Galasiya 5

Jokokomeza ira atu omuroromela Yesu kawendege nnga atu okutchiwa

1Kiristu unikutcha ira niwendege na makalelo a atu okutchiwa. Nona kamurumele kapatchihiwa uzari akoka.#5:1 kamurumele kapatchihiwa uzari akoka: Kohokalawo atu kafuna kaakapatchihe aGalasiya omuroromela Yesu malamulo a wanle ozela ineliwa na jimohi jiwa. Jatene jafuna atu akapatchiha jali ja makalelo a muuzarini. Inafwanela ira atu omuroromela Yesu kawendege no kutchiwa wewo ukutchiwe atu.

2Muvwe pama, miyo dagali mulombwana Pawulo inafuna miyo duwandeleni. Nyo mwarumela ira aliwa kauineleni ira mukale pama vamentoni va Mulugu, Kiristu kanaukamihedani yengo.#5:2 Nyo mwarumela ira aliwa kauineleni: Kohokalawo atu kalaleya ira mutu ira avulusiwe inafwanela aineliwe. Tchoira muwari mwa mazu a Mulugu a wanle, wenno ahaineliwe otamangihiwa ira ahakale vamohi na aIzarayeli. (Jenesesi 17:14) Pawulo ohawandela aGalasiya ira akala munafuna jokala apama vamentoni va Mulugu moineliwa Kiristu kanaukamihedani yengo. 3Miyo nnafuna duwandeleni akoka ira ule unarumele ira kamuinele, unokana mabasa okwakwaneliheda malamulo matene.#5:3 ule unarumele ira kamuinele, unokana mabasa okwakwaneliheda malamulo matene: Ku wonga ule ahanarumela ineliwa mbwenye unamuroromela Yesu, liye kanakana mabasa okwakwaneliheda malamulo matene. Tchoira atu omuroromela Yesu ohokala aJudewu tchatongiwe ira kaharihegemo malamulo matene a wanle. (Joira ja Anamarumiwa 15:5-22) 4Nona ule unafuna kala wapama vamentoni va Mulugu muwari mwa malamulo uhumala mwalana na Kiristu eto uhumala tatila sayi da Mulugu.

5Hiyo mbwenye muwari mwa Munemba Otchena, muwari mwa nroromelo, nihikana yodediheda ira Mulugu unoza anifwanye nagali atu apama vamentoni vaye.#5:5 unoza anifwanye nagali atu apama vamentoni vaye: Ku wonga Pawulo ohokana ibaribari ira Yesu azaga na uwali waye ira aatonge atu otega, uwali wenno kunaafwanya atu omunyindela liye. Nione Roma 5:9. 6Tchoira mutu uli muwari mwa Yesu Kiristu, akala uineliwa owu hehi kaineliwe, jejo kajinna mabasa. So ilukuluwa inafuneya mutu akayena nroromelo eto muwari mwa nroromelo aaziveliwege afwaye.

7Nyo eto wanle mohoroma tamanga pama. Nnga uzile utitani sogolro wenyu ira mwahavwelelege ibaribari bani? 8Zelru dedo mbwenye kadikumile wa Mulugu wenno uuitanileni, nari. 9Inowongiwetcha ira: <<Leverina wa vang'onove unonyakuwiha masa matene.>>#5:9 Leverina wa vang'onove unonyakuwiha masa matene. Tapulela yabure ing'ining'inive inakala nnga leverina. Eto inalingana na nkani wa aGalasiya. Mwa mutu mmohi wabure azile anyenga, mutu mmohi wenno afuna amale anonga atene. Kalaga nnga imariya inawongiwetcha ira: <<Nduwi nimohi novunda nadowa muwano, nnovundiha manduwi matene.>> 10Voira nyo muli muwari mwa Nabwiya, miyo dihiiziwa ira mwavwa mazu nnawonga miyo ala, kamunakana youmbuwela imohiwa. So mbwenye mutu wenno unaukukumulani unotongiwa masiki akale ani.

11Miyo abalaga nnoharahariwa, mbwenye kannaharahariwela muwari moira miyo na vanove nnawonga nkani oira mutu ira avulusiwe inafwanela aineliwe, nari. Ahakale eno, muselu wa ukwa wa Kiristu vamuradini kakala muselu oagwagwadutcha atu. 12Zela ale anaukukumulani na joineliwa jo, miyo dafuna nnga aliwa kakapalriwe.

13Nyo abalaga muhuitaniwa ira mukale atu okutchiwa. Mbwenye muwari mokala atu okutchiwa, kamunukede kutchiwa wenyu ira ukale dugumento noirana jofuna ja maningo. So mbwenye inafwanela muwandege kamihedana muwari mozivelana. 14Tchoira wonga malamulo matene mogwada ku wonga muziveliwa mutu uli watene nnga munaviziveliwela we wa mwinnya. 15Mbwenye mwahakayena makalelo ozivelana, mwaroma lumana, mwaroma takunana, polre polre. Mwasiwa munomala tolotchana.

Jokokomeza ira nisogolrelriwe na Munemba hiya sogolrelriwa na jofuna ja maningo

16Miyo mbwenye nnafuna dukokomezeni ira muwende na Munemba. Mwawenda na Munemba, kamunairana jofuna ja maningo. 17Tchoira jofuna ja maningo jinowana na jofuna ja Munemba. Eto jofuna ja Munemba jinowana na jofuna ja maningo. Muwari mwa jengo mbinli ji, kavili vwanana. Jofuna jehu ja maningo jinafuna jinihiyihe ira nahairegena jofuna japama jinafuna hiyo irana. 18Mbwenye akala nyo munasogolrelriwa na Munemba, kamunatongiwa ira muwende na malamulo.#5:18 akala nyo munasogolrelriwa na Munemba, kamunatongiwa ira muwende na malamulo: Ule unasogolrelriwa na Munemba Otchena kanasogolrelriwa na malamulo. Nona Pawulo kwi hiyo kannawenda na malamulo. Nnawenda na sayi da Mulugu. (Roma 6:14) Eto fwanyeya ira ule unawenda na Munemba Otchena unoirana jengo japama jinafwanyeya mmalamuloni. (Roma 8:3-4)

19Joira ja maningo jihimala iziweya. Ti ji: Raruwa, irana jotakala, unyambi, 20labana vikwamutu josema, lowana, idana, haraharana, kalelana nrima, iragana jengo muwari mwa uwali, visogolriha, kangana, wanawana, 21silrilra, lrezelra, dowaga vamainelo#5:21 dowaga vamainelo: Ku wonga inafwanela mutu omuroromela Yesu ahadowe vidiyoni wewo uli gayelana, lrezelra na nyumbo da Satana. Owu hehi nne kadowe wewo unafwanyeya joina ja mwilamboni ya vati, jinakumela muwari mwa zelru da atu. na jotakala jimohi jiwa jokala ha jeji. Miyo nnafuna dulimbiheni nnga daulimbihileni miyo malambo a mundulrimu ira ale anairana nnga ha jeji kiza kavahiwa pandi muUmweneni mwa Mulugu.

22Mbwenye musapo wa mutu unasogolrelriwa na Munemba Otchena unafwanyeya agali zivelana, hagalala, murendele, vilela, muirela nfwawo upama, irana japama jatene, kana nroromelo, 23wenda mopwaseya na afwawo, no viwendiha pama. Kanilivo nlamulo nnakameliha jeji.

24Zela hiyo atu nnafwanyeya nagali atu a Yesu Kiristu, nihimala tukula makalelo anne nanna hiyo wanle a jofuna ja maningo, jatene ejile nihimala komela vamuradini.#5:24 jofuna ja maningo… nihimala komela vamuradini: Ku wonga nnowanda hiya jofuna ja maningo muwari mwa kopolo da Munemba Otchena. (Roma 6:1-6, 8:13) 25Voira Munemba gunanivaha ingumi ixa, inafwanela eto niwendege na Munemba. 26Kanikaleni atu ovitukulela, kagana makalelo owanihedana no kalelagana nrima mmohi na nfwaye.

Currently Selected:

Galasiya 5: iLolo

Highlight

Copy