Joira ja Anamarumiwa 23

1Evale Pawulo ohaing'ana pama anamatonga kagumanne evale, liye roma wonga ira: <<Miyo abalaga, roma wanle pakana peno va, mmirimani mwaga dihiiziwa ira wenda waga nnawenda momuriheda Mulugu.>> 2Vevale mundimuwa wa anamakuta Ananiya oharuma ale kaimenle vali Pawulo ira: <<Kankomeni wanoni waye wo.>> 3Mwa enne Pawulo ohomuwongagana mazu ndimuwole, liye ira: <<Mulugu unoukoma weyo, ngongomwa we! We unafuna nnga uditonge miyo zela malamulo. Mbwenye weyo unaviringaniha malamulo moaruma atwala ira kadikome miyo dahanna mulandu.>> 4Vevale ale kaimenle vali Pawulo kohonfuka ira: <<Nnga weyo unawanda avi mpeta mundimuwa wa anamakuta wa Mulugu?>> 5Vevale Pawulo ohoira: <<Abalaga, dileveleleni. Dawonga miyo eno, kadaona ira nnawonga na mundimuwa wa anamakuta. Mwasiwa mMazuni ihilrembiwa ira: <Kamuwonge ubure zela ndimuwinyu unausogolrelrani.>#Ezodu 22:28 >>

6Jejile jagavirile, mulombwana Pawulo agaaonne anamatongale, ohoona ira: <<Atwala, amohi ba aSadusewu, amohi ba aFarizewu.>> Mwa enne ohowonga na mazu okuwa ira: <<Abalaga, miyo vano nnafwanyeya dagali muFarizewu, mwana wa aFarizewu. Ira disumeliwe eni, disumeliwe na mwasa okana yodediheda ira atu kakwa, anovenya mokwani. Mulandu unna miyo gwenno.>> 7Agawongile mazu anne, vohokala kangana muwari mwa aFarizewu na aSadusewu. Ku wonga vohokala gaweya muwari mwa anamatongale.#23:6-7 aFarizewu na aSadusewu : muwari mobaliwa kafwanyeya kagali aJudewu ve. Eto muwari mokala aJudewu, sanganiko diwa na joumbuwela jiwa zela ja Mulugu johiyana. Pawulo ira akayena zelru dowonga ira: dihikana yodediheda ira atu kakwa, anovenya mokwani awongela ira aFarizewu na aSadusewu kakanganege oka oka. 8Tchoira aSadusewu kagavwile mazwale, aliwa tchaziveliwe mwasiwa aliwa kinarumela ira mutu unoza avenye mokwani, nne ira angelro kohokalawo nne ira minemba dihikalawo.#23:8 aSadusewu… kinarumela… ira minemba dihikalawo : Ku wonga aSadusewu tcharumela ira minemba dabure dikalawo eto tcharumela ira mutu uli watene ukana maningo na munemba waye. AFarizewu mbwenye anorumela jatene ejo. 9Vevale kuwa wakuwile atu oka oka kwaali wa masika. Fwanyeya ira muwari mwa aFarizewu kafwanyeya nimburo nenne, amohiwa kafwanyeya eto kagali anamafundjiha malamulo. Aliwa kohovenya, roma arunihaga aSadusewu na makalelo ohokala a masika, kanvunelaga Pawulo keraga: <<Hiyo mbwenye, kannaonavo mulandu ozela mulombwanola. Afwase para liye za wonga mazu anno, tchoira mungelro owu hehi munemba mmohi okumela wa Mulugu gumuwandenle ira awonge jeji.>>

10Muwari morunihana wanna aFarizewu na aSadusewu wohosimbwagave, aliwa fiyeda mwezo ofunaga jowana. Mundimuwa wa anyakondwale agaonne madugudugu ale, ohoova ira afwase anoza kamunyenye mulombwana Pawulo. Evale oharuma anyakondo aye eraga: <<Tiyeni mwalabena kopolo ira mwamukumihevo mulombwana Pawulo, mmuvolotchihe bazini ule.>>

11Mahiyu anne, Nabwiya Yesu ohoza vali Pawulo, liye ira: <<Ulimbihe murima. Tchoira wonga wawongile we ibaribari zela wa miyo vano Jeruzalemu, unadowa wawonge ibaribari zela miyo sidadi ya Roma.>>

AJudewu koholumbela mpa Pawulo kahanadje yengo

12-13Unde wagatchile, kohokalawo aJudewu oindjiva okwaranya 40 kagumanne, garatela zelru diwa. Evale koholumbela vamentoni va Mulugu keraga: <<Hiyo vano, kannadja yengo nne kannang'wave yengo, nahanampe mulombwana Pawulo.>> 14Noira eno, kohovenya, aliwa dowa wonga na andimuwa a anamakuta na andimuwa andimuwa keraga: <<Nihilumbela vamentoni va Mulugu ira kannalawiha yodja nahanampe Pawulo. 15Nifunne ira nyo vamohi na andimuwa afwinyu otonga ja Mulugu, muvenye, mudowe mwanvepe ndimuwole unkoyile Pawulo ira amurume Pawulo aze wa nyo kalaga nnga munafuna munfuke pama pama zela muselu unna liye. Ora inazege liye, hiyo nnompa ahanafiye uli nyo.>> 16Mbwenye jejo jahanaireye, Pawulo murongoliye mwanaye wa mwanapongwe ohovwaga makalelo kafuna atu vitala ira kampe Pawulo. Evale ohodowa bazini ule, liye mala muwandelamo Pawulo jatene. 17Pawulo agavwile mazwale, ohomuitana musogolrelri mmohi wa anyakondo 100 eraga: <<Dera muvenye na muzombwela, mudowe wa ndimuwinyu. Muzombwela ukana yowonga yaye inafuna liye wonga na ndimuwole.>> 18Vevale musogolrelri ule ohomutukula muzombole, nvelela wa mundimuwa wa anyakondo, liye ira: <<Munyakadeya Pawulo gudiitanne, liye divepa ira dimuzena muzombwela wa nyo mwasiwa ukana yowonga inafuna liye dowa wonga na nyo.>> 19Ndimuwole ohomuhideda muzombole ndanda, amudowagana vokala ha vale. Kagalivo oka, ndimuwole ohonfuka ira: <<Katiye, wazana yowonga nni?>> 20Muzombole ohowonga eraga: <<Metchelo andimuwa a aJudewu anafuna kaze kauvepeni nyo ira munkumihemo mulombwana Pawulo, kalaga nnga anamatonga otonga ja Mulugu anafuna kanfukemo muselu unna liye pama pama. 21Inafwanela mwaharumele yovepa yewa, mwasiwa kohokalawo kwaranya alombwana 40 kalumbenle ira kahadje yengo nne kahang'we yengo kahanampe Pawulo. Anafuna kavitale vandila ira kampe Pawulo ahanafiye wa anamatongale. Anoudedihani nyo ira murumele.>> 22Noira eno, ndimuwole agavwile ejo, ohomugunya eraga: <<Kumuwandele mutu izele we wonga uno.>>

23-24Evale liye ohaitana asogolrelri ambinli liye aruma ira: <<Mudowe mwaatukule anyakondo 200, aliba kavalo 70, aliba mwanango 200. Muvende eto kavalo dimohi diwa ira Pawulo agwele. Yakwakwanaga 21 ora, mmutukule Pawulo muvenyihane, mmudowegena Sezariya. Mwanvelele mwapama mmandani mwa governadore Felekisi.>> 25Vevale ndimuwole oholremba karta ira aavahede ale kanvelela Pawulo. Alrembilemo mazu oira: 26<<Unalremba gu miyo Kalawudiyu Liziya. Nnoulrembelani nyo Mundimuwa Governadore Felekisi mutu oteteliwa. Nnouvahani malondjelo apama. 27Mulombwanola ahindiwe na aJudewu. Mwa enne, kafunaga jompa, voira dohovwa ira gu musidadawu wa Roma, dohovenya na anyakondwaga, dowa nvunela. 28Evale ira diiziwe muselu wanna atu zela wa liye, dohomudowana wa anamatonga ewa otonga ja Mulugu. 29Dagafukedile, difwannye ira kafuna kamusumele zela malamulo a aJudewu kaiziwile atu oka oka. Mbwenye dihifwanyavo ira mutula kanna mulandu ofwanela piwa nne heliwa kadeya. 30Dagavwile ira atu kohopangana, anafuna kampe, dihimuruma mobaranya wa nyo. Miyo eto dohawandela ale kafuna kamusumele ira kafiye wa nyo, kahiye makaniwa mmandani mwenyu.>>

Anyakondo kohomufiyana Pawulo Sezariya

31Mahiyu anne nnga mwarumiwele atu, anyakondwale kohomutukula Pawulo, aliwa mudowana Antipatiride. 32Kagafiyile Antipatiride, mmetcheloni muwa anyakondwale kohowela na mendo, kadowaga bazini ule. Kaahiyedile aliba kavalo ira kanfiyena Pawulo Sezariya ule. 33Kagafiyile Sezariya, kohonvaheda governadore ule karta niwa, kanvelelaga eto Pawulo vamentoni vaye. 34Evale governadore ule agatukunle karta niwa, agailerile, ohonfuka mulombwana Pawulo porovinsiya ya waniwa. Agaiziwile ira Pawulo ali wa porovinsiya ya Silisiya, 35liye ohoira: <<Miyo nnotonga makani awo afwawo ousumela kaza.>> Vevale oharuma atwaye ira kamuhele Pawulo mukadeya yenno inafwanyeya palasiyo yenno yamangile mwene Erodi.

Currently Selected:

Joira ja Anamarumiwa 23: iLolo

Highlight

Copy