Jenesesi 42

Joze abalaye kohodowa Ijipitu ira kagule jodja

1Evale Jako agaiziwile ira Ijipitu johokalawo jodja, ohowonga na ahimaye ira: <<Kodi mugaratele nni mukalelaga ing'ananave? 2Miyo dihivwa keraga: <Ijipitu unogulihiwa jodja.> Kavenyani mudowe Ijipitu, mwagule jodja ira nahakwe ndala.>>

3Mwa enne Joze abalaye kumi kohovenyaga, aliwa dowa Ijipitu ira kagule jodja. 4Mbwenye Jako kamurumelihile mwanaye Benjami wenno ali Joze ng'onong'ono waye ira adowe vamohi na abalaye amohiwa ale mwasiwa aova unaireliwe yabure mundila. 5Evale anapongwe a Izarayeli kumi kohovenyaga kadowaga Ijipitu. Eto aliwa tchadowilege okave, nari. Kohokalawo eto atu amohiwa kaahanana atu mulrendoni ira na aliwene kagule jodja, tchoira ilambo yatene ya Kana mohokala ndala yohokala ya masika.

Joze ohokokoreliwa na abalaye

6Joze tempu yenne afwanyeya agali musogolrelri wa ilambwele eto liyene gwaaguliheda atu atene jodja. Mwa enne abalaye ale kagafiyile Ijipitu ule, kohodowaga vamentoni vaye aliwa nkokorela, kaoramihaga kove diwa ante fiyiha vati.

7-8Joze agaaonne abalaye ale, ohaiziwa ira: <<Abalagale banna>>, mbwenye aliwa kohomudiwala, tchamuiziwile. Evale Joze ohatambilra nnga amarala, kalaga nnga liye kaaiziwile, liye afuka na uwali, kwi: <<Nyo munakumela uvi?>> Aliwa kohorumela keraga: <<Hiyo nnakuma ilambo ya Kana. Nazela gula jodja.>> 9Evale Joze ohoumbuwelaga ira: <<Joroha jaga zela abalaga ala ti jeji jinaireya peno ji!>> Mwa enne ohoira: <<Nyo muli anamawendelela. Mwazela wendelela ira muiziwe makalelo oigondjiha ilambwela!>> 10Aliwa kohowonga keraga: <<Nari mbwiyeni, hiyo kanazela jejo. Hiyo anamalaba enyu so mundimuwa, nazela gula jodja bahi. 11Mwanionaga eni, hiyo atene babihu gu mmohive. Eto nili atu ororomeleya. So mundimuwa hiyo anamalaba enyu kanili anamawendelela ilambo nari!>> 12Evale Joze ohowongaga, liye ira: <<Munanama! Nyo eni mwazela wendelela ilambwela ira muone makalelo oigondjiha!>> 13Aliwa kohowakulagave keraga: <<So mundimuwa, hiyo anamalaba enyu nali anapongwe kumi na ambinli, babihu mmohive. Liye unakala mwilamboni mwa Kana. Mbalihu wa itongohi uhanle vande na babihu. Mbwenye mmohi gudimenle.>>

14Evale mulombwana Joze ohawandelaga, liye kwi: <<Pu mwemo nnga muwongele miyo, nyo eni munafwanyeya mwagali anamawendelela. 15Miyo nnafuna duxixeni eni. Nnolumbelela ingumi ya Farawu ira kamunavenyawo uno mbalinyu wa itongohi ahazile. 16Akala munawonga mwa ibaribari, nnafuna mutu mmohi bahi awelele mundulri, amudowele mbalinyu wa itongohi amuzena, mbwenye nyo amohiwa munofungeliwa mukadeya fiyeda mbalinyu wa itongohi aze uno ira na miyene dikayena ibaribari. Mbwenye ejo mwahairena, miyo nnolumbela vamentoni va Farawu ira nyo muli anamawendelela.>> 17Mwa enne Joze ohafungelaga mukadeya abalaye ale, aliwa kala emule malambo mararu.

18Siku naneraru, Joze ohowonga na aliwa ira: <<Miyo dili mutu omuova Mulugu. Nnafuna duhiyeni ira mukalewo. Mbwenye ira duhiyeni, inafwanela murumele yenno inafuna miyo wonga. 19Akala nyo muli atu owonga ibaribari, mwatene eva mukumemo mukadeya, mudowe mwatukule jodja ira mudowena vande, mwaavahe abalinyu mmavande mwenyu ira kapena ndala. Mbwenye mukadeya mu unohalamo mutu mmohi. 20Nyo amohiwa mwadowa, mwamutukule mbalinyu wa itongohi wenno uhanle vande, mmuzena ira dikayena ibaribari. Mwaira eno, miyo damuona na meswaga, pa evale vanafuna miyo uroromelani. Jaireya eno, mbwenye, kamunakwa.>> Evale aliwa kohorumelaga irana yenno yawongile Joze.

21Mwa enne kohoroma wonga mmohi na nfwaye keraga: <<Ira ubure watene wenna unifwanye, jinaniireyela na mwasa wa ubure wamuirele hiyo mbalihu. Tchoira hiyo nagaonne zuzuma wanna liye mmirimani mwaye eto nagavwile vepa waye, kanabalrile. Nona ubure watene wenna uniireyelaga eni.>> 22Evale mulombwana Rubeni ohowonga eraga: <<Vale miyo siku nenne kadawongilege ira kanimuirena yotakala muzombole Joze eto nyo mwahafuna divwa? Kaing'anani jinaireya peno ji. Nnaonihiwa goyi eni na mwasa wa sangiri na Joze.>>

23Aliwa kawongaga enne tchaiziwaga ira Joze oavwaga, tchoira Joze awongaga okana mutu atapulela na iwongelo ya Ijipitu, kalaga nnga liye kaiziwile iwongelo ya abalaye ale, mbwenye agaiziwileve. 24Noira eno, Joze ohovenyavo, liye dowa vaye vene roma nla. Noira eno, ohowelelaga vafwanyeya abalaye ale, liye tapanyaga na aliwa. Evale Joze ohomutukula Simeyawu, liye mmanga, afwaye atene kaing'anaga.

25Noira eno, Joze oharumaga anamalabaye ira: <<Muvenye, mudowe mwazalihe masakwi ewa jodja eto mutukulege kobiriwa yenno yagulana atu, kada mutu kobiraye muhelege vazulu va sakwi vaye amala mmangegewo. Eto mwaavahe poso ira kadjege mundila kadowaga.>> Anamalabale kohoirana nnga mwemo mwawongele liye. 26Evale Joze abalaye amohiwa ohala ale kohomangelelaga jodja vaaburuni viwa, aliwa dowaga waniwa.

27Mbwenye aliwa kagali muulrendoni, nzuwa nagavirile, kagafiyile nimburo nafuna atu gona, kohoimelaga. Mwa enne mutu mmohi agatapunle sakwi naye ira atukulemo jodja, adjihe buru waye, unafwanya kobiri yenno yagunlena liye ili vamulomoni va sakwi naye nne. 28Evale ohawandela afwaye, liye kwi: <<Alombwanani, kaing'anani. Kobiri yenno yagunlena miyo kohodiweliheda, ila musakwini mwaga mu!>> Evale aliwa kohokukumuwa kangurumelaga, aliwa wongaga mmohi na nfwaye keraga: <<Kodi Mulugu jeji jiniirele liye ji nni?>>

29Aliwa kagafiyile wa babiwa Jako ilambo ya Kana, kohomuwandelagamo jatene jaaireyele, aliwa ira: 30<<Mulombwana wenno unatonga ilambo ya Ijipitu, nagadowile liye awonga na hiyo mwa uwali eto ohoroma ninyanyuwela eraga: <Nyo muli aliba wendelela ilambwela.> 31Mbwenye hiyo nohomuwakula ira: <Nari mbwiyeni, hiyo nili atu ororomeleya, kanili anamawendelela.> 32Noira enne, nohomuwandela, hiyo ira: <Hiyo voroma vene, nali kumi na ambinli, babihu mmohive. Mbwenye mmohi kaliwo. Eto mbalihu wa itongohi uhanle vande na baba ilambo ya Kana.> 33Nagawongile eno, mulombwana unatonga ilambwele, ohoniwandela, liye kwi: <Ira diiziwe ira munawonga ibaribari eto para diiziwe ira muli atu ororomeleya, nnafuna mutu mmohi ahale uno, nyo amohiwa mutukule jodja mudowegena ira mwaavahe atu amohiwa kahanle mmavande mwenyu ira aliwa kawande pana ndala. 34Mwadowa, mwamutukule mbalinyu wa itongohi munamuwonga nyo uyo, mmuzena uno. Mwamuzana mbalinyu wa itongohi, panafuna miyo ona ira na ibaribari nyo kamuli anamawendelela, muli atu ororomeleya. Mwera eno, mbwenye miyo nnouwelihedani mbalinyu eto nnouhiyani ira musakanyege malronda enyu mwilamboni muno.> >>

35Mwa enne aliwa kakutulaga jodja jafwanyeya mmasakwini mwiwa, kagaing'anne, kada mutu ofwanyaga nipunda na kobiri yagunlena liye jodja jile, nagali musakwini mwaye. Mwa enne aliwa vamohi na babiwa Jako kagaonne mapunda a kobiri ale, kohokagana ova ulukulu. 36Evale babiwa Jako ohowongaga eraga: <<Nyo eni munodiwaka ahimaga. Kaing'anani, Joze kaliwo. Eto Simeyawu gwenno uhanle wewo. Eto peno nyo munafuna mmutukule Benjami. Jatene jejo unazuzumela gu miyeneve bahi.>> 37Mbwenye Rubeni ohomuwakulaga babaye ule, liye ira: <<Mmuhiye Benjami mmandani mwaga, dimudowena, amala nnomuwelana. Dahamuwelena, so nyo mwaape ahimaga a anapongwe ambinlene.>> 38Mbwenye Jako ohowakulaga eraga: <<Mwanaga Benjami kanauharani, tchoira mbalaye anna liye uhukwa. Eto liye uhanle ekave. Wenna aireliwa yengo yabure mundila, miyo nnagomela kwa, didowe Nimburo na Anokwa no kumbanya dagalive mutu okana mbwi dodoro eni.>>#42:38 miyo nnagomela kwa, didowe masiyeni no kumbanya dagalive mutu okana mbwi dodoro eni: Ali makalelo a Jako owonga ira nnagomela kwa no kumbanya na mwasa oira dihitabwa ulula.

Currently Selected:

Jenesesi 42: iLolo

Highlight

Copy

Compare