2WATESALONYIKYE 2
2
1 Lomterewa nyo, wanawawama, kya icha lya Mndumii odu Yesu Kristo na kyadu so ikuwumbya handu hamu nao. 2Kundu mlauko nyi madima a owinyi, mlahataṟo mrimenyi manya kui mumuyo mliwe manya kui dedo liliwe manya kui paruo cha ili injiṟehie nyiso yehamba ke Mkonu fulya fo Mndumii fomafukya. 3Kulakaeho echimlemba ma kui njia ii ang'u, ii. Kipfa kwipfo kisonguo nalyo nyi iwuka siṟinyi lilya ling'anyi na ulya mbicho menyi wunyamaṟi nawekuloṟa, nyio mana o orumatso. 4 Nao nechikaruo orio kyechiichiko nyi wandu ke nyi Ruwa ang'u wandu wekyekiindia. Katana akudamiṟa amonyi ipfo Hekalunyi lya Ruwa echikumanyisha o amonyi ke akeri Ruwa. 5Mulakikumbuo shilya njilembia shose mandi njiwei-se nanyo? 6Na wulalu mwichi kilya kimtewa mlamanye. Mbicho-chu nechicha kiheri kyake akundi. 7Ma kudo; Mbicho-chu aowie naiṟunda wulalu; indi echiwono-pfo, tane icho ambowishie echiwukaho. 8 Maindi naho Mbicho-chu echikuloṟa. Indi nao Mndumii Yesu echimrumatsa kui mrufu fo dumbu lyake na imkombetsa kombi kui ngesa ya ikuloṟa lyake. 9 Na ikuloṟa lilya lya Mbicho-chu lii liitikye nyi Satana kui pfinya yose na shichano na maṟiho ha wongo. 10Na kui mtambo yose ya ifurunja wuhoṟotsu yechilemba iwa wai-wadetse kipfa walalekunda iambia kiilohi kilya wakiṟo. 11Nkyo kyatewa Ruwa kawawika pfinyenyi odetso loitika wahende idikya kii-wongo kilya. 12Kundu wawonyo owingo wose iwo walaleidikya kii-lohi kilya; kya indi wawechihiana na wunyamari wulya.
Mulesambuṟo kundu mukiṟo
13Indi kyalukoya so iana Ruwa kiheri kyose kimaduma kyanu, nyo wanawawama mui wakunde nyi Mndumii, kyamba Ruwa alemsambuṟa nyo wokia mawokyonyi mukiṟo mochiilisho nyi Mumuyo muwe wandu muidikyo kii-lohi kilya. 14Nakyo nyi kyo Ruwa lemulahya kui Ndumi yadu ya Sia ya okiio, kundu muhendeduo wuitoṟi wo Mndumii odu yesu Kristo. 15Nakyo kimwenenge, wanawawama, muhoṟoke chimu muwekuwada na kiloshio kilya lulemlosha kui mwongoye na kui paruo tsadu.
16Nao Mndumii odu Yesu Kristo amonyi na Ruwa Ndeyadu ichu alelukunda na iluenenga kiwihiṟia moo kitsinde mulangana na owedo sa ucha kui wutonga. 17Nyio nakarishe ngoo tsanu nawembanza orio kiṟundionyi na idedonyi lyicha lyose.
Luterewienyi ko Ruwa
Kimochi Bible © Bible Society of Tanzania, 2016.