Filipo 1

Malondjelo a Pawulo

1Unalremba gu miyo Pawulo vamohi na Timoteyo, nili azari a Yesu Kiristu. Nnoulrembelani nyo mwatene muli atu otchenihiwa, muli atu anafwanyeya muwari mwa Yesu Kiristu,#1:1 muwari mwa Yesu Kiristu ku wonga zela ona wa Nabwiya Mulugu, atu omuroromela Yesu anafwanyeya vamohi na Kiristu, muUmweneni mmohive eto munikuruni mmohive. Mulugu aaona atu atene omuroromela Yesu, unaaona kohomala gumanihiwa vamohi na Kiristu. munafwanyeya sidadi ya Filipo vamohi na mabixpu#1:1 Va Pawulo awongaga mabixpu, mabixpu anawongiwa ku sawasawa no wonga ansiyawu nari pastori. Kahi ira mabixpu anohiyana na aansiyawu nari apastori. Mazina mararu anno anamuwonga mutu mmohive. Na izugu, aansiyawu a Efezo kaitaniwa anciãos nari presbíteros. (Joira ja Anamarumiwa 20:17) Atu amohive kaitaniwa eto bispos. (Joira ja Anamarumiwa 20:28) Atu amohive kohokana mabasa oaing'anela mabila. Na izugu, ule unaing'anela mabila unaitaniwa pastor. na adiyankoni anakala wewo. 2Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

Yolobela ya Pawulo

3Vanagarati miyo duumbuwelagani nyo, so inadizela ku mutamalela Mulugu. 4Tempu ili yatene inaulobelelani miyo, nnoulobelelani muwari mohagalala 5mwasiwa kuma siku noroma niromile nyo vwa Muselu Wapama fiyeda peno va, nyo munalaba mabasa olaleya Muselu Wapama vamohi na miyo.#1:5 munalaba mabasa olaleya Muselu Wapama vamohi na miyo: Fwanyeya ira muwari molaba vamohi, akuda Filipo koholaleya wali atu eto kohonvaha Pawulo jengo ira mabasaye kadowege sogolro wali liye. (Filipo 4:15-16) 6Miyo eto dihikana ibaribari ira siku nnafuna za Yesu Kiristu, Mulugu wenno uromile laba mabasa apama muwari mwa nyo, unoza akwakwanelihede mabasaye siku neno.#1:6 unoza akwakwanelihede mabasaye siku neno: Ku wonga vanaza Yesu, Mulugu unoasandutcha atwaye ira kakale nnga Yesu. Nione 1 Juwawu 3:2. Agali Mulugu unoatcheniha atwaye mawendelo ewa vang'ono vang'ono tempu ili hiyo ila (Roma 8:28; 2 Korinto 4:17), unoatcheniha atwaye fendo yogomiheda ira joumbuwela jewa jatene jikale jotchena jene siku nnaza Yesu Kiristu.

7Ili yofwanela duumbuweleni eno mwasiwa miyo nnouziveliwani valukulu mmirimani mwaga tchoira dahanakale mukadeya, ora yawendawenda miyo na mabasa oaoniheda atu ibaribari zela Muselu Wapama, daarunihaga ale karuniha, muwari mwa sayi da Mulugu, na nyenne eto mwalabave mabasa amohive dalaba miyo. Eto ora ila ili miyo mukadeya eni, munalabave nnga mabasa amohive anna miyo. 8Mulugu gunadihidedela umboni zela usauwelani no uziveliwani unna miyo okumela wa Yesu Kiristu.

9Miyo nnoulobelelani ira zivelana wenyu udowegeve sogolro, ku wonga muwandege zivelana muwari mwa zelru eto moonelramo. 10Miyo nnalobela eno ira mwagaiziwile eto mwagairilena japama, siku nnafuna za Kiristu nafiya, siku neno mufwanyeye mwagali apamene, mwahanna imanya, 11mwagavahile misapo dapama muwari mwa kopolo da Yesu Kiristu. Evale unafuna teteliwa eto unafuna tamaleliwa gu Mulugu.

Mazu a Mulugu anadowa sogolro masiki muwari mwa makatamiho

12Miyo nnafuna nyo abalaga muiziwe ira hindiwa waga, miyo kalaga mukadeya, jatene jidiireyele jilabile ira Muselu Wapama adowegeve sogolro. 13Tchoira eni agwarda a palasiyo vamohi na atu atene a uno kohomala iziwa ira dili mukadeya na mwasa wa Kiristu. 14Eto abalihu oindjiva a uno, kagadionne ira dili mukadeya eni, koholimbiheya ira kamuroromelegeve Nabwiya. Malambwala, muwari molimbihiwa, analaleya mazu mohokayikela, mohoova hiyaniha na makalelo kanna atu wanle.

15-16Na ibaribari uli miyo uno kohokalawo makuru menli a atu anamulaleya Kiristu. Amohiwa anamulaleya Kiristu na mmirimani mwewa mwatene. Analaleya muwari modiziveliwa, muwari moiziwa ira miyo dili mukadeya na mwasa owonga ibaribari zela Muselu Wapama. Mbwenye kohokalawo amohiwa anamulaleya Kiristu muwari mokalelana nrima, muwari mofuna tatamula gaweya. 17Aliwa mbwenye kinalaleya na mmirimani mwewa mwatene. So anamulaleya Kiristu muwari mofuna vioneyiheda eto mofuna wendjeda zuzuma waga mukadeya munafwanyeya miyo.#1:17 So anamulaleya Kiristu muwari mofuna vioneyiheda eto mofuna wendjeda zuzuma waga mukadeya munafwanyeya miyo. Makalelo a ale kavenda jomuzuzumiha Pawulo muwari molaleya hiyo kaniiziwile. Afwase aliwa kabalra ira: <<Jolaleya ja Pawulo kahi yengo. Kaing'anani, liye uli mukadeya mwasiwa Mulugu kananfuna. Mbwenye hiyo kanili mukadeya mwasiwa Mulugu uli na hiyo.>> Masiki eno Pawulo kakukumuwile na atu anne mwasiwa aliwa kalaleya makalelo ovulusiwa mwa ibaribari ahali mogombiha eto muwari mohoviringaniha. So mbwenye vanonga atu, aliwa kalaleya muwari mofuna hariwa eto mofuna vioneyiheda nnga aliwa kali apama mukwaranya Pawulo. 18Kodi inafwanela dikukumuwe zela ejo? Nari. Akala atu anamulaleya Kiristu mofuna muziveliwiha Mulugu, akala anamulaleya movioneyiheda, miyo nnahagalala mwasiwa Kiristu unolaleyiwa mwa ibaribari.

Yofuna ya Pawulo ali mutamalela Mulugu muwari mwa jatene

Eto miyo nnerege hagalala. 19Tchoira miyo dihiiziwa ira jeji jinaireya, jinagomela dizelana vulumuwa waga na mwasa odilobelela wenyu eto na mwasa okamihediwa na Munemba wa Yesu Kiristu. 20Miyo ilukuluwa inafunetchetcha miyo, yodediha ilukulu inna miyo, ili ira dahakayena manyazo.#1:20 yodediha ilukulu inna miyo, ili ira dahakayena manyazo: Pawulo kafunne irana yengo ira vasogolro ize invahe manyazo. Tchoira liye ohoiziwa ira airana yabure, unoza akayena manyazo. So yofuna yaye, Pawulo ohowonga ira Kiristu ateteliwe muwari mo kalawo waga. So mbwenye nnafuna dilabe mabasaga na mmirimani mwaga mwatene ira Kiristu ateteliwe muwari mwa joira jaga. Masiki dikwe, masiki dikalewo, nnafuna Kiristu ateteliwe muwari mo kalawo waga. 21Tchoira miyo ona waga, dakalawo, nnafuna dikalelewo ira Kiristu ateteliwe. Dakwa, dihidjavo kwaranya. 22Ingumi yaga idowagave sogolro, nneregeve vaha misapo dapama. Eto inafuna miyo sakulra, akala dikalewove, owu hehi dikwe, kannawanda ona pama pama inafuna miyo sakulra. 23Jatene jofuneyave. Mbwenye sakulra waga wafuna ukale ira miyo didowe dakale na Kiristu, tchoira para miyo, kala na Kiristu tchapama kwaranya.#1:21-23 Dakwa, dihidjavo kwaranya. Pawulo kawongile ira: <<Nnafuna dikwe, divume, divunde, didedihege za wanembinli wa Yesu Kiristu.>> Yofuna yaye ali didowe dakale na Kiristu, tchoira para miyo, kala na Kiristu tchapama kwaranya. Ku wonga Pawulo arumela ira mutu akwa, ahanavenyihiwe mokwani, unodowa akale na Yesu Kiristu. Zela ibaribari ira munemba wa mutu unodowa wa Mulugu ahanavenyihiwe mokwani, nione Ekeleziyaste 12:7; Lukaji 16:22-31; Eberewu 12:22-24; Jowandeliwa 6:9-11. 24Mbwenye inafuneya ira dikalewove na ingumi ya maningo ira diwandege ulimbihani.

25Muwari mokana ibaribari yoira dihikanave mabasa mwilamboni ya vati, dihiiziwa ira miyo nnohalave mwilamboni muno ira diwandege ulimbihani muwari mwa ibaribari yenno inahara hiyo eto hagalala wenyu udowege sogolro muibaribarini mwemo. 26Eto miyo nnafuna dikaleve na nyo ira mwadiona dizaga wa nyo akoka, muwande mutamalela Yesu Kiristu.

27So inafwanela muwendege na makalelo ofwanela zela Muselu Wapama wa Kiristu ira tempu inafuna miyo za duoneni owu masiki kadizile, divwege miselu dokumela wa nyo ira nyo muli olimbene movwanana eto munawenda na mirima dimohive, muzuzumelaga vamohi ira atu karoromele Muselu Wapama. 28Miyo eto inafwanela divwege ira nyo kamunakukumuwa zela yengo ili yatene inera ale anauidani. Kauonani ira kamunakukumuwa zela uidani unera atu ule, tchoira yenno tchi ionihedo ira anoza katolowe mbwenye nyo gunafuna vulusiwa muwari mwa kopolo da Mulugu.

29Tchoira Mulugu mwa sayi daye uuvahileni ira mmuroromele Kiristu eto uuvahileni ira muharahariwe na mwasa wa Kiristu ira Kiristu ateteliwe muwari mwa nyo. 30Harahariwa uwa unazela muwari mwa nyo wanaga kondo imohive yadionana nyo miyo eto inadivwelana nyo tchineneva.#1:30 kondo imohive yadionana nyo miyo: Kondo yawana Pawulo yali ira atu ohomuroromela Yesu kavwe makalelo ovulusiwa eto atu omuroromela Yesu kalimbihiwe muwari mwa nroromelo newa.

Currently Selected:

Filipo 1: iLolo

Highlight

Copy