Jozuwe 3
3
Mulugu ohoummiha mahindje a muhindje Jordawu ira aIzarayeli kavire
1Evale mulombwana Jozuwe ohovenyaga na mabebehene vamohi na Ana Izarayeli atene, aliwa kuma nimburo nafwanyeya atu Sitimi, aliwa dowa muhindje Jordawu. Mbwenye aliwa kahanalambuwe muhindje Jordawu, karomilege kunga misasa diwa mutcherelani mwa muhindje mule. 2Vagamanle malambo mararu, andimuwa a aIzarayeli kohoviraga vari va misasa da aIzarayeli kaarumaga atwale ira: 3<<Nyo mwaaona anamakuta anno anafwanyeya kagali aLevi kagatukunle Kaxa ya Yopangana ya Yehova Mulugu wenyu, na nyenne muvenye, murome ihara kaxele. 4Muwari moihara mule, kamusimbwege iwandamela kaxele. Lapela wa kaxele na nyo ukale wandamelana kilometuru imohi. Inafwanela mwaaharege anamakuta ale mwagali olapela wene ira muwandege ona ndila inadowege nyo. Tchoira ndila inavira nyo kamunababihege hara.>> 5Nomala eno, mulombwana Jozuwe ohowongaga na aIzarayeli eraga: <<Nyo atu atenene muvitchenihe, mwasiwa metchelo Yehova unoirana matikiniho vari va nyo.>>#3:5 muvitchenihe: Wanle aIzarayeli kohokana makalelo ovitcheniha kaiziwile atu. Mazu a Ezodu 19:14-15 anawonga ira muwari movitcheniha, kohofulra nguwo diwa, aliwa hamba eto mulombwana kagona na muhiyanaye siku neno.
6Mmetcheloni muwa mulombwana Jozuwe ohowongaga na anamakuta eraga: <<Katukulani Kaxa ya Yopangana ira mudowegena vasogolro va mulogo wa aIzarayeli.>> Mwa eno, anamakuta ale kohotukulaga Kaxa ya Yopangana ile, aliwa dowa kala vasogolro. 7Noira eno, Yehova ohowongaga na mulombwana Jozuwe eraga: <<Roma peno nnafuna duulukulihe vamentoni va aIzarayeli atene ira aliwa kaiziwe ira dili na weyo na makalelo nnga dali miyo na mulombwana Mozeji. 8Mwa eno, weyo waawandele anamakuta anno anatukula Kaxa ya Yopangana wire: <Mwafiya mutcherelani mwa muhindje Jordawu, mubwinihe manyalo ve, muimele mmahindjeni emule.> >>
9Nokuma evo Jozuwe ohowonga na Ana Izarayeli ira: <<Muze uno ira muvuruwane mazu a Yehova Mulugu wenyu.>> 10Evale aliwa kagazile, Jozuwe ohowonga ira: <<Jinafuna nyo ona peno jinalaba ira nyo muwande iziwa ira Mulugu Okalawo uli vamohi na nyo eto muwande iziwa ira na ibaribari liye unoatamangiha sogolro wenyu akuda Kana, aEti, aEvi, aFerizi, aJirigazi, aAmore na aJebuzi. 11Eni Kaxa ya Yopangana ya Yehova, Mwinnya wa ilambo yatene ya vati, inovolowa muhindje Jordawu, yagali sogolro wenyu. 12Mwaasakulre alombwana kumi na ambinli, a malogo kumi na menli a Izarayeli. Ku wonga kada nlogo akumegemo mulombwana mmohi. 13Anamakuta anno katukunle Kaxa ya Yopangana ya Yehova, Mwinnya wa ilambo yatene ya vati, tempu inanyingalege atu mmahindjeni a muhindje Jordawu, mahindjiwa anogwadeya vari na vari, kakale oimelene. Ku wonga mahindje anazelege nkumani anoimela, kakale vamohive.>>
14Mwa enne aIzarayeli kohovenyaga mmisasani mwiwa, aliwa dowaga ira kalambuwe muhindje Jordawu, anamakuta kagali vasogolro vewa kagatukunle Kaxa ya Yopangana, aIzarayeli atene kaaharaga mundulri muwa. 15Anamakuta katukunle Kaxa ya Yopangana kagafiyile muhindje Jordawu, kohonyingalihaga manyalo ewa mwiko mule. Tempu yenno kafwannye muhindje Jordawu atamangaga pama fiyeda kwaranya mwemo mwagomeletcha mahindje nnga vineretcha atu yafiya tempu yohanda. 16Mwa enne anamakuta ale kaganyingalihile manyalo ewa mwiko mule, mahindje matene a pandi ya nkumani kohogwadeyaga aliwa kala oimelene vamohive olapela wene na sidadi ya Ada, sidadi yenno inakala wandamelana sidadi ya Sarita. Eto mahindje a pedi uwa, kohodowa aliwa kutuleleya Ntiya na Araba neno nnaitaniwa eto Ntiya na Mwinnyu fiyeda aliwa mala umma. Mwa enne mulogo wa aIzarayeli koholambuwaga, kadowaga kombela ya ule, sogolro wa sidadi ya Jeriko. 17Fwanyeya ira tempu yalambuwa atu muhindje Jordawu, anamakuta katukunle Kaxa ya Yopangana ya Yehova ale kafwanyeya kagali oimelene jiwa pama vari na vari va muhindje vale voumma vene, fiyeda aIzarayeli atene aliwa mala lambuwa voumma vene.
Currently Selected:
Jozuwe 3: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
