Joira ja Anamarumiwa 11

Peduru ohawandela afwaye jaireyile agali vande va Korneliyo

1Vevale anamarumiwa na abali omuroromela Yesu kafwanyeya porovinsiya ya Judeya kohovwa ira atu ohokala aJudewu na aliwene kohowatchela mazu a Mulugu. 2Mwa enne Peduru agadowile Jeruzalemu, atu omuroromela Yesu anno kasimbwile hidedela joineliwa, kohoroma musanya Peduru keraga: 3<<Weyo Peduru uwandile avi dowa kala na atu ohoineliwa, we djaga vamohi na aliwa?>>

4Vevale Peduru ohoroma wonga, aawandelagamo jatene jaireyile, liye ira: 5<<Miyo ira diirena eno, dionne eni. Miyo dagali sidadi ya Jope, dilobelaga, morurumutcha dohokalaga nnga nnaroha eto dahairaga roha, miyo roma ona jengo mmuruni mwaga. Daonnege yengo yokala ha lensori nlukulu nikumelaga zulu, natitihediwe mwa mendo minnayi, nizaga wandamelana valigi miyo. 6Dagaing'anne pama, dafwannyemo anavinyama ohiyana-hiyana a mwilamboni, owenda na mendo minnayi, a mukokolani, omburunuwa vamohi na mbalrame dovava zulu. 7Mwa enne dohovwa nizu nidiwandelaga ira: <Peduru, kavenya, upe ira udje.> 8Mbwenye miyo dohoira: <Kavali jowandeya Nabwiya. Tchoira wanoni waga kunababihe volowa yengo yotakala, yenno ikondihiwe mmalamuloni.> 9Evale nizu nne nohokumela zulu akoka nidiwakulaga ira: <Kuwese nnga yengo yotakala yenno itchenihile Mulugu.> 10Evale yenne yohoireya eno fendo taru. Noira eno, jatene ejile johowelihediwa zulu wakoka wene.

11<<Mwa enne, ora imohive tchi tempu yafiyile alombwana araru anno karumiwe ira kadizele kuma sidadi ya Sezariya, aliwa za imela wandamelana vande vafwanyeya miyo. 12Evale Munemba ohodiwandela ira: <Uvenye udowege vamohi muulrendoni na atwale, kukayena yowanganyeda ili yatene.> Vevale miyo venya na abalaga omuroromela Yesu atanu na mmohi ala. Nagavennye, nagafiyile wewule, nohofiya vande va mulombwanole. 13Evale liye ohoroma niwandelamo makalelo amuonne liye mungelro amutwanyuwelaga vande vaye eto amuwandelaga ira: <Waarume alombwana kadowe sidadi ya Jope, kadowe kamuitane mulombwana Simawu, wenno uneriwa Peduru. 14Liye aza, gunafuna uwandela mazu ouvulusa weyo na atu a vande vawo.> >>#11:14 Liye aza, gunafuna uwandela mazu ouvulusa weyo na atu a vande vawo. Mulombwana Korneliyo ali mutu omuriheda Mulugu eto omuova Mulugu eto liye oavaha atu osimela kobiri. (Joira ja Anamarumiwa 10:1-2) Mbwenye muwari mwa jatene ejo, liye kaanna pandi no vulusiwa mwasiwa kamuroromenle Yesu Kiristu. Nona Mulugu na sayi daye ohovenda makalelo ira Korneliyo avwe Muselu Wapama ozela Yesu Kiristu ira awande vulusiwa. Agali Mulugu ohomuruma mungelro ira adowe wa Korneliyo, Mulugu kamurumile mungelro ira amulaleye mwasiwa tempu ili hiyo ila mabasa olaleya Mulugu uhiyile mmandani mwa atu omuroromela Yesu. (Matewuji 28:18-20) 15Peduru ohowongagave eraga: <<Vevale dagaromile laleya mazu, nnaona Munemba Otchena aamorelaga atwale nnga janiireyele hiyo voroma vene. 16Mwa enne dohoumbuwela mazu Nabwiya Yesu awongile liye ira: <Juwawu abatiza na mahindje. Nyo mbwenye munobatiziwa na Munemba Otchena.> 17Nona miyo evale dohoonamo ira akala Mulugu ohavaha atu ohokala aJudewu Munemba Otchena na makalelo nnga anivahile liye hiyo ora yaromile hiyo muroromela Nabwiya Yesu Kiristu, nnga miyo vano dali ani ira dimurunihe Mulugu?>> 18Mwa enne aliwa kagavwile jowonga ja Peduru jile, kohokurumuwa, aliwa roma mutitimiha Mulugu keraga: <<Na ibaribari na atwene ohokala aJudewu Mulugu uhavaha iwandelo yotwaruwa ira na aliwene kakayena ingumi.>>

Laleyiwa wa atu owonga iGerego

19Atu omuroromela Yesu kabalaleyile na mwasa oharahariwa wewo waromile siku napiwe Estevawu, kohowendawenda fiyeda Fenisiya, Xipire na Antiyokiya. Mbwenye mwatene mwene mwadowa atu, kaalaleya mazu aJudewu afwiwa bahi. Tchamulaleya mutu mmohiwa ja Yesu, ahali muJudewu. 20Mbwenye muwari mwa atu omuroromela Yesu, kohokalawo alombwana amohiwa angasi angasi a Xipire na Sirene. Aliwa kagadowile Antiyokiya, kohoroma alaleya zela Nabwiya Yesu atu owonga iGerego.#11:20 atu owonga iGerego: Ku wonga kali atu ohokala aJudewu. Sawasawa vs 21,22. 21Mwa enne Nabwiya ohela ndanda aakamihedaga anamalaleya ale. Muwari molaleya mule, atu oindjiva ohokala aJudewu kohoroma muroromela no muhara Nabwiya.

22Mwa enne, nikuru na atu omuroromela Yesu a Jeruzalemu, kohovwa zela jejo jaireyile Antiyokiya ira atu ohokala aJudewu kohorumela mazu a Mulugu. Aliwa kagavwile enne, kohomuruma mulombwana Barnabe ira adowe Antiyokiya ule, aapande. 23-24Barnabe wenno kamurumile atu ali mutu wapama, mutu ozaleliwa Munemba Otchena, mutu wa nroromelo. Agafiyile wewule, ohagalala mwasiwa ohafwanyaga ira mwa sayi da Mulugu atu kohomuroromela Yesu. Evale liye ohakokomeza atwale ira kakaleve omuroromela Nabwiya na mmirimani mwewa mwatene. Eto tempu yenno Nabwiya ohahela atu adjindjene muUmweneni mwaye.

25Vevale mulombwana Barnabe ohodowa Tarisu anvendaga mulombwana Sawulo. 26Aganfwannye, ohomudowana Antiyokiya ule. Kagazile, aliwa kohomala yaka yompumbula kagumanaga na nikuru na atu omuroromela Yesu kafwanyeya wewule, kaafundjihaga atu oindjivene mazu. Antiyokiya ku wewo waromile anamamuhara Yesu itaniwa na nzina na aKiristawu.

Atu a Antiyokiya kohosoka kobiri ira kaavahe afwiwa kasimenle Jeruzalemu

27Malambo anne kohokalawo anamafiyiheda angasi angasi kavennye Jeruzalemu, kadowa Antiyokiya. 28Namafiyiheda mmohi ali mulombwana Agabu. Liye mwa Munemba Otchena ohovenya, roma awandelaga atu ira: <<Ikala ndala yohokala ya masika inafuna za ilambo yatene.>> Na ibaribari yohoireya tempu yatonga mwene Kalawudiyu. 29Vevale anamamuhara Yesu a Antiyokiya kohelavo zelru ira: <<Ndoweni nisokeni kobiri ira naavahe abalihu omuroromela Yesu anafwanyeya Judeya.>> Evale kada mutu ohovelela kobiri nnga yawandile liye. 30Evale kagamanle soka kobirile, kohonvaheda mulombwana Barnabe na Sawulo ira kaavahede aansiyawu a ilambo ya Judeya.

Currently Selected:

Joira ja Anamarumiwa 11: iLolo

Highlight

Copy