Koloso 1

Malondjelo a Pawulo

1Unalremba gu miyo Pawulo, mutu osakulriwa mofuna mwa Mulugu ira dikale namarumiwa wa Yesu Kiristu. Dili na mbalihu Timoteyo. 2Nnoulrembelani nyo muli atu otchenihiwa, muli abalihu ororomeleya muwari mwa Kiristu, munafwanyeya Koloso. Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu, jatene ejo jikale na nyo.

Mazu omutamalela Mulugu no alobelela akuda Koloso

3Naulobelelagani nnomutamaleletcha Mulugu, Baba wa Nabwiya wehu Yesu Kiristu na mwasa wa nyo.#1:3-4 nnomutamaleletcha Mulugu… na mwasa wa nyo: Fwanyeya ira Pawulo kaatetenle aKoloso zela nroromelo newa no zivelana wewa. Ku wonga liye oiziwa ira para aliwa kakayena makalelo anna atu, kere vahiwa na Mulugu. 4Tchoira nihimala vwa zela nroromelo ninna nyo, mmuroromelaga Yesu Kiristu eto nihimala vwa makalelo munaaziveliwa nyo atu atene otchenihiwa 5mwasiwa nyo muhukana ibaribari zela yoing'anela inafuna nyo vahiwa ilambo ya zulu.#1:5 muhukana ibaribari zela yoing'anela inafuna nyo vahiwa: Muwari mokana ibaribari zela yoing'anela inna hiyo, pinawanda hiyo kana kopolo dowenda na nroromelo nehu eto hiyo wandaga kala atu ozivelana. Yoing'anela yenno muromile vwa muwari mwa mazu a ibaribari anno anafwanyeya kagali Muselu Wapama. 6Muselu Wapama wenno uhufiya wewo uli nyo wo. Eto mwilamboni ya vati mwatene Muselu Wapama unavaha misapo dapama eto unaulukula nnga vinaireya muwari mwa nyo kuma siku noroma mwavwile nyo eto muromile nyo kana ibaribari zela sayi da Mulugu.#1:6 Muselu Wapama unavaha misapo dapama: Ku wonga wewo unalaleyiwa Muselu Wapama, muwari mwa muselu wenno atu makalelo ewa anowanda tchindjeya, aliwa roma vahaga misapo dapama. Akala mutu uwatchela Muselu Wapama eto ahavahege misapo dapama, inafwanela aiziwe ira liye kanakayena ibaribari zela Muselu Wapama. Tchoira atu karumela Muselu Wapama mwa ibaribari, makalelo ewa anotchindjeya.

7Nyo mwaromile fundja Muselu Wapama na mulombwana Epafaraji wenno nnamuziveliwa hiyo, wenno unalaba vamohi na hiyo mabasa amohive. Liye eto gu namalaba ororomeleya wa Kiristu ovahiwa mabasa oulabani nyo. 8Mulombwana Epafaraji eto gwenno uniwandenle zela zivelana munna nyo muwari mwa Munemba Otchena.

9Nagavwile zela nroromelo nenyu, kanihiyile ulobelelani. Muwari moulobelelani, nnanvepa Mulugu ira auiziwiheni pama pama jofuna jaye ira mukayena zelru datene no onelramo watene okumela wa liye 10ira muwande wenda na makalelo ofwanela vamentoni va Nabwiya, mmuziveliwihaga mwa jatene, muvahaga misapo dapama zela irana japama eto makalelo enyu omuiziwa Mulugu kadowagave sogolro.#1:10 muvahaga misapo dapama: Vaha misapo dapama ku wonga irana jengo japama. Sawasawa nnga inafwanela mutengo wa vande avahege jovaha japama, inafwanela atu atene anafwanyeya vande va Mulugu kawendege na zelru da Yesu Kiristu eto kairegena jengo japama. Eto makalelo enyu omuiziwa Mulugu ku wonga kana ibaribari zela Mulugu na makalelo anna liye hiya mukayikela owu umbuwela jonama jinawonga atu a unde zela Mulugu.

11Mulugu na kopolo dilukulu dinna liye aulimbiheni ira mukayena kopolo datene ira muwari mwa jatene jinaufwanyani, muwandege kana vilela watene no pwaseya watene mwaganna hagalala, 12mmutamalelaga Baba zela jatene jinera liye. Baba wenno usakanyile ira nyo muwande vahiwa upama unafuna vahiwa atu atene otchenihiwa anno anafwanyeya mmoneyani.

13Mulugu uhunivunela, anikumihagamo muwari mwa utongi wa muisini mwali hiyo. Uhunitukula, nihela muUmweneni mwa Mwanaye wenno unamuziveliwa liye. 14Yesu uhuniwombola muwari mwa sangiri naye, anilevelelaga jotega jehu.

15Kiristu gu nlandaniho na Mulugu wenno ahanawanda oneya eto gu Mwana Murandji wa jatene jipandutchiwe. 16Tchoira jengo jatene jipandutchiwe muwari mwa liye. Nari jengo jinafwanyeya ilambo ya zulu, nari ja ilambo ya vati, jengo jooneya na meso, johooneya na meso, mipando da umwene, andimuwa, anamatonga, nari utongi watene, jatene jene jipandutchiwe muwari mwa Kiristu eto jipandutchiwe ira Kiristu ateteliwe.#1:15-16 Mwana Murandji wa jatene jipandutchiwe: Wanle mwana murandji ali mutu okana utongi eto owatchela rayela akwaranya abalaye. (Detoronomiyo 21:17) Ku wonga Yesu ukana utongi wa jatene jipandutchiwe. (Matewuji 28:18) Eto fwanyeya ira jatene jipandutchiwe muwari mwa liye… eto jipandutchiwe ira Kiristu ateteliwe. 17Kiristu ohokalawo jengo jatene jahanakalewo. Eto Kiristu gunakalihawo jatene jene ira jikalewove. 18Kiristu gu muru wa maningo anno anafwanyeya kagali nikuru na atu anno anamuroromela. Liye goroma eto gu Mwana Murandji muwari mwa atu okwa ira liye akale mwinnya wa jatene jene.#1:18 Mwana Murandji muwari mwa atu okwa: Fwanyeya ira Yesu ukana utongi ozela atu kakwile. Liye guvennye mokwani eto gunafuna atonga ale kakwile nari ale kaliwo. (Joira ja Anamarumiwa 10:42, 17:31; 2 Timoteyo 4:1)

19Tchoira Mulugu mofuna mwaye, afunne makalelo matene aye kakale muwari mwa Mwana.#1:19 Mulugu mofuna mwaye, afunne makalelo matene aye kakale muwari mwa Mwana: Yesu ohowonga ira: Ule udionne miyo, umala muona Baba. (Juwawu 14:9) Ku wonga ule uonne joira ja Yesu, ule uvwile jowonga ja Yesu, umala muona Mulugu mwasiwa Kiristu na liyene eto gu Mulugu eto alaba ja Mulugu. Nione Juwawu 1:18. 20Eto afunne ira muwari mwa sangiri naye navuvihiwe vamuradini, awandanihe jatene na liye, azagana murendele. Nari jengo jili ilambo ya zulu, nari jengo jili ilambo ya vati, Mulugu ohowandaniha jatene na liye muwari mwa Mwanaye.

21Na nyenne wanle mwali olapela wene na Mulugu. Nyo eto moidana na Mulugu na mwasa wa joumbuwela na joira jabure jaira nyo.#1:21 Nyo eto moidana na Mulugu: Mulugu unoaida atu otega na mwasa wa jotega jiwa. (Salmu 5:5, 11:5) Masiki eno, Mulugu unowanda awendela tangaranga atu otega. (Juwawu 3:16; Roma 5:8; Efezo 2:1-4) 22Mbwenye peno Mulugu uwanda uwandanihani na liye muwari mwa ukwa Yesu ukwile liye na maningo aye ira awande uvelelani vamentoni va Mulugu mwagali atu otchenihiwa, atu ohokana yotega, atu ohokana imanya. 23Ira Yesu awande uvelelani mwagali apamene siku nenne, inofuneya muwendegeve na nroromelo nenyu, mukale atu olimba eto ovilela, kamuhiye yoing'anela yenno ikumile muwari mwa Muselu Wapama muvwile nyo, wenno ulaleyiwe ilambo yatene ya vati. Miyo Pawulo divahiwe ira dikale namalaba wa Mulugu olaleya muselu wenno.#1:23 Ira Yesu awande uvelelani mwagali apamene siku nenne, inofuneya muwendegeve na nroromelo nenyu: Mutu omuroromela Yesu unawenda na nroromelo noyeva unoza akayena manyazo siku noza Yesu Kiristu. (1 Korinto 3:15) Eto wenno unakala nnga ukana nroromelo, amala awelela mundulri, ahiyaga nroromelo naye, mutu wenno kanafwanyeya agali wapama vamentoni va Mulugu eto kaza akana pandi muUmweneni mwa Mulugu. (1 Korinto 15:2; Eberewu 3:14, 12:14)

Pawulo ohowonga zela mabasa Mulugu anvahile liye

24Miyo nnohagalala na mwasa wa goyi nnaona miyo muwari moulimbihani. Eto dihalawo goyi dimohi diwa nnga goyi dedo dafwanyeyana Kiristu nnafuna miyo onihiwa mmaningoni mwaga muwari molimbiha maningo a Kiristu, anno anafwanyeya kagali nikuru na atu omuroromela aye. 25Mulugu udivahile izo ira dikale namalaba oulimbihani nyo eto ovweyiha mazu a Mulugu mwapama eto mokwakwanela. 26Dihikana mabasa ovweyiha yengo yokoyeya, yengo yenno afwihu a wanle yahawandile atu iziwa. Mbwenye peno Mulugu utukula yengo yenne yahaiziwile afwihu a wanle, liye aoniha atwaye otchenihiwa. 27Mulugu ohosakulra ira aaonihe atwaye otchenihiwa yengo yokoyeya yagali upama ulukulu wohokala wa masika unaawendela liye atwaye kagali atu ohokala aJudewu. Upamiwa gu ula. Kiristu uli mmirimani mwenyu, nona muhukana ibaribari zela undimuwa unafuna hiyo za kana.

28Hiyo nneretcha awandela atu ibaribari zela Kiristu, naawendjelihaga atene eto naafundjihaga atene na zelru datene da Yesu ira vasogolro niwande avelela atene vamentoni va Mulugu kagali olimba nroromelo muwari mwa Kiristu.#1:28 ira vasogolro niwande avelela atene vamentoni va Mulugu kagali olimba nroromelo muwari mwa Kiristu: Ku wonga aPawulo kamuona mutu aromaga muroromela Yesu, kamuona nnga mwana muwari mwa Kiristu. Evale aPawulo komukokomeza eto komufundjiha zelru da Yesu ira siku nnafuna atu gumana na Mulugu, kanvelele mutule agali sawa muwari mwa Kiristu. Nione Koloso 1:28-29; 2 Korinto 11:2. 29Tchoira miyo dalabaga, dazuzumaga muwari mwa kopolo dilukulu dedo Kiristu unalaba liye muwari mwa miyo, ili ira atene kakale olimba nroromelo.

Currently Selected:

Koloso 1: iLolo

Highlight

Copy