Agripa nanyo mose mukeri iya kimu naso, muwonyi mndu chu, kyake msa wuingi wo Wayuda wose walenjiisima ipfo Yerusalemu na kunu na wudo-se wechifihiṟa ke nawaṟi nakae-se na moopfo. 25Na inyi njekiwona ke alatanye kindo kyembonya iwoho nao amonyi kekikunda yanduyo nyi ichu ang'anyi ngakudumbuya kemduo koke. 26Na inyi ndawode idedo lya ṟingishi-hu lyeṟehya Mndumii. Nkyo kimaduma ngamende na iya sumhana na oshangunyi lonu, mnu nyi lopfo iyo mangi Agripa, kundu kamemaa iweso mbonyi tsake njiwute-ho iwona idedo lyeṟehya. 27Kyamba ngawona ke nyi kindo kilechiwa idika mpfungo, kulaiho kyeloṟa ngumba tsilya akumbo natso.”
Paulo adeda Oshangunyi lo Agripa
Currently Selected:
MAWUTO HA WASU 25: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
