Markuji 10

Yesu ohowonga zela muselu omwalana

Matewuji 5:31-32, 19:1-12; Lukaji 16:18

1Yesu ohokumaga nimburo nenne, liye dowa ilambo ya Judeya ante kombela ya muhindje Jordawu. Atu oindjiva kohogumanaga akoka, valigi liye vale, liye oroma afundjihaga, nnga molemelela. 2AFarizewu kaligi evale, kofunafunaga muxixa Yesu, aliwa nfuka keraga: <<Kodi muwari mwa malamulo inowandeya mutu mulanya muhiyanaye?>> 3Liye ohawakula muwari mofuka eraga: <<Nnga nyo Mozeji auwandenleni avi?>> 4Evale aliwa kohowakulaga ira: <<Hiyo nlamulo na Mozeji nnaniwandela ira mutu afunaga mulanya muhiyanaye, unalremba dugumento anvahe muhiyanole, amala amurume adowege.>> 5Evale Yesu ohowonga eraga: <<Akala nyo mohonvwa Mozeji awongaga mazu anna, liye alrembele para nyo mwasiwa mohokana mirima dovanda. 6Mbwenye voroma vene, Mulugu apandutchaga wene jatene jene, amusakanyile mulombwana mmohi na muhiyana mmohi. 7Nona mulombwana unerege muhiya babaye na mmaye ira adowe ambande muhiyanaye, 8era eno, ambinlene anokala maningo mamohive bahi. Mwa eno, aliwa kinakala maningo menli, mbwenye maningo mamohive bahi. 9Nona kakalevo unafuna mwalaniha yenno Mulugu igumanihile liye.>>

10Kagawelenle vande, anamamuharaye kohonfuka zela muselu mmohive wenne. 11Evale Yesu ohowakula eraga: <<Mulombwana wenno unamwalana na muhiyanaye, amala adowa amutela muhiyana mmohiwa, unararuwa eto unamutegela ampudjaga muhiyanaye oromole. 12Eto muhiyana amwalana na mamunaye, adowa ateliwa na mulombwana mmohiwa, na liyene unararuwa.>>

Yesu ohareliha ahima

Matewuji 19:13-15; Lukaji 18:15-17

13Kohokalaga atu kaatukunle ahima, kaadowana valigi Yesu ira Yesu aahelege manda, aarelihe. Anamamuharaye eto kohoroma asumululaga aliba azana ahimale ira kahaafiyena evale. 14Mbwenye Yesu ohotakaleliwa, eraga: <<Mwahiye ahima kaze vali miyo, kamwakondihe. Mwasiwa Umwene wa Mulugu, annya ba atu okala nnga ha ahima anna. 15Miyo na ibaribari nnouwandelani ira mutu wenno ahanawatchele Umwene wa Mulugu mokala nnga mwana, liye kaza avolowa muUmweneni.>> 16Yesu agamanle wonga eno, ohatukulaga ahimale, aakumbarelaga, aahelaga manda, aarelihaga.

Muselu wa mulombwana mmohi orayela

Matewuji 19:16-30; Lukaji 18:18-30

17Yesu avenyihanaga ira adowege muulrendoni mwaye, ohokala mulombwana mmohi orayela atamangile za wa Yesu, liye mukokorela. Agamukokorenle, ohonfuka ira: <<Namafundjiha wapama, miyo ira dikayena ingumi yohomala, dire avi?>> 18Yesu mbwenye ohowakula ira: <<Kodi unadiirela nni wapama? Kalivo uli wapama ahali Mulugu bahi.>>#10:18 Kalivo uli wapama ahali Mulugu bahi. Yesu awongaga eno kahi ira aruniha ira: <<Miyo kadili Mulugu.>> Nari. So Yesu awonga eno ira amuxixe mutule. Mutule ahakayena ibaribari ogowakula ira: <<Miyo nnouirani wapama mwasiwa nyo muli Mulugu.>> Eto fwanyeya ira mutule amuirave: <<Namafundjiha.>> Ku wonga liye kaanna ibaribari zela Yesu. 19Evale Yesu ohomuwandelaga ira: <<We umala iziwa malamulo anowonga ira: <Kumpe mutu, kuraruwe, kube, kumunukede mutu, kumudjelre mutu, umurihedege babawo na mmawo.> >>#10:19 We umala iziwa malamulo: Yesu amuxixa mutu orayela ira amuone akala gu mutu oviyeviha owu mutu ovitukulela. Ahakale mutu owonga ibaribari, ogowonga ira: <<Miyo malamulo kannawanda. Nnga dire avi ira dileveleliwe zela jotega jaga?>> Tchoira malamulo kinalaba yengo yonivulusa hiyo atu oimwanana kwakwaneliheda malamulo. Nione Lukaji 18:9-14; Roma 3:19-22; Galasiya 3:9-12. 20Evale mulombwanole ohowonga ira: <<Namafundjiha, jatene ejo miyo nnoirana romela uzombweni waga.>> 21Yesu ohomuing'ana momuzivela, liye muwandela ira: <<Ihala yengo imohi ira wirena. Udowe wagulihe jatene jinna we, utukule kobiriwa waagawele aliba simela. Wairana eno, unokana rayela ilambo ya zulu. Wamala, uze udihare.>> 22Mbwenye liye agavwile mazwale, ohokalaga lohulo. Mwa enne ohokumagavo okumbanyene mwasiwa liye ali mutu orayela.

23Evale Yesu ohaing'ana anamamuharaye, liye kwi: <<Nnafuna duwandeleni, ili yorutcha ira mutu orayela avolowe muUmweneni mwa Mulugu!>> 24Evale anamamuharaye kagavwile mazu anne kohotikinaga.#10:24 anamamuharaye… kohotikinaga: Vavwile anamamuhara Yesu ira: ili yorutcha ira aliba nyindela jorayela kavolowe muUmweneni mwa Mulugu, kohotikiniheya mwasiwa aliwa kesaga: <<Ule urayenle ira arayele gu mutu orelihiwa na Mulugu.>> Yesu mbwenye kwi: <<Rayela kahi relihiwa na Mulugu eto rayela kahi volowa muUmweneni mwa Mulugu. Mofutukula, volowa muUmweneni mwa Mulugu wagali mutu orayela tchi yengo yorutcha yohokala ya masika.>> Akala ha yengo, aliba rayela oindjiva anapara va mulango na mwasa orayela wewa. Aliba rayela ti mbewu nnamorela vamingani. Nione Matewuji 13:22. Mbwenye Yesu ohowonga akoka eraga: <<Anaga, ili yorutcha ira aliba nyindela jorayela kavolowe muUmweneni mwa Mulugu. 25Tchoira ira kamelo axolre mopovowa mwa singano no ira mutu orayela avolowe muUmweneni mwa Mulugu, inarutcha tchoira mutu orayela avolowe muUmweneni mwa Mulugu.>> 26Vevale anamamuharaye kohotikiniheya valukulu, aliwa roma fukana oka oka keraga: <<Nnga era eno, unafuna vulusiwa bani?>> 27Evale Yesu ohaing'anaga aliwa, liye kwi: <<Mwa mutu ekave kinawandeya. Mbwenye na Mulugu kajirutchile. Tchoira na Mulugu jatene jinowandeya.>>

28Evale Peduru ohoroma wonga na Yesu ira: <<Kaing'anani! Hiyo nihiya jatene uharagani nyo.>> 29Yesu ohowakula eraga: <<Na ibaribari nnouwandelani ira mutu wenno unahiye nyumbaye, abalaye, arongoliye, mmaye, babaye, ahimaye, nari tereno yaye na mwasa wa miyo eto na mwasa olaleya Muselu Wapama, 30agalive mwilamboni muno unotambilra fendo 100 da nyumba, arongoliye, abalaye, mmaye, babaye, ahima, nari tereno, vamohi no harahariwa.#10:30 agalive mwilamboni muno unotambilra fendo 100 da nyumba… vamohi no harahariwa: Mazwala tapulela ira mutu mwilamboni ya vati ahiya jaye, adowa ilambo imohiwa zela laleya mazu a Mulugu unotambilra yengo yapama kwaranya jafuna liye kana vande vaye ahanavenyevo. Ku wonga hagalala na murendele unafuna liye kana muwari monvwelela Yesu unokwaranya fendo 100 hagalala na murendele wafuna liye kana muwari mohonvwelela. Eto masiki mwa japama jatene jinafuna liye kana, unokana harahariwa. Eto tempu inaza sogolro, unotambilra ingumi yohomala. 31Mwa eno, adjindji kali arandji peno va, anoza kakale ogomiheda eto adjindji kali ogomiheda peno va, anoza kakale arandji.>>

Yesu ohowelela wonga akoka zela kwa waye no venya waye mokwani

Matewuji 20:17-19; Lukaji 18:31-34

32Yesu vamohi na anamamuharaye kohogundeyaga muulrendoni mwewa kadowaga Jeruzalemu. Liye ali sogolro, anamamuharaye aliwa muharaga mundulri katikinaga. Kohokalawo eto atu amohiwa kaahara kaganna ova.#10:32 atu amohiwa kaahara kaganna ova: Muwari mwa mazwala, nivwile ira anamamuhara Yesu kohotikiniheya. Eto kohokalawo atu amohiwa kawenda mundulri mwa anamamuharaye ale. Atu anno kohokana ova. Masiki nahavwileve mwasiwa watikinela atu amohiwa eto amohiwa kaovaga, nafwanya Juwawu 11:8, nnowandeliwa ira anamamuharaye katikiniheya mwasiwa Yesu adowa Jeruzalemu mofuna mwaye. Tchoira Jeruzalemu ali wewo wafwanyeya atu kavenda jompa. Nona amohiwa tikiniheyaga, amohiwa ovaga. Eto fwanyeya ira ahaovile ali Yesu. Mwasiwa jafuna muireyela Jeruzalemu mwinnya ohomala iziwa eto alive orumelene ira aireyeliwe jatene muwari mokwakwaneliheda jofuna ja Mulugu. Evale Yesu ohaitanela anamamuharaye kumi na ambinli ale ikukuru imohi, liye roma wonga zela jejo jafuna muireyela eraga: 33<<Kavuruwanani pama! Hiyo eni ulrendola nnadowa Jeruzalemu. Nadowa wewule Mwana wa Mutu unoveleliwa mmandani mwa andimuwa a anamakuta, na anamafundjiha malamulo. Aliwa anomutonga ira apiwe eto anonvaheda mmandani mwa atu ohokala aJudewu. 34Atu ohokala aJudewu ale anompeta, kamutapele mare, kamuwaxule eto kamala, kampe. Eto akwa, siku naneraru unovenya mokwani.>>

Yovepa ya mulombwana Tiyagu na mbalaye Juwawu

Matewuji 20:20-28

35Jagaireyile enne, ana Zebedewu anno kafwanyeya kagali Tiyagu na Juwawu, kohofiya valigi Yesu, aliwa ira: <<Namafundjiha, nnafuna nuvepeni ira murumele niirela inafuna hiyo vepa.>> 36Yesu ohafuka eraga: <<Nyo munafuna miyo duireleni nni?>> 37Aliwa kohorumela keraga: <<Nera nuvepeni ira mwagarati mpando wenyu wa undimuwa unafuna nyo kana, munihiye ira mwa hiyo atu ambinli, mmohi agarati muwononi wenyu odjana, mmohiwa agarati muwononi wenyu oromana.>> 38Yesu mbwenye ohawakula eraga: <<Nyo inavepa nyo kamuiziwile. Kodi nyo munowanda ng'wa kopo ya goyi inafuna miyo ng'wa? Owu hehi kodi munowanda batiziwa mugoyini mwemo munafunela miyo batiziwa?>> 39Aliwa kohowonga atu kwi: <<He, nnowanda.>> Evale Yesu ohawandela eraga: <<Ng'wave, munong'wa kopo ya goyi inafuna miyo ng'wa. Eto batiziwave, munobatiziwa mugoyini nnga mwemo munafunela miyo batiziwa. 40Mbwenye ira dugaratiheni nfwaye muwononi waga odjana, nfwaye muwononi waga oromana, jejo mbwenye kahi miyo unafuna uvahani. So mipando dedo disakanyiwe ira kavahiwe ale kasakulriwe ira kagarativo.>>

41Evale anamamuhara afwiwa kumi ale kagavwile yovepa yenne, kohotakaleliwa zela Tiyagu na Juwawu. 42Vevale Yesu ohagumaniha anamamuharaye atene vamohi, liye ira: <<Nyo muhumala iziwa makalelo vinera andimuwa a atu a unde. Aliwa anovikaliha annya a atu anaatonga atu eto anoasogolrelra muwari mwa utongi. 43Mbwenye zela mwa nyo kamukale eno. Mofutukula, ule unafuna ira akale mundimuwa, akalege namalaba wa afwaye. 44Ule unafuna kala murandji, akalege muzari wa atu atene. 45Kalaga nnga Mwana wa Mutu. Mwana wa Mutu kazele ira atu kamulabege. Mbwenye uzele ira avahe ingumi yaye ira aawombole atu oindjiva.>>

Yesu ohonvulumutcha mutu ohoona eriwa Bartimewu

Matewuji 20:29-34; Lukaji 18:35-43

46Yesu na anamamuharaye kohofiya sidadi ya Jeriko. Kakumaga sidadile, kadowaga, ohokala mwindji wa atu oindjiva kamuhara. Evale ohokalaga mulombwana mmohi ohoona eriwa Bartimewu mwana Timewu, agaratilege mmambalo mwa ndila, avepaga kobiri. 47Liye agavwile ira Yesu wa Nazareti unavira, ohoromaga kuwa eraga: <<Yesu Mwana Davi,#10:47 Yesu Mwana Davi: Bartimewu amuitanaga Yesu Mwana Davi kahi ira liye esaga ambanle Yesu ali Davi, nari. Tchoira Davi ohokwa yaka didjindji dene Yesu ahanabaliwe. So mbwenye muwari mwa nzina na Mwana Davi, Bartimewu amuira Yesu Namatikeliwa. Tchoira wanle Mulugu ohomuwandela Davi ira: <<Namatikeliwa unabaliwa muwari mwa ahimawo a musogolro.>> Bartimewu amuira Yesu Namatikeliwa afuna baliwa muzizani mwa Davi nnga mwawongele Mulugu wanle. Zela ibaribari ira namatikeliwa afuna akumele muzizani mwa Davi nione 2 Samuweli 7:16; Jeremiya 23:5; Salmu 132:10-11; Joira ja Anamarumiwa 13:23; Juwawu 7:42. mudiwendele tangaranga.>> 48Evale Bartimewu akuwagave, kohokalavo atu adjindji karomile musumulula ira amiyale. Liye mbwenye kawanda miyaliheya. Okuwagave eraga: <<Mwana Davi, kadiwendeleni tangaranga miyo vano!>>

49Evale Yesu ohoimelaga, liye wonga ira: <<Kamuwandeleni wenno unadiitana uyo afiye uno.>> Atwale kohomuwandelaga keraga: <<Kavwa, kalimba kopolo, Yesu unauitana.>> 50Bartimewu agavwile enne, ohotatila kapa yaye, avenyaga mobaranya, adowaga waligi Yesu ule. 51Evale Yesu ohonfukaga ira: <<Unafuna ira miyo duirele nni?>> Evale maliba haona ule ohomuwakulaga Yesu eraga: <<Namafundjiha, miyo nnafuna nnga dagaonne.>> 52Yesu ohomuwandelaga ira: <<Tchiyege. Tchoira nroromelo nawo nuhuvulumutcha.>> Bartimewu ora imohive yenne ohoromaga ona, liye roma muharaga Yesu wayaga liye.

Currently Selected:

Markuji 10: iLolo

Highlight

Copy