1 WAKORINTO 16
16
1 Kya kisango kilya kesangya waele walya muhende iwuta chando ndewawasa siṟi tsa Galatia. 2Ke orio mkonu fo kuwoka fo mfungade orio mndu o ipfo konyu nakuleṟye ipfo kanyi koke kiteseheṟyo amwonyishe nakyo kundu kisangokyo kilawone kyechianga isanyo inyi ngamemaa icha. 3Na inyi ili ngamwafukya walya mochiwasambuṟa njiwadume na paruo wahende iduo oleki lonu kulya Yerusalemu. 4Indi kiwe lochifo necha njihende nao inyi nyi wechihenda kimu na inyi.
Makusaṟo ha Paulo
5 Kya indi njechicha na konu ngamaa ikuidya ipfo Makedonyia. Kyamba ipfo Makedonyia ngaida-ho kya ikuidya tupu. 6Indi ipfo konu kokoya kyawa nyi njechikaa-pfo ma itsinda-ho na mta fo mbeo kuhenda. 7Kyamba ndakundi wonana nanyo wulalu njechiida tupu kipfa njikusirye kekaa konu kiheri kiliwe na mweke fo Mndumii. 8 Kya indi njechikaa Efeso itane Pentekoste. 9Kyamba njii mpfunguye mongo sa mnene foduo maṟuṟukanyonyi, kuwode na walemanyi wafoi. 10 Kya indi ili Timoteo acha mutambahanye kundu nakae konu alawodo nyi wuowu. Kyamba aipfuṟukanya kyando kya Mndumii kimu na inyi. 11Ma kulakae-pfo echimmina, indi mumsamye na koko kipuo; kyamba nyi njimbedye kimu na wanawawama. 12Indi kya Apolo chu manowama nyi ndemterewa mnu ke nache na konu kimu na wanawawaam, nao kaleha ihenda wulalu pichu; kya indi echicha ili echiwona daawa.
Madedo ha ifurumia
13Laenyi choowe, hoṟokenyi na wuhoṟotsu wo mwidikye, muwe womi muwewa ngohoda. 14Shindo shanu shose shitanjike kui mkundie. 15 Ngambawasa-se kimu, wanawawama. Nyi muichi ke Stefano mba yake nyiyo mboki ya Akaya nawo wakuwikye kipfuṟukanyonyi kyepfuṟukanya waele. 16Kyasia idikyanenyi na wandu cha iwa na orio mndu moṟunda kimu nawo na ikuwinyisha. 17Na inyi njii mchihie kya Stefano na Fortunato na Akaiko wakukerye na inyi. Nyi walenjiichuṟya pacha peche lyanu. 18Kyamba wanjiwihiṟye mumuyo foko moo na fonu nawo. Kyasia wado cha iwo wamanyenyi, 19 Pirisika wamwiṟikiṟa mnu kui Mndumii handu na siṟi ikeri ipfo mba kowo. 20Wanawawama wose wamwiṟikiṟa. Iṟikiṟanenyi kui ihekyana momu yele. 21Aiki kiṟikiṟo kyako inyi Paulo kui owoko loko njimonyi. 22Mndu ma kawa u msa alakundi Mndumii nawiko ṟisenyi. Maranatha. 23Wutonga wo Mndumii Yesu wukae nanyo. 24Kikunda kyako kii nanyo mose mui Kristo-hu Yesu.
Currently Selected:
1 WAKORINTO 16: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
