Izaiya 1

Mangiwa mulandu wa akuda Juda

1Ala ba mazu Mulugu amuonihile liye Izaiya mwana Amoji owonga zela sidadi ya Jeruzalemu vamohi na ilambo ya Juda malambo katonga amwene a Juda ala: Uziya, Jotawu, Akazi na Ezekiya.#1:1 Zela Uziya, nione 2 Koronika 26:1-23. Fwanyeya ira Uziya ohokana nzina nimohi niwa na Azariya. (2 Amwene 15:1-7) Zela Jotawu, nione 2 Amwene 15:31-38. Zela Akazi, nione 2 Amwene 16:1-20. Zela Ezekiya, nione 2 Amwene 18:1-20:21. Fwanyeya ira atene anno kafwanyeya kagali amwene a Juda. So mbwenye Izaiya kaali mwene, liye ali namafiyiheda.

2Yehova ohowonga eraga:

<<Kavuruwana we zulu. Kareya nibaru nawo we ilambo ya vati.#Detoronomiyo 30:19, 31:28 Mwasiwa unawonga gu Yehova. Dohabala ahima, miyo aulukuliha. Mbwenye ahimaga kohokonda tongiwa na miyo. 3Ng'ombe nnoiziwa ira: <Mbwiye gu ula.> Aburu eto anoiziwa ira: <Mbwiye vananidjihetcha liye pa eva.> Mbwenye aIzarayeli kinaiziwave yengo. Atwaga kinaonelramo yengo.>>

4Dihikwa miyo! Nyo nlogo notega nyo, muli atu onyemeliwa jotega. Nyo muli atu obaliwa na atu otakala. Muli ahima oirana ja ungongomwa. Nyo muhumala muhiya Yehova. Muhumpeta Mulugu Otchena wa Izarayeli. Nyo muhumutulamela. 5Mwasiwa gwa nni nyo funaga ira mukomiwe akoka? Mwasiwa gwa nni nyo kondagave tongiwa na miyo? Muru wenyu watene uli murenda. Muriminyu watene uli lohulo. 6Romela vati va manyalo ante muruni, kavalive yapama. Mwatene muli mirimbiza ve na anakadjindji na vilonda dotchotcha sangiri tcho tcho tcho. Vilonda diwa kadifinyiwe nne kadipotiwe nne kadiheliwe mirombwe.

7Ilambwinyu isanduwa kala ndebe. Sidadi dinyu dihimala tumeyiwa na munlo. Ilambwinyu inadjiwa vamentoni venyu na atu a unde, eto inaireya nyo muing'anaga. Ilambwinyu ihisanduwa kala vadebe, ihimala gondjihiwa na atu a unde. 8Namwali mwana wa Siyawu#1:8 Namwali mwana wa Siyawu: Siyawu ukana jengo jidjindji jinawonga atu. Voroma vene, Siyawu ti nzina na mwana mwango. Sidadi ya Jeruzalemu imangiwe vazulu va mwango Siyawu. Navwa Siyawu, podi tapulela Jeruzalemu (2 Samuweli 5:7), nari aIzarayeli (Izaiya 51:16), nari ilambo ya zulu. (Eberewu 12:22) Va Namwali mwana wa Siyawu ku wonga sidadi ya Jeruzalemu vamohi na atu anakalamo. uhanle eka, nnga ntadamela mmindani mwa uva, nnga mwana ramada mmindani mwa mihawa eto nnga sidadi yorindjiwa na anyakondo.

9Yehova wa Makuru Matene ahakale ahanihiya hiyo atu a vang'ono ira nikalewo, nakalave nnga akuda Sodoma, eto mwakoka mwene nnga akuda Gomora. 10Kavwani mazu a Yehova, nyo andimuwa a Sodoma. Nyo akuda Gomora reyani nibaru, kavuruwanani jejo Mulugu wehu jinaufundjihani liye.#1:10 nyo andimuwa a Sodoma… Nyo akuda Gomora: Yehova awongaga na makalelo anno ku wonga akuda Juda kohokana mawendelo abure nngave akuda Sodoma anno Mulugu aatongile liye wanle.

11Yehova unawonga ira: <<Mikuto didjindji dinyu nnadilabela nni? Tchoira miyo dihigomana mikuto dotumeya da mabila a alombwana, na jonuna ja jifuwo joruva jinavelela nyo. Kadinna ziveliwa zela sangiri na ng'ombe, nne sangiri na mabila, nne na mbuzi. 12Nyo zaga vamentoni vaga, bani uurumileni ira munyingalele vatando va nyumba yaga na makalelo vini nyo? 13Kamuzena akoka mikuto denyu dohokana mabasa do. Jonukela jinatumeya nyo ti jengo jotakaletchetcha vamentoni vaga. Kannawanda vilela na jotega jinera nyo mwagumana ira mulobele, nne pwando munadja nyo zela mwedi muxa nari siku na sabado nari pwando dimohi diwa dinera nyo. 14Miyo dihimala ida no kalawo waga watene pwando denyu da mwedi muxa nari pwando denyu durumileni miyo. Pwando denyu dihisanduwa kala yengo yoditakaleliwiha. Dihigoma vilela na pwando denyu do. 15Masiki mwavenyiheda miwono dinyu zulu, miyo nnotawiha kove yaga. Masiki mwaindjivihaga malobelo enyu, miyo kannavuruwana lobela wenyu, mwasiwa mandinyu kohomala takala na sangiri. 16Muhambe, muvitchenihe, mukumihevo vamentoni vaga mabasinyu otakala, eto muhiye irana jotakala. 17Mufundje irana japama, muvende ira muiziwe matongelo a ibaribari, mwaakamihede aliba onihiwa goyi, mwaavunele anapawi, muimelele milandu da amakwele a ahiyana ira katongiwe pama.>>

Itana wa Yehova ira atu otega katwaruwe

18Yehova unawonga ira: <<Kazani, nitapanyeni vamohi. Masiki jotega jenyu jikale jofila, miyo nnowanda jihuwa fiyeda nyo kala otchena mbe. Masiki jotega jenyu jikale jofila nnga sangiri, munokala otchena nnga ntondje. 19Mwakala okozeya ira mudivwelele miyo, munodjavo japama ja ilambo ila. 20Mbwenye mwakonda, mwahadivwelele, munopiwa na supada.#1:19-20 Mogwada mwene, yopangana Mulugu apanganne liye na aIzarayeli ali ira mwakala okozeya ira mudivwelele miyo, munodjavo japama… mwahadivwelele, munopiwa na supada: Nione Detoronomiyo 28:1-67. Eto fwanyeya ira tempu ili hiyo ila Mulugu kapanganne ira ale ananvwelela anodjavo ja ilambo ya vati mbwenye apanganne ira kakayena goyi. (Joira ja Anamarumiwa 14:22; Roma 5:3-5; Filipo 1:29; Tiyagu 1:2-4; 1 Peduru 2:21) Tchoira ule unanvwelela tempu ili hiyo ila ukana yodediha ira adjevo ja ilambo ya zulu. (Roma 8:17-18) Mwasiwa unawonga gu miyo Yehova.>>

Ubure wa akuda Jeruzalemu

21Ing'anani sidadi yenno yali yororomeleya, peno isanduwa kala nnga puta. Wanle muwari mwa sidadi yenno mofwanyeya atu ororomeleya na atu oirana upama. Peno eto muzanle apanga. 22We Jeruzalemu wali nnga parata, peno uli nsiro niwa bahi. Wanle weyo wali vinyu wapama eto peno uli vinyu odambwalihiwa na mahindje. 23Asogolrelri awo anakonda tongiwa na Mulugu, anavwanana na ambava. Kada musogolrelri unaziveliwa vahiwa kunya. Kada musogolrelri unatamangela yovahiwa. Kinatonga mwa ibaribari mulandu wa anapawi. Kinabalra makani a amakwele a ahiyana. 24Nona Nabwiya, Yehova wa Makuru Matene, Mulugu wa Kopolo wa Izarayeli unawonga ira: <<Aa, wenno unavenda jowana na miyo vano, nnomugondjiha! Nnoaweliheda kunyakunya amwidani aga. 25Nnotapula ndanda naga ira diwane na weyo. Miyo nnoupiya na munlo ira dikumihevo nsiro nawo nnga maliba fulra afulraga na sabawu yapama. Miyo nnoupiya ira dikumihevo jotakala jawo jatene. 26Nnouweliheda anamatonga awo nnga voroma vene. Nnouweliheda anamawelruza awo nnga jali atu voroma. Era eno, unaitaniwege sidadi yapama, sidadi yororomeleya.>>

Yotambilra ya atu otwaruwa na ohotwaruwa

27Yehova no tonga waye wa ibaribari unoza awombole Siyawu. Muwari mwa upama waye, unoawombola eto atu atene otwaruwa. 28Mbwenye ale anakonda tongiwa na Yehova nari atu otega anoza kanongiwe vamohi. Ale anamuhiya Yehova anoza kamalihiwe. 29Mwasiwa nyo munoza munyaswe na mwasa wa mitengo da karvaliyo, dedo daziveliwa nyo. Kove dinyu nnoza digwe na mwasa wa minda dedo dasakunlre nyo.#1:29 munoza munyaswe na mwasa wa mitengo da karvaliyo: Mutengo wenno ali nimburo nokuta mikuto da vikwamutu josema nnga jinaireya malambwala atu kakutaga mikuto diwa vati va mutope. Eto zela mazu oira na mwasa wa minda dedo dasakunlre nyo, atu wanle kohokana jazala atu muwari mwa sanganiko da vikwamutu josema nnga jinaireya malambwala atu kazalaga muhombo wa murombwe. 30Tchoira nyo munoza mukale nnga mutengo wa karvaliyo onyala eto munoza mukale nnga munda ohokana mahindje. 31Atu olimba anoza kakale nnga vikwakwari, eto mabasiwa anoza kakale nnga nikalra na munlo. Atuwa na mabasiwa, jatene ejo jinotumeyiwa eto munlo anafuna atu tumeyiwana kalivo unafuna za timiha.

Currently Selected:

Izaiya 1: iLolo

Highlight

Copy

Compare