Anamasogolrelra 6
6
Ana Izarayeli kohogondjihiwa na akuda Midiyani
1Mbwenye Ana Izarayeli kohosakanya jabure vamentoni va Yehova. Na mwasa wenno Yehova ohavaheda mmandani mwa akuda Midiyani fiyeda yaka tanu na mbinli. 2Akuda Midiyani kali a kopolo na owopiha akwaranya aIzarayeli. Mwa enne aIzarayeli ale na mwasa ozuzumihiwa bure na akuda Midiyani ale, kohodowa timba miliha mmwangoni vamohi na mmafukweni vamohi na mamburo olimba ira kawandege tawelamo. 3Tchoira tempu yavenya aIzarayeli kazalaga jozala jiwa, yafiya tempu yohanda, akuda Midiyani na akuda Amaleki vamohi na atu amohiwa a makumelo wa nzuwa kovenya aliwa za roma wanaga na aIzarayeli. 4Mwa enne koza, aliwa kunga misasa diwa, roma nongaga johanda jiwa fiyeda ilambo ya Gaza.#6:4 fiyeda ilambo ya Gaza: Akuda Midiyani kavolowa makumelo wa nzuwa wa aIzarayeli. (6:33) Gaza ali mavirelo a nzuwa. Ku wonga akuda Midiyani kononga ilambo ya Izarayeli wu pakana wu. Mwa enne aliwa tchaahiyeda aIzarayeli ale jodja ja vang'ono, nne mabila nne ng'ombe nne aburu. 5Mwasiwa kazaga ira kawane na aIzarayeli ale, kafiya vamohi na anavinyamiwene vamohi na misasa diwa dene. Aliwa kaza nnga miserebo didjindji dohowanda kontareya. Aliwa indjiva wewa tchawanda kontareya nne akamelo ewa indjiva uwa tchawanda kontareya. Mwa enne aliwa kafiya, kovolowa mwilamboni mwa Izarayeli mule ira katolotche jatene. 6Mwa enne aIzarayeli kohofiyeda simela valukulu na mwasa wa akuda Midiyani. Noira eno, aliwa koholobela wa Yehova monla ira aakamihede.
7Evale aIzarayeli kagalobenle wa Yehova monla na mwasa wa akuda Midiyani ale, 8Yehova ohomuruma namafiyiheda mmohi wa aIzarayeli. Namafiyiheda ule ohodowaga wonga na aIzarayeli eraga: <<Yehova Mulugu wa Izarayeli unawonga ira: <Miyo duhusogolrelani kuma ilambo ya Ijipitu eto duhukumihani muuzarini mwafwanyeya nyo 9eto duhuvunelani mmandani mwa akuda Ijipitu vamohi na mmandani mwa amwidaninyu atene anno kauzuzumihani. Eto dihiatamangiha vasogolro venyu, miyo tukula ilambo yewa uvahani nyo. 10Evale miyo dohouwandelani ira: Miyo dili Yehova Mulugu wenyu. Kamwaahare amilugu a aAmore anafwanyeya ilambo yenno ili nyo. Mbwenye dagauwandenleni enne, kamwafunne divwa.> >>
Mungelro wa Yehova ohoza wonga na mulombwana Jideyawu
11Siku nimohi Mungelro wa Yehova ohozaga liye garati vati va mutengo wa karvaliyo unafwanyeya ilambo ya Ofara, wenno ali mutengo wa mulombwana Jowasi nkuda Abiyezeri. Eto tempu yenno mwanaye Jideyawu afwanyeya abubudaga tirigu nimburo nonyingalela uva. Liye airana mozemba tawiha ira akuda Midiyani ananfwanye, kamuwake. 12Evale Mungelro wa Yehova ohomutwanyuwelaga, liye wonga eraga: <<Yehova uli na weyo, we mulombwana wa kopolo owanda wana kondo!>> 13Mbwenye Jideyawu ohowakulaga eraga: <<Pepani andimuwa! Akala Yehova uli vamohi na hiyo, nnga mwasiwa gwa nni ubure watene wenna akala na hiyo? Nnga kodi jigomenle waani jotikiniha jatene janiwandeletcha ababihu keraga: <Yehova ohonikumiha ilambo ya Ijipitu.>? Mbwenye peno Yehova uhuninyanyala eto uhunivaheda mmandani mwa akuda Midiyani.>> 14Evale Yehova ohomuing'ana mulombwana Jideyawu, liye muwandela eraga: <<Kavenya na kopolo dinna we, udowe waavunele aIzarayeli mmandani mwa akuda Midiyani. Unauruma gu miyo Yehova.>> 15Evale liye ohowakula eraga: <<Pepani andimuwa, kodi miyo nnafuna didowe daavunele aIzarayeli na makalelo bavi? Kaing'anani, tchoira miyo abalaga ba atu osimbwetchetcha simela muwari mwa nlogo na Manasesi eto miyo nnafwanyeya dagali mwana ogomiheda vande va babaga.>> 16Mbwenye Yehova ohomuwakulaga eraga: <<Miyo mbwenye nnokala na weyo. Weyo wadowa, unoaporotcha akuda Midiyani kalaga nnga atene gu mutu mmohi bahi.>> 17Evale Jideyawu ohowongaga na Yehova eraga: <<Akala munodifwewela murima, nnavepa ira mudivahe ionihedo yooniha ira nyo munawonga na miyo muli Yehova. 18Nnouvepani ira mwahakumevo veva vinafwanyeya nyo, miyo nnafuna dibabihe dowa vande ira dizena yovelela wa nyo, dihiye vamentoni venyu.>> Evale Yehova ohomuwakulaga eraga: <<Miyo nnerege udediha eva ante weyo ufiyede welawo.>>
19Mwa enne Jideyawu ohodowaga vande, liye pa mwana mbuzi imohi, mala sakanyeda pama eto ohotukulaga kilu kumi da utu, liye wotcha mabolu ohosakanyiwana leverina. Ohotukulaga nyama ya mbuzi ile, liye hela mmutangani, musuzuwa liye hela mpanelani. Liye tukula jatene ejile, dowana ante vamutengoni wa karvaliyo vevo vafwanyeya mungelro ule, liye za hiya vamentoni vaye. 20Mbwenye mungelro wa Mulugu ule ohomuwandelaga eraga: <<Katukula nyameyo vamohi na mabolu ohoheliwa leverina ayo, uhele vazulu va nibwe ni, amala ukutulele musuzuwa vazulu viwa.>> Evale Jideyawu ohoirana. 21Evale Mungelro wa Yehova ule ohovenyihaga imiri yafwanyeya mmandani mwaye, magomo wa imirile liye sakwinyana nyama na mabolu ohosakanyiwana leverina jafwanyeya vanibweni vale. Agairile enne, ohokuma munlo vanibweni vale, mala jiha nyamele vamohi na mabolu ohoheliwa leverina ale. Noira enne Mungelro wa Yehova ule ohodimelagavo vamentoni va Jideyawu. 22Evale Jideyawu ohoona ira na ibaribari ali Mungelro wa Yehova azile awongaga na liye. Mwa enne Jideyawu ohowongaga eraga: <<Dihikwa miyo, so Nabwiya Yehova! Mwasiwa dihimuona Mungelro wa Yehova kove na kove!>> 23Mbwenye Yehova ohomuwandelaga eraga: <<Murendele akale na weyo! Kuove! Weyo kunakwa.>> 24Noira enne Jideyawu ohommangelaga Yehova ibuwa nimburo nenne. Ohovaha ibuwele nzina noira Yehova gu Murendele. Ante fiyeda siku na peno ibuwele inafwanyeya Ofara wewule sidadi ya akuda Abiyezeri.
25Siku nimohive nenne mahiyuni uwa, Yehova ohomuwandelaga Jideyawu eraga: <<Utukule ng'ombe ya mulombwana ya babawo, yenno inafwanyeya yagali ng'ombe yanembinli inna yaka tanu na mbinli, udowe wabwanyule ibuwa ya Baali, yenno inafwanyeya yagali ibuwa ya babawo eto ugwade nimbozo na mulugu Azera neno nnafwanyeya wandamelana vaibuwani vale. 26Eto uze ummangele ibuwa Yehova Mulugu wawo vazulu va mwango va. Ibuwiwa ikale yomangiwa na mabwe otandiwa pama. Wamala eno, utukule ng'ombe yanembinli ile, uvelele mukuto otumeya, utumeye na kuni nnafuna kuma nimbozo na mulugu Azera neno nnafuna we gwada.>> 27Evale mulombwana Jideyawu ohatukulaga alombwana kumi muwari mwa anamalabaye, liye dowa irana jatene nnga mwemo mwawongele Yehova. Mbwenye na mwasa oaova atu a vande va babaye vamohi na atu a sidadile, jatene ejo liye airilena na mahiyu, hiya irana na ntana.
28Mwa enne alombwana a sidadile kagavenyile na mabebehene, kafwanyilege ibuwa ya Baali yagabwanyuwile eto nimbozo na mulugu wewa Azera neno nafwanyeya wandamelana vaibuwani vale nagagwadiwile eto ng'ombe yanembinli ile yagaveleliwe mukuto vazulu va ibuwa ixa yenno yamangiwe. 29Evale aliwa kagaonne enne, kohoromaga wonga mmohi na nfwaye keraga: <<Kodi bani uirilena jeji?>> Mwa enne aliwa kagafuketchetche pama, kohowandeliwaga ira: <<Uirilena eji gu Jideyawu mwana Jowasi.>> 30Evale alombwana a sidadile kohowongaga na mulombwana Jowasi keraga: <<Kamukumihede unde mwanawo ira nimpe, mwasiwa uhubwanyula ibuwa ya Baali eto uhugwada nimbozo na mulugu wehu Azera neno nafwanyeya wandamelana vaibuwani vale.>> 31Mbwenye Jowasi ohawandelaga atu atene kazile kawongaga mazwale, liye ira: <<Kodi nyo munafuna muwane vamalroni va Baali? Nyo munafuna ira munvunele? Miyo nnafuna duwandeleni ira mutu wenne unafune jokangana vamalroni va Baali, mabebehi a peno eva eni unagomela piwa. Akala Baali gu mulugu, avivunele liyene mwinnya. Mwasiwa kohobwanyula ibuwa yaye.>> 32Na mwasa wenno siku nenne kohoroma muitana Jideyawu na nzina na Jerubaali, ku wonga ira: <<Baali akangane na liye.>> Kawongela eno mwasiwa Jideyawu ohobwanyula ibuwa ya Baali.
33Eto akuda Midiyani atene na akuda Amaleki vamohi na atu a makumelo wa nzuwa owanda wana kohogumanelaga vamohi, aliwa lambuwa muhindje Jordawu, dowa manga misasa diwa ndabo na Jezereli. 34Mwa enne Munemba wa Yehova ohomuzelaga mulombwana Jideyawu. Evale liye ohoimbaga palraza ira atu kagumane. Evale akuda Abiyezeri atene kohogumanela, aliwa roma muhara liye. 35Eto liye oharumagana atu milanyo muwari mwa nlogo natene na Manasesi, na aliwene kogumanela, roma muhara Jideyawu. Eto ohorumihaga milanyo wa nlogo na Azeri, Zebuloni, vamohi na Nafitali, atene aliwa dowa gumana na liye.
36Mwa enne Jideyawu ohowongaga wa Mulugu eraga: <<Akala na ibaribari munafuna mwaavunele aIzarayeli muwari mwa ndanda naga nnga muwongele nyo, nnafuna jiireye eni. 37Miyo nnafuna ditukule mawoya a nibila, dihele nimburo nobubudavo jalo. Mwa enne dagamanle irana eno, ningame nakala vamawoyani bahi, mbwenye mmambalo mwa mawoya ala, teya yatene ikala yoummene, era eno, miyo nnowanda kana ibaribari ira nyo munafuna mwaavunele aIzarayeli muwari mwa miyo nnga muwongele nyo.>> 38Mwa enne johoireya. Mmetcheloni muwa Jideyawu agavenyile na mabebehene ohodowaga, liye kamulra mawoyale. Evale agakamulrile, mahindjiwa kohozalaga mwana tijela. 39Evale mulombwana Jideyawu ohowongaga na Mulugu eraga: <<Pepani, Yehova kamutakaleliwe na makalelo ohokala a masika zela miyo, mwasiwa nnafuna diwongeve akoka fendo yenna bahi. Nnauvepani fendo yenna bahi ira mudikanihe ibaribari muwari mwa mawoyala. Nnauvepani ira fendo ila vamawoyani vikale voumma, mbwenye mmambalo mwa mawoyala teya yatene ikayena ningame.>> 40Evale mahiyu anne Mulugu ohoirana nnga mwemo mwavepile Jideyawu. Unde wagatchile ningame nafwanyeya mmambalo mwa mawoyale. Mbwenye vamawoyani vale, mawoya matene kafwanyeyaga oummene.
Currently Selected:
Anamasogolrelra 6: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
