Izaiya 19

Mulugu unoza aanonge akuda Ijipitu

1Ula gu muselu owonga zela Ijipitu. Kaing'anani, Yehova ugwela vamuramboni otamanga, unadowa Ijipitu. Vikwamutu josema jinoza jingurumele vamentoni va Yehova. Eto aIjipitu annyiwa mirima diwa nnoza dinyungulruwe muwari moova. 2Yehova unawonga ira: <<Miyo nnoza disakanye ira aIjipitu kawane oka oka. Mutu na mbalaye anerege wana okave. Mutu na mwandamanaye anerege wana mukalele atu. Sidadi inerege wana na sidadi imohiwa. Eto umwene unerege wana na umwene umohiwa. 3AIjipitu anokala lohulo. Nnoza dinonge zelru diwa. Evale anodowa kavepege zelru vikwamutu josema na aliba lowa, na aliba manyanga vamohi na aliba tapanya na azimu. 4Nnoza daatukule aIjipitu, daavahede mmandani mwa namatonga wa uwali, eto mwene owopiha gunafuna atongaga.>> Unawonga eno gu Nabwiya Yehova wa Makuru Matene.

5Mahindje a bara anoza kaumme, eto muhindje Nilu unofiyeda umma duduru. 6Mihindje diwa dotimba nnerege nuka, eto mihindje datene dodemulelamo nnomala umma, mirere na ulrulru jinomala nyalamo. 7Eto jomela jatene jili mmambalo mwa Nilu ante vanakutulela liye jinoza jikwe. Jatene jozaliwa mmambalo mwa Nilu jinoza jiumme, jiveveruwe, fiyeda jahaoneyege akoka. 8Aliba pa somba anoza kanle no tomola kuto, vamohi na atene omeza na imezo muhindje Nilu. Aliba godomula anoza kakale okukumuwene. 9Atu osakanya usalru wapama eto aliba sakanya nguwo yotchena ya ntondje anoza kakale lohulo. 10Amesilri osakanya nguwo anoza kafinyiwe, eto anyaganyo anokala okumbanyene.

11Andimuwa a sidadi ya Zowani ba azimora. Anamawelruza a toto a Farawu anawelruza johokana mabasa. Kodi munawanda avi muwandela Farawu ira: <<Miyo dili mwana mmohi wa aliba zelru, dili mwana wa amwene a wanle.>> 12Weyo Farawu aliba zelru awo kali uvi? Akala anowanda onelramo, kaze kauwandele ejo Yehova wa Makuru Matene unafuna liye airela aIjipitu muwari moatonga. 13Andimuwa a sidadi ya Zowani ba azimora. Andimuwa a Menfisi kohomala vinyenga. Anno anafwanyeya kagali asogolrelri a aIjipitu kohomala agwagwadutcha atu anakala mwilamboni mwiwa. 14Yehova unomala aviringaniha aIjipitu, aliwa anawendege zagi zagi muwari mwa mabasa matene, nnga namalrezelra ateredeyaga vamaraveyoni vaye. 15Kalivo muwari mwa aIjipitu unafuna irana yengo. Nne orayela nne osimela nne aliba vweya nne mutu wa burebure, kalivo unafuna irana yengo.

16Siku neno aIjipitu anoza kakale nnga ahiyana. Anerege ngurumela muwari moova mwasiwa Yehova wa Makuru Matene unotapula ndanda naye aalangaga aIjipitu. 17Atu a ilambo ya Juda anerege atutcha aIjipitu. Eto akuda Ijipitu kavwa ja akuda Juda anerege rendjeya na mwasa wa jengo jabure Yehova wa Makuru Matene unafuna liye airela muwari mwa akuda Juda.

Yehova unoza aavulumutche atu ohala a Ijipitu

18Siku nenne ilambo ya Ijipitu nnoza dioneye sidadi tanu nnafuna wongaga iwongelo ya akuda Kana. Eto atu anno anerege lumbela na nzina na Yehova wa Makuru Matene. Muwari mwa sidadi dedo, sidadi imohi inaitaniwege Sidadi ya Nzuwa.

19Siku nenne muwari mwa ilambo ya Ijipitu munoza mukale ibuwa ya Yehova. Wandamelana madilre anoza kaimetche nibwe ira kamuumbuwele Yehova. 20Ejo jinoza jikale jionihedo eto jinoza jikale umboni ooniheda ira Yehova wa Makuru Matene ukalamo muwari mwa ilambo ya Ijipitu. AIjipitu anonla wa Yehova zela ale anaaoniha goyi. Liye unomuruma Namawombola mmohi, wenno unafwanyeya agali namaabarela unafuna avunela. 21Yehova unoza aviiziweyihe vamentoni va aIjipitu eto aIjipitu anoza kamuiziwe Yehova siku neno. Anerege mulobela Yehova eto anerege velela mikuto na jovelela jimohi jiwa eto anerege lumbela no kwakwaneliheda jolumbela jinalumbelege atu wa Yehova. 22Yehova unoza aalange aIjipitu. Unoalanga eto unoavulumutcha. Aliwa anoza karungunuwele wa Yehova eto Yehova unoza avwe jovepa jewa ira kawendeliwe tangaranga eto unoavulumutcha.

23Siku nenne unoza ukale rampa nlukulu nokumela Ijipitu ante Asiriya. Akuda Asiriya anerege awendela aIjipitu eto aIjipitu anerege awendela akuda Asiriya. Pa evo vanafuna akuda Ijipitu na akuda Asiriya lobela vamohi.

24Siku neno aIzarayeli anoza kakale vamohi na aIjipitu na akuda Asiriya. Pa evo vanafuna vilambo taru di dikale mareliho para ilambo yatene. 25Yehova wa Makuru Matene unoza aarelihe eraga: <<Orelihiwa gu nyo atwaga akuda Ijipitu. Orelihiwa gu nyo akuda Asiriya muli mabasa a manda aga. Orelihiwa gu nyo aIzarayeli muli yotambilra yaga.>>#19:25 Orelihiwa gu nyo atwaga akuda Ijipitu. Fwanyeya ira Mulugu agamanle wonga mazu madjindji owopiha zela aIjipitu, liye ohowonga mazu apama. Ku wonga Mulugu unowanda asakulramo atu anaafuna liye muwari mwa malogo matene ira kakale atwaye. Nione Jenesesi 12:2; Roma 9:23-26.

Currently Selected:

Izaiya 19: iLolo

Highlight

Copy