Roma 11

Mulugu ukana atwaye muwari mwa aIzarayeli

1Miyo nnafuna difuke eni. Kodi Mulugu umala ahiya atwaye aIzarayeli? Nari, nne vang'ono! Tchoira na miyene dili muIzarayeli, dibaliwe muibalini mwa Abarahamu, nlogo na Benjami. Mulugu kadihiyile. 2Ku wonga Mulugu kaahiyile atwaye anne aasakunlre liye wanle. Kodi mwire diwala mazu kalrembiwe wanle mMazuni, anno mulombwana Eliya awongile liye na Mulugu? Liye ohowonga zela makalelo abure a aIzarayeli eraga:

3 <<Nabwiya, aIzarayeli kohomala apa anamafiyiheda anne mwaarumile nyo eto kohomala bwanyula vibuwa denyu. Uhanle gu miyo meka eto aliwa anavenda jodipa eni.>> # 1 Amwene 19:10,14

4Mulugu amuwakunle avi? Kwi:

<<Nari kahi eno. Tchoira miyo dihikana atwaga daakoyile miyo, alombwana okwakwana 7.000 kahakokorenle ikwamutu yosema ineriwa Baali.>> # 1 Amwene 19:18

5Kalaga nnga tempu ili hiyo ila. Mulugu ukana atwaye okumela mwa aIzarayeli a vang'ono, aasakunlre liye mwa sayi. 6Sakulriwa na Mulugu unazela mwa sayi daye. Kunazela muwari mwa joira ja mutu. Tchoira sakulriwa wahazelege muwari mwa joira ja mutu, sayi dedo kadakala sayi.

7Jeji jinatapulela nni? Tapulela ira aIzarayeli oindjiva tchawandile fwanya vulusiwa wavenda atu.#11:7 aIzarayeli oindjiva tchawandile fwanya vulusiwa wavenda atu: Pawulo umala wonga ira: Eto aIzarayeli kavendile kala apama muwari moharihamo malamulo tchawandile kala apama. (Roma 9:31) AIzarayeli a vang'ono kasakulriwe kohofwanya vulusiwa, mbwenye afwiwa oindjiva kohomala ummihiwa mirima. 8Zela ummihiwa wewa, unalingana na mazu a Mulugu kalrembiwe wanle oira:

<<Mulugu uhadodomiha onelramo wewa, uhavaha meso ohowanda ona, na mabaru ohowanda vwa pakana siku na peno.>> # Izaiya 29:10; Detoronomiyo 29:4

9Eto Davi ohowonga ira:

<<Nabwiya nnouvepani ira musakanye ira kazaga ira kadowe kadje vameza, kamange ngohi, kamange ratuwero. Musandutche udja wewa ukale nnga yengo yoagwiheda atu vati eto nnga yengo yoaweliheda atu kunyakunya. 10Mutimihe meswiwa ira kahawande ona eto muummihe mitana dewa ira kakaleve oworamene.>>#11:10 mutimihe meswiwa ira kahawande ona eto muummihe mitana dewa: Muwari mwa muselu ula Pawulo unawonga zela makalelo Mulugu aummihile liye aIzarayeli oindjiva. Evale liye ohowonga mazu a Davi zela ubure afunne liye nnga waafwanye amwidanaye. Tapulela ira Nabwiya unowanda muummiha mutu ira akaleve wabure, nnga jamuirilena liye mwene Farawu. Nione Salmu 69:22-23

AIzarayeli anoza kavolowe muwari mwa Kiristu

11Va nnafuna difuke eni. AIzarayeli gwagwaduwa ugwagwaduwile atu, kodi ali ira kakaleve ogwene? Nari, nne vang'ono! Ali ira muwari moviringaniha mwewa, vulusiwa ufiye wa atu ohokala aJudewu ira aIzarayeli kaaona, kasilrilrege. 12Akala viringaniha wa aIzarayeli uhazelana atu a mwilamboni ya vati rayela undimuwa eto akala viringaniha wewa uhazelana atu ohokala aJudewu rayela, ki nnga aIzarayeli atene viringaniha wewa wamala, kaza kavulusiwa, upama unafuna azela atu atene mwilamboni ya vati unaza ukale avi? Unaza ukale upama wohokala wa masika.

13Eni nnouwandelani nyo atu ohokala aJudewu ira Mulugu udirumile ira dikale namarumiwa oulaleyani nyo. Eto muwari mwa emule, miyo nnoriheda mabasaga 14ira aJudewu kauonani, kausilrilregeni ira muwari mwa aliba silrilra, amohi katwaruwe ira kavulusiwe.

15Atu ohokala aJudewu kohowanda wandana na Mulugu mwasiwa aJudewu kohoruniha ja Mulugu.#11:15 kohowanda wandana na Mulugu mwasiwa aJudewu kohoruniha: AJudewu kagamanle runiha vulusiwa wafuna atu vahiwa, uvahiwe ba atu ohokala aJudewu. (Lukaji 14:16-24; Juwawu 1:11-12; Joira ja Anamarumiwa 13:46-47) Ki eto aJudewu annya kaza karumelaga vulusiwa mwa Yesu, jengo jinaza jikale avi? Ale kakwile anoza kavahiwe ingumi.

16Akala masa a vang'ono oroma munyiwa anavahiwa wa Mulugu botchena, ku wonga masa matene botchena. Eto akala mutchitchi gotchena, na tambi dene dipwetilemo totchena.#11:16 akala mutchitchi gotchena, na tambi dene dipwetilemo totchena: Muwari mowonga mazwala, Pawulo unawonga muwari mwa yofwalrafwaniha ira iiziweye ira akala makolo a aIzarayeli kohokana pandi na Mulugu, kohokalawo ahimiwa anafuna kana pandi na Mulugu. Sogolro wa muselu wenna nnovwa ira ikalawo tempu inafuna za yoira aIzarayeli kawelele wandana na Mulugu. (Roma 11:26)

Mulugu ohabandihamo atu ohokala aJudewu mutengo mmohive mwali aJudewu

17Ili nnga mutengo mmohi wa azeti unazaliwa vande. Mulugu gutukunle mutengo wapama ule, tambi dimohi diwa liye kotolawo, tatila. Dowa eto tukula mutengo wa azeti wa mukokolani, ohozaliwa, kotolawo tambi, liye za bandiha vamohi na tambi dihanle da mutengo wa vande ule. Evale tambi datene gumanela, datene kalagawo vamohi muwari mwa mahindje amohive anakumela nigodo nimohive na mutengole. 18Nyo tambi dubandihileni Mulugu, kamuvitukulele zela tambi dikotoliwe dile. Mbwenye inafwanela muumbuwele ira unavaha nigodo nne ingumi kahi nyo, mbwenye nigodo tinouvahani ingumi nyo tambi.

19Afwase munokanamo ira: <<Mulugu ukotolele tambi dile ira anibandihedemo hiyo.>> 20Mwera eno, muhukana ibaribari. Eto Mulugu akotonlewo tambi dedile na mwasa ohomuroromela Yesu. Nyo mbwenye tambi mubandihiwe muli apamene mwasiwa munomuroromela Yesu. Nona, kamukale ovitukulelene mbwenye ifwanele muovege. 21Tchoira akala Mulugu owanda kotolawo tambi da mutengo wapama ule, unowanda ukotolani nyo mwahamuroromele.

22Kaing'anani uwali wa Mulugu na tangaranga daye. Tangaranga daye unauwendelani nyo atu ohokala aJudewu eto uwali waye unaaoniha ale kagwile. Nona yali yapama muwendegeve na tangaranga da Mulugu. Tchoira mwahiya tangaranga daye, na nyenne Mulugu unougwadani. 23Vamohive vevo, aJudewu karoma muroromela Yesu, na aliwene anobandihiwa mwasiwa Mulugu ukana kopolo dowanda abandiha akoka. 24Nyo tambi dozawo dile, Mulugu uwanda ugwadani mukokolani, za ubandihani na mutengo wa azeti wa vande agali atu kinerana eno. Ki eto tambi daye da mutengole dakotonle liye atatila dile, era atukule, awelihedewo, kodi nnorutcha banda? Kannarutcha. Kalaga nnga aJudewu, na aliwene kera kawelihediwe nigodoni wakumihiwile atu, kinarutcha banda na nigodo niwa akoka.

25Abalaga miyo nnafuna muwande iziwa yengo yokoyeya ila tawiha ira munoza muvitukulele muwari mwa zelru denyu. Yengo yokoyeya inafuna nyo iziwa tchoira aIzarayeli oindjiva kohoummihiwa. Aliwa anokalave eno fiyeda numero na atu omuroromela Yesu ahali aJudewu nikwakwane.#11:25 numero na atu omuroromela Yesu ahali aJudewu nikwakwane: Ku wonga Mulugu ukana numero niiziwile liye na atu ohokala aJudewu anafuna muroromela Yesu. Numero niwa nagakwakwanne, tchi tempu inafuna vulusiwa aJudewu. 26Numero na atu ohokala aJudewu nakwakwana, tchi tempu yenno aIzarayeli atene anafuna atu za vulusiwa. Kalaga nnga mazu a Mulugu kalrembiwe wanle oira:

<<Nvuni unoza akumele mwa Siyawu.#11:26 Nvuni unoza akumele mwa Siyawu. Siyawu ukana jengo jidjindji jinawonga atu. Voroma, ti nzina na mwango. Sidadi ya Jeruzalemu imangiwe vazulu va mwango Siyawu. Navwa Siyawu, podi tapulela Jeruzalemu (2 Samuweli 5:7), nari aIzarayeli (Izaiya 51:16), nari ilambo ya zulu. (Eberewu 12:22) Muwari mwa mazwala Nvuni unafuna za gu Yesu. Liye aza unotamangihamo ubure watene unafwanyeya mwa Ana Jako. 27Dakurumuwela jotega jewa, tchi tempu yenno inafuna miyo sakanya yopangana yaga na aIzarayeli.>>#Izaiya 27:9, 59:20-21

28Zela Muselu Wapama wa Yesu, aIzarayeli malambwala anaoneya kagalive amwidani a Mulugu. Para kala amwidani, ili ira vulusiwa udowe wafiye wa nyo atu ohokala aJudewu. Masiki eno, voira Mulugu ohasakulra aIzarayeli, liye unoaziveliwave na mwasa wa makolo ewa a malambo a mundulrimu. 29Tchoira Mulugu anvaha mutu yengo, umala nvaha. Mulugu amusakulra mutu, umala musakulra.

Tangaranga Mulugu daairele liye atu ohokala aJudewu, unoza eto aairele aIzarayeli

30Nyo atu ohokala aJudewu, wanle mwawenda na makalelo ohonvwelela Mulugu. Eto peno Mulugu agaonne uvuruvuru unera aIzarayeli, uuwendelani tangaranga. 31Ku wonga Mulugu owanda uwendelani tangaranga ora yawenda nyo mwahanvwelelaga. Tangaranga dedo Mulugu unoza arungunutche, aawendele aIzarayeli anne kahananvwelela malambwala. 32Fwanyeya ira Mulugu ohotonga ira atu atene kakale atu ohonvwelela#11:32 Mulugu ohotonga ira atu atene kakale atu ohonvwelela: Adawu na Eva kagamanle mutegela Mulugu, ahima atene anabaliwa kagali otegene. ira aze aawendele atene tangaranga.#11:32 Owu hehi Mulugu ohatonga aJudewu atene ira kawendege na makalelo ohonvwelela ira Mulugu awande awendela aJudewu atene tangaranga. Owu hehi Mulugu ohatonga aJudewu atene ira kawendege na makalelo ohonvwelela ira awande awendela atu atene tangaranga.

33Upama wa Mulugu, zelru daye, no iziwa waye kahi wa masika. Kalivo unawanda mariha iziwa matongelo a Mulugu. Nne jinera liye kalivo unawanda muruniha. 34Uiziwile jinaumbuwela Nabwiya bani? Uwandile muwelruza bani?#Izaiya 40:13 35Unvahile Mulugu yengo ira liye akayena mangawa na mutu bani? Kalivo.#Jobu 41:11 36Tchoira jatene jiliwo jinakumela mwa liye. Jatene jinakalawo mwa liye. Eto jatene jiliwo jikalelewo ira Mulugu atitimihiwe. Mwa eno, Mulugu atitimihiwe kala no kala. Ame!

Currently Selected:

Roma 11: iLolo

Highlight

Copy