Anamasogolrelra 4
4
Mwene Jabimi ohazuzumiha Ana Izarayeli
1Mbwenye mulombwana Ewudi agakwile, Ana Izarayeli kohowelelave sakanya jabure vamentoni va Yehova. 2Evale Yehova ohavaheda mmandani mwa mulombwana mmohi aitaniwa Jabimi mwene wa Kana, atonga sidadi ya Azori. Liye eto ohomukana musogolrelri waye wa anyakondo aitaniwa Sizera, wenno akaletcha sidadi ya Harozeti-Hagoyimi. 3Mwa malambo anne Ana Izarayeli koholobelaga wa Yehova monla, tchoira mulombwana Jabimi ohokana aaterelado a momba a kondoni okwakwana 900 eto liye ohazuzumiha Ana Izarayeli mwa uwali yaka makumenli.
Yehova ohavunela Ana Izarayeli muwari mwa Debora na Baraki
4Eto mwa tempu yenne aasogolrelra aIzarayeli ali muhiyana mmohi aitaniwa Debora mwadi Lapidoti. Muhiyanole eto afwanyeya agali namafiyiheda wa Mulugu. 5Liye ohokana nimburo eni vagaratetcha liye vati va munazi mmohi aitaniwa munazi wa Debora, vari va Rama na Beteli, mmwangoni mwa Efarayimi. Eto mwa tempu yenne Ana Izarayeli kodowetcha wa liye ira katongiwe milandu diwa.
6Siku nimohi liye ohomuitaniha mulombwana Baraki mwana Abinowawu wa ilambo ya Kedeji mwilamboni mwa Nafitali. Agazile, ohomuwandela liye ira: <<Yehova Mulugu wa Izarayeli unawonga ira: <Udowe waagumanihe alombwana 10.000 a nlogo na Nafitali na nlogo na Zebuloni, mumaruwe mudowe ante mwango Tabori. 7Era eno miyo dagali Yehova nnomuziha wa weyo mulombwana Sizera mundimuwa wa anyakondo a mulombwana Jabimi vamohi na aaterelado aye vamohi na anyakondo aye. Atene anno anoza kawane na weyo pandi ya mwana muhindje wa Kizomi ira atenene daavahede mmandani mwawo.> >> 8Evale mulombwana Baraki ohomuwakula eraga: <<Nyo mwarumela dowa vamohi na miyo, kadinna makani nnoyawo. Mbwenye nyo mwakonda dowa na miyo, kannayawo.>> 9Evale Debora ule ohowakula eraga: <<Na ibaribari miyo nnodowa vamohi na weyo. So mbwenye inafwanela uiziwe ira na mwasa wa makalelo anna we, undimuwa ogondjiha kunakala wawo, tchoira Yehova unafuna anivahede Sizera muwari mwa muhiyana mmohi eni.>> Mwa enne Debora ohovenyihanaga na Baraki, aliwa dowaga Kedeji. 10Noira enne Baraki ohaitana alombwana atene a Zebuloni na a Nafitali ira kagumane ilambo ya Kedeji. Noira eno, ohovenyihanaga adowaga vamohi na alombwana 10.000, liye kala vasogolro, atene anne aliwa muharaga mundulri mwaye. Eto Debora ohodowa vamohi na liye.
11Fwanyeya ira tempu yenne ohokalawo mulombwana mmohi aitaniwa Eberi nkuda Keni, wenno aahiyile aKeni afwaye anno kali ahima a mulombwana Hobabe, Mozeji moyaye.#4:11 Mozeji moyaye owu hehi: Mozeji mulamwaye Ibaribariwa eva kinaiziweya pama. So afwase inakala nnga mutu moyaye akwa, vamohi viwa mulamwaye unosanduwa kala moyaye. Liye agaahiyile, ohoroma manga misasa daye asusihagave fiyeda mutengo wa karvaliyo wenno afwanyeya Zananimi, wandamelana Kedeji.
12Mwa enne mulombwana Sizera ohowandeliwa ira: <<Eni Baraki mwana Abinowawu uhudowa mwangoni wa Tabori.>> 13Sizera agavwile enne, ohagumaniha aaterelado aye a kondoni 900 a momba ale, vamohi na atu atene kafwanyeya vamohi na liye, aliwa kuma Harozeti-Hagoyimi ante aliwa dowa mwana muhindje wa Kizomi. 14Evale Debora ohowongaga na mulombwana Baraki, liye ira: <<Kavenya! Tchoira peno ti siku Yehova uuvahedile liye mmandani mwawo mulombwana Sizera. Eto Yehova unafwanyeya vasogolro vawo.>> Mwa enne Baraki ohokumaga mwango Tabori ule vamohi na atu 10.000 anno kamuhara mundulri mwaye. 15Evale Yehova ohodowa vasogolro va Baraki amugondjihaga Sizera na aaterelado aye a kondoni vamohi na anyakondo aye atene muwari mwa masupada a aIzarayeli. Eto Sizera ohotitagamo muatereladoni mwaye, liye tawa na mendo. 16Evale Baraki ohoromaga ahara alombwana kawendiha aaterelado ale vamohi na anyakondo atene a Sizera ante Harozeti-Hagoyimi. Mwa enne aIzarayeli kohapaga anyakondo atene a Sizera na masupada, nne mutu mmohi kahanle.
Jayeli mwadi Eberi ohompa mulombwana Sizera
17Mbwenye mulombwana Sizera ohotamangaga na mendo, liye fiya vamusasani va Jayeli mwadi Eberi, nkuda Keni. Tchoira mulombwana Jabimi, mwene wa Azori vamohi na atu a mulombwana Eberi nkuda Keni kohowandana. 18Noira enne muhiyanole Jayeli ohodowaga nfwanya Sizera, liye ira: <<Peruwani mbwiyeni! Kaperuwani muvolowe mmusasani mwaga mu! Kamuove!>> Evale mulombwana Sizera ohoperuwa, liye volowa mmusasani mwa muhiyanole. Muhiyanole ohomukunelaga na yokunelana eni. 19Noira enne Sizera ohowongaga na muhiyanole ira: <<Pepani nnauvepa ira udivahe mahindje a vang'onove ding'we. Mwasiwa dihisimbwa kana ntona.>> Evale muhiyanole ohodowaga, liye hula kantilu mwafwanyeya mukaka, liye nvaha Sizera, liye ng'wa. Agang'wile, ohonkunelaga akoka. 20Noira enne Sizera ohowongaga na muhiyanole ira: <<Kadowa wakale unde wa musasa, va mulango. Akalavo mutu, aza fuka ira: <Mmba mu muhukala mutu?>, umuwakule ira: <Nari!> >> 21Noira enne Sizera agazaleliwe kove dohokala da masika na mwasa owaheya bure, agonaga, muhiyanole Jayeli mwadi Eberi ohotukulaga peregu yolapa eni ya musasa#4:21 peregu… ya musasa inawongiwa tchi peregu ilukulu ya momba yakomela atu vati ira kamangihevo mingohi da musasa ule ira awande imela. vamohi na martelo. Noira enne ohovenyaga mozemba, liye dowa vafwanyeya Sizera, liye mukomelana vazulu va nibaru, vayela muwamba muru waye vati vevo vagonantilege liye agonaga. Mwa enne mulombwana Sizera ohokwa.
22Mwa enne Baraki adowagave enne amuharaga mulombwana Sizera, muhiyanole Jayeli ohodowaga nfwanya, liye muwandela eraga: <<Ndowemo dauonihe mulombwana wenno unanvenda we!>> Evale mulombwana Baraki agamuharile, agavolowile mmusasani mule, anfwanyile mulombwana Sizera agakwile, agawambeyile na peregu ya musasa vazulu va nibaru. 23Mwa enne siku nenne Mulugu ohomunyaswiha mulombwana Jabimi mwene wa Kana vamentoni va aIzarayeli. 24Eto Ana Izarayeli ale kohokalelave wana na Jabimi mwene wa Kana ule, ante aliwa fiyeda mutolotcha.
Currently Selected:
Anamasogolrelra 4: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral