Ezodu 13

Joroma baliwa jinafwanyeya jagali ja Mulugu

1Yehova ohowongaga na Mozeji eraga: 2<<Mwaavelelege ahiminyu arandji baliwa wa miyo.#13:2 Mwaavelelege ahiminyu: Makalelo omuvelela murandji baliwa ali dowa va Musasa wa Yehova pagalri kobiri tanu da parata. Nione Ezodu 13:13,15; Numero 18:16. Yeniyo yalaba ira ikale ionihedo ira wanle Yehova ohawombola arandji baliwa a Ana Izarayeli kagali Ijipitu. Yengo yatene yoroma baliwa yagali ya mulombwana, inafwanela muiziwe ira inakala yaga, masiki atu nari anavinyama.>>

Zela pwando ya pawu dohosakanyiwana leverina

3Noira eno, Mozeji ohodowa awandela Ana Izarayeli eraga: <<Inafwanela muumbuwelege siku na peno. Peno ti siku nikumile nyo ilambo ya Ijipitu, muuzarini mwafwanyeya nyo. Yehova uhuwanda ukumihanimo mwilamboni mwali nyo mule na ndanda naye na kopolo. Yaka datene, nafiya siku nnga na peno, kamudjege yengo yoheliwa leverina. 4Peno, mwedi oroma ula wa Abibi, ti siku munakuma nyo ilambo ya Ijipitu. 5Yehova unoufiyihani ilambo ya akuda Kana, aEti, aAmore, aEvi na ilambo ya aJebuzi, ilambo yenno ulumbenle liye na makolo enyu ira auvaheni, inafwanyeya yagali ilambo inna mukaka na nuwi pwi pwi. Mwafiya ilambo yenno, inafwanela yaka datene afiya mwedi wenna, musakanyege pwando na makalelo ala: 6Muwari mwa malambo matanu na menli, mudjege pawu dohosakanyiwana leverina. Eto nakwakwanaga siku nanetanu na mbinli, neno nnafwanyeya nagali siku nogomiheda, musakanyege pwando yomutamalela Yehova. 7Muwari mwa malambo matanu na menli ale, mudjege pawu dohosakanyiwana leverina. Eto mwilamboni mwenyu mwatene kamufwanyeyege yengo yosakanyiwa na leverina eto nne leverina kafwanyeyegemo. 8Siku neno nafiya, inafwanela mwaawandelege ahiminyu ira: <Nnairela eni muwari momuumbuwela Yehova zela japama janiirele liye nikumaga ilambo ya Ijipitu.> 9Sakanya pwando yenno inaza ikale nnga ionihedo, kalaga nnga yengo inamangelela nyo mmandani mwenyu owu vakoveni venyu, yuuwumbutchedagani ira muwongege malamulo a Yehova. Mwasiwa Yehova ohowanda uvenyihani mwilamboni mwa Ijipitu na ndanda naye na kopolo.#13:9 Sakanya pwando yenno inaza ikale nnga ionihedo… inamangelela nyo mmandani mwenyu owu vakoveni: Wamangelela yengo mmandani mwawo nari vakoveni vawo, atu anerege ufuka ira: <<Moya uza umangelelaga yenno tapulela ira nni?>> Sawasawa na Pwando ya Pawu Dohosakanyiwana Leverina. Ali ira ahima kaafukege ababiwa ira: <<Papa, mwasiwa gwa nni hiyo takunaga pawu dovanda di?>>, ababi karome afolrelamo jatene jairile Mulugu aakumihagamo Ana Izarayeli muIjipitu. 10Nona kada yaka inazege, nafiya siku neni, inafwanela mukwakwanelihedege mangano matene anna.

11<<Yehova aufiyihani ilambo ya Kana, yenno ilumbenle liye avaha ababinyu vamohi na nyo, 12inafwanela mwaavelelege wa Yehova anapongwe enyu atene arandji baliwa. Eto yatene yoroma reliwa ya jifuwo jenyu jatene, yagali ya mulombwana, inakala ya Yehova. 13Mbwenye akala murandji reliwa wa buru, mwahafune mpuzeya, inafwanela mmuwombolege na mwana nibila. Mwahamuwombole, inafwanela mmukotole nikohi. Mbwenye zela atu, mwanapongwe uli watene oroma baliwa mmuwombolege. 14Vasogolro munayege nyo, ahiminyu kaufukani ira: <Kodi mwasiwa gwa nni nyo iragana eni?>, inafwanela mwaawakulege ira: <Hiyo nnairela eni mwasiwa Yehova gwaniwombonle na ndanda naye na kopolo muIjipitu, muuzarini mwafwanyeya hiyo. 15Tchoira Farawu ohoroma limba, kafunne nihiya hiyo ira nidowege. Evale Yehova ohaapa arandji baliwa atene a Ijipitu, roma ahima atene a alombwana arandji baliwa vamohi na anavinyama atene arandji reliwa. Nona hiyo velelaga jifuwo jehu ja alombwana joroma reliwa mosakanya mukuto wa Yehova. Eto arandji baliwa a ahimihu, nnaawombola na kobiri.#Numero 18:16 16Nona awombola arandji baliwa unokala nnga ionihedo, kalaga nnga yengo inamangelela hiyo mmandani mwihu owu vakoveni vehu ira nahadiwale ira Yehova na ndanda naye na kopolo gwaniwombonle mwilamboni mwa Ijipitu.> >>

Makalelo Mulugu aasogolrelra liye aIzarayeli kagakumile muIjipitu

17Mwene Farawu agaarumelihile aIzarayeli ira kakumemo mwilamboni mwa Ijipitu mule ira kadowege, Mulugu kaasogolrenlre ira kavire ndila yenno yavira ilambo ya aFilistewu, masiki yalive ndila yokwivela. Tchoira Mulugu ohoumbuwela ira: <<Atwala dera daavirihe ndila ya vakwikwi, anerege wopopihiwa na kondo. Era eno anerege umbuwela zelru dowelela mundulri ira kadowege Ijipitu wakoka wene.>> 18Na mwasa wenno Mulugu ohaviriha ndila yotitikuwa ya muisalesaleni, pandi yenno wafwanyeya Bara Yofila. Ana Izarayeli eto kadowaga, kadowile ovisakanyedene nnga atu kadowaga kondoni. 19Kakumaga mwilamboni mule, Mozeji ohotukulaga makuva a Joze, mwasiwa Joze ahanakwe ohalumbeliha Ana Izarayeli eraga: <<Mwa ibaribari Mulugu unoza aukamihedeni ira muvenyemo muIjipitu muno. Nnauvepani ira mwadowaga, makuvaga munahiye.>> 20Evale Ana Izarayeli kagakumile ilambo ya Sukoti, kohodowa manga misasa diwa ilambo ya Etamu, wandamelana muisalesaleni.

21Na ntana, Yehova aasogolrelra Ana Izarayeli muwari mwa murambo oimela nnga nimbozo. Wadowa murambole, Ana Izarayeli kadowa wewo. Eto na mahiyu, Yehova aasogolrelra na munlo oimela nnga nimbozo ira kawandege wenda muulrendoni mwewa ntana na mahiyu. 22Murambo oimela nnga nimbozo aoneya na ntana ule vamohi na munlo oimela nnga nimbozo aoneya na mahiyu ule, kajaahiyileve Ana Izarayeli.

Currently Selected:

Ezodu 13: iLolo

Highlight

Copy

Compare