Izaiya 14

Kuma wa aIzarayeli muuzarini mwewa

1Tchoira Yehova unoza aawendele tangaranga akuda Jako. Unoza aasakulre akoka aIzarayeli, unoza aakunge ira kakale mwilamboni mwewa akoka eto atu a unde anoza kavigumanihe na aliwa ira kakalege vamohi na akuda Jako. 2Atu a malogo amohi anerege avelela aIzarayeli ilambo yenno Yehova yaavahile liye. Atu a malogo ale, roma alombwana na ahiyana anerege alabela aIzarayeli wewo. AIzarayeli anerege ahinda atu anne kaahindetcha wanle kaairaga azari ira na aliwene kakale azari ewa eto anerege atonga atu anne kaaonihetcha goyi.

3Yehova unoza auvumiheni zela goyi na makatamiho anaona nyo eto unoza auvumiheni zela mabasa malukulu anaulabihani atu. 4Jaireya eno, munerege mululuviha mwene wa Babiloniya mwiraga: <<Namaoniha goyi we, jawo jihimala. Utongi wawo orutcha uhumala. 5Yehova umala kotola iwaxuwaxu ya atu otakala na ikumbuzo ya umwene ya aliba tonga. 6Aliwa keretcha aoniha goyi malogo a atu. Na uwali wewa aliwa keretcha akoma atu mohohiyededa. Keretcha atonga malogo mwa uwali, eto keretcha aoniha goyi mohohiyededa. 7Ilambo yatene ya vati ihivuma, peno ihikana murendele. Atu atene anaimba mohagalala. 8Mitengo da faya nnahagalala zela gwa wa Babiloniya. Eto mitengo da seduru da Libano nnawonga ira: <Roma vatitihiwe mwene wa Babiloniya, kalivo maliba viga mmohi uzile ira anigwade hiyo.> >>

9<<Nimburo na anokwa nilive nohuleya nene, ira nuwatchele we mwene wa Babiloniya wazaga. Nimburo na anokwa nihimala venyiha minemba da atu okwa, ira dulondjele weyo. Nimburo na anokwa nihimala venyiha minemba da atu kasogolrelretcha ilambo ya vati, nihimala aimeliha mmipandoni da umwene, atene kafwanyeya kagali amwene a malogo a atu. 10Atene anno anoza kawonge na weyo ira: <Na wenne eto umala kopolo nnga hiyo? Peno nihimala kwakwanela. 11Undimuwa wawo umala tatileliwa Nimburo na Anokwa, vamohi na nyumbo da lira daimbetcha we. Kamawo peno ba mapwihi. Yovikunelana yawo ba anamingu.> >>

12<<We Nikoroxo, nyenyedi ya mabebehi, umala gwa kumela zulu. Umala gwihediwa vati, we wagondjihetcha malogo a atu. 13Weyo wawongetcha na mmirimani mwawo ira: <Nnafuna digwele zulu, dagarati mpando waga wa umwene vazulu va nyenyedi da Mulugu. Nnoza dikale vampandoni zulu. Nnoza digarati mwangoni unagumana anamwindji, pandi ya norti. 14Nnoza digwele vazulu va mirambo. Nnoza dilinganege na Wenno Ukwarannye Jatene.> >>#14:13-14 Afwase mwene wa Babiloniya awongaga ira: Nnoza digarati mwangoni unagumana anamwindji, anamwindji aumbuwela liye ali amilugu amohiwa kahara atu tempu yenno. Eto awongaga ira: Nnoza dilinganege na Wenno Ukwarannye Jatene, zelru da mwene wa Babiloniya ali nnga zelru da Satana wenno akondile tongiwa na Mulugu.

15<<Mbwenye weyo umala titihediwa Nimburo na Anokwa, vati vati magomelo wa muliha. 16Atu anafuna uona anouing'ana pama do do do, kaumbuwelaga ira: <Kahi liyene arendjetcha ilambo ya vati, angurumelihaga maumwene? 17Kahi liyene asandutcha ilambo ira ikale kokola eto kahi liyene agwiha sidadi? Eto liye karumela ira atu aahinda liye kawelele waniwa.> >>

18<<Amwene atene a malogo a atu anagona mwa undimuwa wewa, kada mutu uli masiye aye aye. 19Mbwenye weyo umala tatileliwa olapela wene na masiyeni wawo nnga tambi yovunda. Mutembo wawo umala kuneliwa na mitembo da ale kalatiwe na masupada, aliwa ponyediwa mmulihani muli mabwe pwi. Unoza ukale nnga mutembo onyingaliwa.

20<<Kuza ukoyiwa masiye wakoyiwe andimuwa afwawo. Mwasiwa weyo umala nonga ilambo yawo, umala apa atwawo. Atu oirana jabure azuliwa kiumbuweliwegeve akoka! 21Mukozeye ira mwaape ahima a alombwana a mwene uyo, na mwasa wa yotega ya ababiwa, tawiha ira anoza kavenye, kakale annya mwilamboni, kazale ilambo ya vati na sidadi diwa.>>

22Yehova wa Makuru Matene unawonga ira: <<Nnoza divenyihe kondo na sidadi ya Babiloniya. Nnoza dimalihe nzina na Babiloniya mwilamboni ya vati eto nnoza daamalihe atene kahanlemo. Kiza kavulumuwa ahima nne vizulu. Unawonga gu Yehova. 23Sidadi yenno inoza ikale anasunungu waniwa eto nnoza disandutche sidadi yenno ira ikale ndabo nokana matiya a mahindje. Nnoza dijele na mujelo, ditolotche jatene johala. Unawonga gu miyo Yehova wa Makuru Matene.>>#14:23 Nnoza dijele na mujelo, ditolotche jatene johala. Izaiya alrembaga, kohokalawo malogo a kopolo akwaranya aIzarayeli. Mbwenye Mulugu muwari mwa Izaiya ohaumbutcheda aIzarayeli ira kaiziwe ira Mulugu gunaawendiha atu atene a mwilamboni ya vati eto unoza amalihe kopolo diwa. Nione Daniyeli 2:21, 4:17, 4:32, 5:21.

Mulugu unoza aanonge akuda Asiriya

24Yehova wa Makuru Matene ulumbela ira: <<Nnga muumbuwenle miyo, nnoza diirena eno. Nnga mwemo mufunne miyo, inoza iireye eno. 25Nnoza daanonge akuda Asiriya mwilamboni mwaga. Nnoza daanyingalele vamwangoni vaga. Pa evale vanafuna miyo awungula atwaga nigologolo neno naawarihile akuda Asiriya. Nnoza daakumihedemo mitolro diwa donyemela nnafwanyeya mmafudini mwewa. 26Palano dihenle miyo para atu atene a ilambo ya vati tchi ila. Dihimala tapula ndanda naga ira daaonihe goyi atu a malogo matene.>> 27Tchoira Yehova wa Makuru Matene gufunne ira jeji jiireye. Nnga bani unawanda muhiyiha? Ndanda naye nili notapula nene. Nnga bani unafuna niwelihawo ndanda no?

Mulugu unoza aanonge akuda Filistewu

28Ula gu muselu uzile yaka mwene Akazi akwile liye: 29<<Nyo akuda Filistewu atene kamuhagalale mwaona kotoliwa wa akuda Asiriya anno kali golromondo youkomani. Tchoira nyowa yoroma yagadowile, muwari mwa nyowa yoromele inoza ize nyowa yowopiha kwaranya yoroma.#14:29 Mulugu ohowonga na aFilistewu ira: kamuhagalale mwaona kotoliwa wa akuda Asiriya tchoira inoza ize nyowa yowopiha kwaranya yoroma. Ora yenno Asiriya koaoniha aFilistewu goyi. Mbwenye mundulri mwewa kohokalawo atu amohiwa kafuna kaaonihe goyi kwaranya goyi yoroma yanna atu. Nyowa yenno inokala yokuka eto ya munlo. 30Murandji baliwa wa atu osimela unoza akayena jodja, eto atu ohaleliwa jengo anoza kagone mwa murendele. Mbwenye nlogo na nyo aFilistewu munoza munongiwe na ndala. Eto ale anafuna hala, miyo nnoapa. 31Tomolani kuto nyo munakala vamulangoni. Nyo aFilistewu atene rendjeyani moova. Tchoira ukalawo utchi unaoneya tolroo akumelaga pandi ya norti. Zela anyakondo anno, kalivo unafuna hala mundulri.>>

32Nnafuna dize daawakule avi aliba milanyo a nlogo nimohi niwa? Nnoza diwonge ira: <<Yehova umala garatiha na wanle Siyawu. Tchi sidadi anafuna tawelamo atwaye kaonihiwe goyi.>>#14:32 Tchi sidadi anafuna vumelamo atwaye kaonihiwe goyi. Ku wonga agali akuda Asiriya na aFilistewu kafuna kotoliwa na Mulugu, aIzarayeli mbwenye kohokana yoing'anela ira kavulumuwe.

Currently Selected:

Izaiya 14: iLolo

Highlight

Copy

Compare