Roma 9

Kumbanya undimuwa wa Pawulo zela aIzarayeli

1-2Miyo dihikana kumbanya undimuwa, dinnana zuzuma mmirimani mwaga zela abalaga mwasiwa aliwa Kiristu kinambalra. Dawongaga eno kannanama mbwenye nnawonga ibaribari muwari mwa Kiristu. Munemba Otchena unohidedela umboni mmirimani mwaga ira dihikana kumbanya undimuwa zela abalaga. 3Abalaga nnaawonga miyo ba aIzarayeli. Tchoira aliwa eto kinna pandi na Kiristu. Yahawandeye, miyo derege kana yofunafuna nnga Mulugu aditembelrelre, nnga miyo dikumemo muwari mwa Kiristu ira aliwa kayemo. 4Tchoira aliwa babehediwe ira kakale ahima a Mulugu.#9:4 Aliwa babehediwe ira kakale ahima a Mulugu. Muwari mwa atu atene a mwilamboni ya vati, Mulugu aasakunlre aIzarayeli ira kakale atwaye owandana na liye. Moneya undimuwa wa Mulugu wawenda na aIzarayeli. Mulugu apanganne jopangana na aliwa. Zela pandi ya malamulo, Mulugu aavahedile aliwene. Muwari moawandela atu makalelo omutamalela, Mulugu aawandenle aliwa.#9:4 moawandela atu makalelo omutamalela, Mulugu aawandenle aliwa: Muwari mwa atu atene kafwanyeya mwilamboni ya vati, Mulugu aawandenle aIzarayeli bahi ira kakale anamakuta aye (Ezodu 19:5-6) eto ohawandela makalelo okuta mikuto diwa (Levitiku kapitulu 1-4) na musasa afuna liye para aliwa kamange (Ezodu 25:8-9) na nimburo nafuna atu dowa ira kamutamalele. (Detoronomiyo 12:5; 1 Amwene 8:29, 9:3; 2 Amwene 21:4,7; 2 Koronika 7:12,16) Muwari moavaha mapangano, apanganne na aliwa. 5Aliwa banno kakumile mwa makolo ehu a wanle. Eto Kiristu abaliwaga na maningo, abaliwe munlogoni mwa aIzarayeli. Kiristu eto gu Mulugu otonga jatene eto gwenno unateteliwa kala no kala. Ame!

6Naona ira aIzarayeli adjindji kili na Kiristu, kahi ira Mulugu kakwakwanelihedile mazwaye. So inafwanela niiziwe ira kahi atene anabaliwa muzizani mwa aIzarayeli anafwanyeya kagali aIzarayeli.#9:6 kahi atene anabaliwa muzizani mwa aIzarayeli anafwanyeya kagali aIzarayeli: Mulugu kapanganne ira aIzarayeli atene anoza kakale ahimaye. So Mulugu awongile na Abarahamu ira: malogo matene a ilambo ya vati anoza karelihiwe mwa weyo. Nione Jenesesi 12:3. 7Eto nne kahi ira atu atene kabaliwe mwa Abarahamu anafwanyeya kagali ana Abarahamu.#9:7 kahi ira atu atene kabaliwe mwa Abarahamu anafwanyeya kagali ana Abarahamu: Ku wonga ira kala muzizani mwa aIzarayeli ukana ndila mbinli. Ndila yoroma tchi ndila yobaliwa wa maningo muzizani mwa Izarayeli. Ndila yanembinli ku wonga kala muUmweneni mwa Mulugu. Pawulo aza awongaga ira: <<Kahi atene anabaliwa muzizani mwa aIzarayeli anafwanyeya kagali aIzarayeli>>, ku wonga ira kahi atene anabaliwa muzizani mwa aIzarayeli anafwanyeya kagali atu a muUmweneni mwa Mulugu. Tchoira mMazuni munofwanyeya mazu Mulugu awongile liye na Abarahamu ira: <<Weyo nzina nawo nnoza nivweye mwa ahima unaabalege we muwari mwa Izaki.>>#9:7 kahi ira atu atene kabaliwe mwa Abarahamu…: Tempu yenno Abarahamu ohokana mwanaye mmohiwa ahali mwana wa nipangano. Mwana wenno ali Jomayili. Agali Abarahamu ohokana mwanaye Jomayili, Mulugu ohomuwandela ira: <<Weyo nzina nawo nnoza nivweye mwa Izaki, hiya Jomayili.>> 8Ku wonga ira kohokalawo ahima a nipangano eto kohokalawo ahima obaliwa muwari mwa maningo, kahavolowile muwari mwa nipangano. Mbwenye ahima obaliwa muwari mwa maningo kahi ahima a Mulugu. Ahima a Mulugu ba ale a nipangano. Anno mbwenye ba ana Abarahamu a ibaribari. 9Tchoira mMazuni ananiwandela ira Mulugu ohonvaha Abarahamu nipangano ira: <<Yaka ya metchelo, mwedi nnga wenna miyo nnoza eto nnonfwanya muhiyanawo Sara aganna mwana wa mwanapongwe.>>#9:9 Mwana wa nipangano unawongiwa gu Izaki. Zela baliwa wa Izaki, nione Jenesesi 18:10,14.

Mulugu kanaasakulra atwaye muwari mwa joira jiwa, mbwenye mofuna mwaye

10Yeniyo inafwalrafwana nnga imuireyele nikolo nehu Izaki na muhiyanaye Rebeka. Rebeka aganna vambani, vambani vanna liye mwali ahima ambinli. 11-12Mulugu ira aonihede ira liye unamusakulra ule unanfuna liye, ahimale kahanabaliwe, kahanairena yengo yapama nne yabure, Mulugu ohovayela muwandela Rebeka ira: <<Murandji baliwa gunamulabege mung'onong'ono waye.>>#Jenesesi 25:23 Ku wonga ira Mulugu kanaasakulra atwaye muwari mwa joira jiwa, mbwenye unaasakulra mofuna mwaye bahi. 13Jinafwalrafwana eto na mazu a Mulugu kalrembiwe wanle oira: <<Miyo dohomuziveliwa Jako eto Ezawu dohomuida.>>#Malakiya 1:2-3 14Agamusakunlre mmohi, nnga nnafuna niirevo avi? Kodi nnafuna niwonge ira Mulugu kanatonga na makalelo apama? Nari, nne vang'ono! 15Tchoira Mulugu ohowonga na Mozeji ira:

<<Miyo nnomuwendela tangaranga mutu wenno unafuna miyo muwendela tangaranga. Eto miyo nnomuoniha upama mutu wenno unafuna miyo muoniha upama.>> # Ezodu 33:19

16Eto fwanyeya ira sakulriwa na Mulugu kunazela muwari mwa mutu funa waye ira asakulriwe nari zela muwari mwa joira jaye. Sakulriwa na Mulugu unazela muwari mwa Mulugu wenno unaawendela atu tangaranga bahi.#9:16 sakulriwa na Mulugu kunazela muwari mwa mutu funa waye ira asakulriwe: Akala Mulugu unomuwendela mutu tangaranga, kahi ira mutule wire kala wapama, nari. Navwa wendeliwa tangaranga, ku wonga mutule uromile kala mutu otega. Ku wonga ira inafwanela nnga atu atene katongiwe zela jotega jiwa. Muwari mwa atu ambinli otega, Mulugu amulevelela mutu mmohi, amutonga mutu mmohiwa na mwasa wa uvuruvuru waye, Mulugu kanna mulandu.

17Tchoira mMazuni munofwanyeya mazu awongile Mulugu na Farawu oira:

<<Miyo ira duvenyihe ukale mwene oumma murima, doufunelena ira muwari mwa weyo, dautongaga na makalelo a uwali, kopolo daga dionihiwe ira nzina naga niwongiwe mwilamboni mwatene ya vati.>> # Ezodu 9:16

18Ku wonga Mulugu unomuwendela tangaranga ule unafuna liye muwendela tangaranga. Eto Mulugu unomuummiha murima mutu wenno unafuna liye muummiha murima.

Yengo yowombiwa kinamuruniha ule uiwombile

19Mwa eno, mutu unokana yofuka ira: <<Voira mutu kanawanda runiha yenno inafuna Mulugu, nnga Mulugu agamanle muummiha mutu murima, mutule airana yabure, unawanda avi eto welela mutonga?>> 20Mbwenye kavali wandeya ira mutu unonfuka Mulugu yengo mwasiwa yengo iwombiwe kinawanda nfuka maliba aiwombile ira: <<Udiwombele nni eni?>> 21Kodi maliba womba ulongo kanna utongi ira atukule ulongo mmohive, asakanye yengo imohi yofuna laba mabasa oteteliwa na yengo imohiwa yofuna laba mabasa olramwisiwa? Utongi wenno ukana.

22-23Kalaga nnga Mulugu. Kohokalawo atu kawombiwe ira kaonihiwe uwali waye, katolotchiwe. Mulugu ukanamo atu amohiwa aasakunlre liye wanle#9:22-23 aasakunlre liye wanle: Owu hehi aasakannye liye wanle. ira kaonihiwe upama waye, kawendeliwe tangaranga dilukulu. Mulugu okana vilela undimuwa avilelaga na joira ja atu abure ale mwasiwa liye afuna ira atwaye kamuona aatolotchaga abure ale no takaleliwa waye wohokala wa masika na kopolo daye, kawande umbuwela upama undimuwa unna Mulugu.#9:22-23 Mulugu aatolotchaga abure ale tchi tempu inafuna atwaye aasakunlre liye kawande umbuwela upama undimuwa unna Mulugu ira: <<Xii, na hiyene jaira hiyo ji, nafuna nnga nitongiwe na matongiwelo anne. Mbwenye para hiyo hatongiwa eni, gu Mulugu aniwendenle tangaranga.>>

24Atu anafuna za ona upama unna Mulugu liye aatolotchaga atu abure ale gu hiyo uniitanile liye. Hiyo atu oitaniwa, kanili aJudewu ve bahi, nari. Kohokalamo oitaniwa aJudewu,#9:24-31 aJudewu… aIzarayeli: AJudewu kakumile muwari mwa aIzarayeli. Tchoira aIzarayeli atene kakumile muwari mwa mulombwana Jako, wenno anna nzina nimohi niwa na Izarayeli. Mulombwana Izarayeli ohabala ahima a anapongwe kumi na ambinli. Muwari mwa ahimale, mmohi ali mulombwana Juda. AJudewu kabaliwe muzizani mwa mulombwana Juda. Ku wonga muwari mwa aIzarayeli atene, amohiwa kaitaniwa aJudewu. Eto fwanyeya ira Yesu azaga mwilamboni ya vati, muwari mwa malogo kumi na menli a aIzarayeli, asimbwile indjiva ali aJudewu. Yesu ubaliwe muwari mwa nlogo na aJudewu. (Eberewu 7:14) Nona navwa zela aIzarayeli na aJudewu, inafwanela niiziwe ira aJudewu ba atu kakumile muwari mwa aIzarayeli atenene. kohokalamo oitaniwa ohokala aJudewu. 25Kalaga nnga mazu Mulugu awongile liye muwari mwa Ozeya ira:

<<Ale kahali atwaga, nnoza daaire: <Atwaga.> Eto nlogo neno dahaziveliwe miyo, nnoza dire: <Nlogo neni ti nlogo nnaziveliwa miyo.> >> #Ozeya 2:23

26Mulugu eto ohowonga ira:

<<Atu anno kawandeliwe ira: <Nyo kamuli atwaga>, aliwa banafuna za itaniwa: <Ahima a Mulugu Okalawo.> >> # Ozeya 1:10 # 9:26 Owu hehi Mulugu eto ohowonga ira: <<Wewo wawandeliwa atu ira: <Nyo kamuli atwaga>, ku wewo unafuna atu za itaniwa: <Mulugu wa ibaribari, ahimaye.> >>

27Mbwenye zela Ana Izarayeli, namafiyiheda Izaiya ohokuwa ira:

<<Masiki aIzarayeli kaindjive nnga miseva da mutcherelani mwa bara, anafuna za vulusiwa ba atu ohala a vang'ono. 28Mwasiwa Nabwiya unoza aatonge atu atene a ilambo ya vati mokwakwanela eto mohodibeliwa.>>#Izaiya 10:22-23

29Eto mulombwana Izaiya ohowonga zela yafuna za ireya sogolro eraga:

<<Nabwiya wa Makuru Matene ahakale ahanihiyamo hiyo ahima a vang'ono, nakalave nnga akuda Sodoma, eto mwakoka mwene nnga Gomora, atene nagomela malamo.>> # Izaiya 1:9

Vulusiwa uli mwa nroromelo hiya mwa malamulo

30Nagavwile mazwala, jatene eji jinatapulela avi? Ku wonga atu ohokala aJudewu anne kahavendile kala apama banne kagomenle kala atu apama. Upama wewa uzenle mwa nroromelo. 31Eto aIzarayeli kavendile kala apama muwari moharihamo malamulo tchawandile kala apama. 32Mwasiwa wa nni? Mwasiwa aliwa tchavendile kala apama mwa nroromelo. Mbwenye kavendile kala apama muwari moharihamo malamulo.#9:32 nroromelo… moharihamo malamulo: Atu anaumbuwela ira kana nroromelo ku harihamo. Mazwala ananiwandela ibaribari ira kana nroromelo tchi yengo imohiwene eto harihamo tchi yengo imohiwene. Mutu ira avulusiwe, kanavulusiwa muwari moharihamo, mbwenye unavulusiwa muwari mwa nroromelo. Nroromelo ku muroromela Yesu ira akale wenno unafuna uvulusa, we viyeviha vamentoni vaye moiziwa ira uli mutu otega. Mbwenye harihamo ku roma kukumuwela ja Mulugu ira uwande sakanya jengo japama. Eto fwanyeya ira, vulusiwa kunazela muwari mwa joira japama ja mutu, nari. Vulusiwa unazela muwari momuroromela Yesu bahi. Ahakale nroromelo nikala harihamo, kavafuneyege ira Yesu aze akwe. Mbwenye liye ukwele mwasiwa atu kiwandile harihamo.

Fwanyeya ira aIzarayeli kohomala gwagwaduwa na nibwe noagwagwadutcha atu 33nnga mulrembele atu mMazuni wanle ira:

<<Kaing'anani. Miyo nnohela nibwe muwari mwa Siyawu#9:33 Siyawu ukana jengo jidjindji jinawonga atu. Voroma vene, Siyawu ti nzina na mwana mwango wewo wamangiwe sidadi ya Jeruzalemu. Navwa Siyawu, podi tapulela Jeruzalemu (Izaiya 10:32), nari aIzarayeli (Izaiya 51:16), nari ilambo ya zulu. (Eberewu 12:22) Muwari mwa mazwala, Siyawu unatapulela aIzarayeli. Tchoira Mulugu amurumile Yesu ira alabe mabasaye muwari mwa aIzarayeli. AIzarayeli mbwenye kohogwagwaduwa na Yesu. neno nnafuna gwagwaduwana atu eto nibwe noazuzumiha atu. Mutu wenne unaroromele nibwe nne, kaza anyaswa.>> # Izaiya 8:14, 28:16

Currently Selected:

Roma 9: iLolo

Highlight

Copy