Roma 16

Pawulo ohorumiha malondjelo para afwaye omuroromela Yesu a Roma

1-2Miyo nnouwandelani ira murongolihu Febe unoza wa nyo. Aza, mmuwatchele pama nnga mutu uli muwari mwa Nabwiya eto na makalelo apama nnga mutu otchenihiwa. Mmukamihede zela yengo ili yatene inamuhalele. Tchoira liye gunakamihedetcha nikuru na atu omuroromela Yesu a sidadi ya Senkiriya eto liye unoakamihedetcha atu adjindji vamohi na miyene eto odikamiheda.

3Nnomulondjela Pirisila na mamunaye Akwila afwaga olabana vamohi muUmweneni mmohive mwa Yesu Kiristu.#16:3-15 Nnomulondjela: Owu hehi Mmulondjele na nzina naga owu hehi Mmulondjele. Kalaga nnga Pawulo afuna andimuwa a atu omuroromela Yesu a Roma kawatchenle karta ni, kafiye va atu anna aawonga liye, kadowe kawonge ira: <<Pawulo unipanganyedile ira nulondjele na nzina naye.>> 4Tchoira malambo a mundulrimu yohokala tempu imohi yavivelenle atu kwa ira kadivune miyo dahakwe. Miyo nnoatamalela eto kahi meka. Makuru matene a atu omuroromela Yesu kahali aJudewu na aliwene anoatamalela. 5Eto nnolondjela nikuru na atu omuroromela Yesu anagumanetcha vande viwa.

Eto nnomulondjela Epeneto wenno unamuziveliwa miyo, wenno uli mutu oroma muroromela Kiristu ilambo ya Aziya. 6Eto nnomulondjela Mariya, wenno unasimbwetcha ulabelani. 7Eto nnomulondjela Andaroniko na Juniya, aJudewu afwaga anno kafwanyeya vamohi na miyo mukadeya. Aliwa kohoiziweya na anamarumiwa eto aliwa bali arandji volowa muwari mwa Kiristu miyo dahanavolowemo.

8Nnomulondjela Ampiliyato wenno unafwanyeya agali mbalaga unamuziveliwa miyo mwa Nabwiya. 9Nnomulondjela Urubano, namalaba wa muUmweneni mmohive mwa Kiristu. Eto nnomulondjela Estaki wenno unamuziveliwa miyo. 10Nnomulondjela Apeleji, wenno unaoniha muwari mwa makalelo aye ira gu mutu omuhara Kiristu. Eto nnomulondjela Aristobulu na abali atene. 11Nnomulondjela muJudewu nfwaga Erodiwo. Nnomulondjela Narisizu na abali atene a vande vaye anafwanyeya muwari mwa Nabwiya. 12Nnomulondjela Tirifena na Tirifoza, ahiyana olaba mabasa a Nabwiya. Nnomulondjela Pereside wenno unamuziveliwa hiyo. Na liyene gu muhiyana asimbwetcha laba mabasa a Nabwiya. 13Nnomulondjela Rufu, mutu osakulriwa na Nabwiya. Nnomulondjela eto Rufu mmayiwa. Liye adiona miyo nnga mwanaye. 14Nnomulondjela Asinkirito, Felegonte, Herimeji, Patorobaji, Herimaji na abaliwa omuroromela Yesu anazetcha gumana vamohi na aliwa. 15Nnomulondjela Filologo, Juliya, Nerewu na murongoliye Olimpaji na atu otchenihiwa atene anazetcha gumana vamohi na aliwa.

16Mwalondjelanege na beju dotchenihiwa.#16:16 Mwalondjelanege na beju dotchenihiwa. Malambo a mundulrimu muwari molondjelana, atu a muibalini mmohive eto mutu na nfwaye kohokana makalelo olondjelana na beju. Na vano ve muwari mwa atu anafwanyeya muwari mwa Kiristu inafwanela kakayena makalelo olondjelana, ooniha muibalini muli atu muwari mwa Kiristu. Makuru matene a Kiristu anoulondjelani.

Pawulo ohakokomeza aRoma ira kaarambele anamalaleya onama

17Miyo abalaga nnoukokomezani ira polre polre zela atu otatamula gaweya. Tchoira kohokalawo analaleya jengo johokala ja ibaribari johiyana na ejo jifundjihiwe nyo. Atu anno, inafwanela mwaarambele pama. 18Mwasiwa aliwa vinalaba atu, kinalaba ja Nabwiya wehu Kiristu. Analaba jofuna jiwa. Analaleya joziva ira mutu avwa, avitukulelege. Moira eno, anoanyenga atu ale kali kahanaiziwe ibaribari. 19Miyo nnohagalala zela wa nyo mwasiwa atu atene komala ona vwelela wenyu. Miyo eto nnafuna nnga mukale atu a zelru zela makalelo oirana japama. Mbwenye kamukale atu oiziwa jabure. 20Mulugu wenno unavaha murendele tchineneva unomutatakanya Satana ira akale vati va manyalo enyu. Sayi dinna Nabwiya wehu Yesu Kiristu dikale na nyo.

Pawulo ohawandela aRoma zela afwaye amohiwa kampanganyedile malondjelo

21Timoteyo wenno unalaba vamohi na miyo unoulondjelani eto aJudewu afwaga Lusiyo, Jasawu, Sosipatiro na aliwene anoulondjelani.

22Miyo Terisiyo wenno Pawulo umulrembihile liye karta ni nnoulondjelani nyo afwaga muwari mwa Nabwiya.

23Miyo Pawulo nnahaya vande va Gayo. Nihikalawo eto nikuru na atu omuroromela Yesu nnazetcha gumana vande vaye. Gayo eto na liyene unoulondjelani. Erastu wenno uli namakoya kobiri wa guverno musidadi muno unoulondjelani. Mbalihu Kwartu eto unoulondjelani. 24Sayi dinna Yesu Kiristu dikale na nyo atene. Ame!

Pawulo unamutamalela Mulugu

25Mulugu atamaleliwe! Tchoira muwari mwa Muselu Wapama wenno unalaleya miyo zela Yesu Kiristu, Mulugu unonilimbiha. Zela Muselu Wapama, malambo a mundulrimu a mukalakala, kalivo aiziwile Mulugu yafuna liye irana muwari mwa Yesu Kiristu. Alive yengo yokoyeya. 26Mbwenye muselu wa Yesu Kiristu aromile kuma mwa mazu kalrembiwe na anamafiyiheda a wanle. Peno eto Mulugu gurumile ira muselu wa Yesu alaleyiwe muwari mwa malogo matene ira atu a malogo matene kamuroromele Yesu Kiristu, kamala kanvwelelege. 27Mulugu mwinnya wa zelru datene, wenno airilena jatene ejo atitimihiwe kala no kala muwari movira mwa Yesu Kiristu.#16:27 Owu hehi Mulugu mwinnya wa zelru datene, atitimihiwe kala no kala muwari mwa Yesu Kiristu. Ame!

Kukala mazu a karta nalrembiwele atu omuroromela Yesu a Roma.

Currently Selected:

Roma 16: iLolo

Highlight

Copy