Joira ja Anamarumiwa 18

Pawulo agali sidadi ya Korinto

1Nomala enne, Pawulo ohovenyaga Atena, liye dowa fiya sidadi ya Korinto. 2Agafiyile wewule, ohongumanana muJudewu mmohi wa sidadi ya Pontu, eriwa Akwila na muhiyanaye Pirisila. Aliwa kera fiya wene sidadi ya Korinto ile. Kakuma sidadi ya Roma, ilambo ya Italiya mwasiwa mwene Kalawudiyu ohatamangiha aJudewu atene kafwanyeya sidadi ya Roma. 3Pawulo agaagumannena, agaonne ira aliwa kalaba mabasa osona misasa amohive nnga anno alaba liye,#18:3 Zela mabasa osona misasa, Pawulo na mulombwana Akwila na muhiyanaye Pirisila kohokana mabasa otukula matembe a anavinyama, aliwa gumanihaga, sonaga misasa, aliwa gulihaga. Tchoira tempu yenno anyakondo nari anamakumbuza kowendetchana misasa. ohodowa roma kala na aliwa, aliwa labaga vamohi.

4Masabado matene mulombwana Pawulo ovenyetcha, liye dowaga muwari mwa nyumba yofundjamo Mazu, liye laleyaga, aaonelrihedagamo aJudewu na atu ohokala aJudewu anno kali aGerego. 5Mwa ora yenne pafiya mulombwana Sila na Timoteyo kakumaga ilambo ya Masedoniya. Evale Pawulo ohiya mabasa amohiwa ahinda liye ale, liye labaga mabasa olaleya mazu bahi, awandelaga aJudewu ibaribari ira Namatikeliwa adedihiwa gu Yesu. 6Mbwenye aJudewu kagavwile laleya wa Pawulo, kohoroma muharahara, kamululuvihaga. Evale mulombwana Pawulo ohotata jowara jaye vamentoni va atwale moruniha jawonga atu jile,#18:6 Tata jowara jaye ku wonga ira: <<Miyo kannafuna nne fwanyeyana tumbulru na sidadi ila mwasiwa atwala kohotabwa kala atu otakala.>> Yali ionihedo yoaruniha mazu awonga aJudewu. Pawulo ohopuputa ira ahiyede jotakala ja atwale jihale mwilamboni mwewa. liye ira: <<Nyo mwatolowa, jejo jenyu. Miyo dihimala hambamo zela sangiri nenyu. Eni nnauhiyani, didowe daalaleyege atu ohokala aJudewu.>>

7Mulombwana Pawulo agakumile muwari mwa nyumba yofundjamo Mazu mwamuruniha atwale, ohodowa laleya vande va mulombwana mmohi eriwa Titu Justu. Titu Justu ahanakale mutu omuroromela Yesu, aromile kala mutu omutamalela Mulugu. Vande vaye ali wandamelana nyumba yofundjamo Mazu ile. 8Mwa ora yenno, ohokala mundimuwa wa nyumba yofundjamo Mazu eriwa Kirisipu. Liye ohomuroromela Nabwiya na vande vaye vatene. Eto aKorinto adjindji kagavwile mazu alaleya Pawulo, kohomuroromela Yesu, aliwa batiziwa.

9Siku nimohi na mahiyu, Nabwiya ohomuoniha Pawulo jengo mmuruni mwaye. Pawulo ohomuona Nabwiya azaga amuwandelaga ira: <<Kuovege, nne kumiyale. Inafwanela walaleyegeve. 10Mwasiwa miyo dili na weyo. Kalivo unafuna uporotcha, ineriha miyo dihakana atwaga oindjiva musidadi mwa Korinto muno.>> 11Evale Pawulo oafundjihave aKorinto mazu a Mulugu pakana yaka yompumbula na medi mitanu na mmohi.

12Ora yatonga mundimuwa Galiyo ilambo ya Akaya,#18:12 Sidadi ya Korinto yali muwari mwa porovinsiya ya Akaya. Mundimuwa Galiyo ali governadore atonga porovinsiya yatene ya Akaya. aJudewu kohogumanela, aliwa muhinda Pawulo, mudowana wafwanyeya mundimuwa Galiyo ira kamusumele. 13Kaganfiyilena wa mundimuwa Galiyo, kohoromaga wonga keraga: <<Mutula unaakanyiheda atu ira kamutamalelege Mulugu na makalelo ononga malamulo ehu.>> 14Evale Pawulo afunaga nnga awakule, aawakunle aJudewu ale ali namatonga Galiyo, liye ira: <<Nyo aJudewu mwahazena mulandu ira Pawulo unaviringaniha malamulo a hiyo aRoma owu hehi umukumiha mutu sangiri, dogotonga. 15Mbwenye nyo muzilena makani ozela mazu na mazina na jengo ja malamulo enyu. Jejo sakanyedani nyoka nyoka. Miyo kannatonga!>> 16Vevale ohatamangihavo aJudewu vatonga liye vale. 17Evale aGerego kazile vwa makani ale kohomuhinda Sostene wenno ali mundimuwa mmohi wa nyumba yofundjamo Mazu, aliwa mbubuda vamentoni va andimuwa ale. Namatonga Galiyo ule agali evale, aonaga ejile kawongileve yengo.

Pawulo ohodowave sogolro muulrendoni mwaye, aviraga vilambo didjindji

18Madugudugu ale kagamanle, mulombwana Pawulo ohokalave malambo madjindjene sidadi ya Korinto ile. Evale ohapanganya abali omuroromela Yesu, liye venyihana vamohi na mulombwana Akwila na muhiyanaye Pirisila, kadowaga ilambo ya Senkiriya. Kagafiyile wewule, Pawulo ohoinga murwaye mpalra akwakwanelihedaga yolumbela yerile liye na Mulugu.#18:18 ohoinga murwaye mpalra akwakwanelihedaga yolumbela yerile liye: Malambo a mundulrimu aJudewu kohokana makalelo osakanya yolumbela na Mulugu. Mwa enne yakwakwana tempu yewa, aliwa koinga mpalra. (Nione Numero 6:18; Joira ja Anamarumiwa 21:24) Nivwile tchineneva mazu oira: Pawulo ohomuona Nabwiya azaga amuwandelaga ira: <<Kuovege, nne kumiyale. Inafwanela walaleyegeve. Mwasiwa miyo dili na weyo. Kalivo unafuna uporotcha.>>: (Joira ja Anamarumiwa 18:9) Afwase Pawulo agavwile ejo, liye ohovayela wonga ira: <<Nabwiya, nyo mwadikoya tempu inafuna miyo kala sidadi ila ya Korinto, davenyavo, so miyo nnafuna diinge mpalra muwari moutamalelani zela kwakwaneliheda mazu mwawongile nyo ira: <Kalivo unafuna uporotcha weyo.> >> Evale Pawulo agaonne ira: <<Kalivo uwandile dimexeri sidadi ya Korinto>>, agavennyevo, ahanasuse, Pawulo kwi: <<Dikwakwanelihede yengo yawongile miyo ile.>> Liye sata mpalra. Sata mpalra wewo watonyiheda ira: <<Ukoyile murwagola gu Nabwiya Mulugu.>> Nomala eno, aliwa kohogwelaga mwadeya, kadowaga ilambo ya Siriya.

19Evale kadowagave musogolro, kohoperuwaga sidadi ya Efezo. Evale Pawulo ohomuhiya Akwila na Pirisila wewule. Mbwenye ahanakwaranye Efezo, ovenya dowa nyumba yofundjamo Mazu, liye roma tapanya mazu na aJudewu. 20Atwale kohonvepa ira amalewo malambo mangasi mangasi mbwenye mulombwana Pawulo karumenle. 21Aapanganyaga atwale, ohoira: <<Mulugu afuna, nnoza diwelele uno akoka.>> Evale liye ohovenyihana, akumaga Efezo, liye gwela mwadeya, dowagave musogolro.

22Pawulo agafiyile sidadi ya Sezariya, ohodowa Jeruzalemu, liye londjela nikuru na atu omuroromela Yesu. Nomala eno, ohovenyihana adowaga sidadi ya Antiyokiya. 23Agafiyile Antiyokiya ule, ohomalaga malambo mangasi mangasi akalaga wewule. Evale ohovenya, roma wendawendaga vilambo da Galasiya na Firijiya aalimbihaga atu omuroromela Yesu kafwanyeya wewule.

Akwila na Pirisila kohomuwandela mulombwana Apolo ibaribari

24Mwa tempu yenne, sidadi ya Efezo wewo wafwanyeya mulombwana Akwila na muhiyanaye Pirisila, ohozagawo muJudewu mmohi eni eriwa Apolo. Waniwa ali sidadi ya Alexandiriya eto liye afwanyeya agali mulombwana owanda wonga pama eto mutu oiziwetchetcha Mazu. 25Liye afwanyeya agali mutu ofundjihiwa ndila ya Nabwiya mbwenye so liye aiziwile mabatizelo a mulombwana Juwawu Mbatizi bahi. Liye owongetcha afundjihaga ja Yesu na mmirimani mwaye mwatene.#18:25 na mmirimani mwaye mwatene owu hehi mwa kopolo da Munemba Otchena. 26Liye ohoroma wonga munyumbani yofundjamo Mazu, afundjihaga ja Yesu aiziwile liye mohoova. Mwa enne mulombwana Akwila na muhiyanaye Pirisila kagaonne ira liye ohaleliwa jimohi na jimohi, kohomutukulaga, aliwa dowa mmariheda ndila ya Mulugu mokwakwanela.

27Noira eno, mulombwana Apolo ofuna dowa ilambo ya Akaya. Agamanle awandela abali omuroromela Yesu a Efezo, aliwa kohomukokomeza ira adowe eto koholremba karta ira anamamuhara Yesu a wewule kamuwatchele pama. Agafiyile Akaya, liye owanda akamiheda valukulu atwale kamuroromela Yesu mwa sayi da Mulugu. 28Tchoira liye oagondjiha aJudewu karuniha ja Yesu vatando, vamentoni va atu atene, liye tukulaga Mazu a Mulugu, aaonihedagamo ira Namatikeliwa kamudediha atu gu Yesu.

Currently Selected:

Joira ja Anamarumiwa 18: iLolo

Highlight

Copy