2 Samuweli 13
13
Muselu wa Amoni na murongoliye Tamari
1Abisalawu mwana Davi ohomukana murongoliye oriya bure wenno aitaniwa Tamari. Vagamanle malambo, Aminoni mwana Davi ohoroma nfuna murongoliye Tamari ule.#13:1 Tamari na murongoliye Abisalawu mmiwa na babiwa ali mmohive. Mbwenye Amoni babaye ali Davi mmohive so anna mmaye wayene. (2 Samuweli 3:2-3) 2Muwari monfuna mule, fwanyeya ira murongoliye ule ali ahanangonena mulombwana eto Aminoni kaanna makalelo ira awande mugonana. Mwa enne na mwasa oumbuwela zela jejile, mulombwana Aminoni ohofiyeda kala murenda.
3Aminoni ule ohomukana nfwaye eni oxanga aitaniwa Jonadabe, mwana Simeya eto Simeya ule ali Davi mbalaye. 4Siku nimohi Jonadabe ule ohozaga, liye nfwanya nfwaye Aminoni ule, liye nfuka eraga: <<Nfwaga, kodi weyo mwasiwa gwa nni malambo matene we ondaga agali uli mwana mwene?! Kadiwandele!>> Evale liye ohowakulaga eraga: <<Miyo so wonda wu wadionaga eni, dinna zuzuma na mwasa oira miyo nnanfuna murongolaga Tamari, Abisalawu murongoliye, nnga dimugonena.>> 5Evale nfwaye ule ohowongaga eraga: <<Miyo nnafuna duvahe zelru. Akala unonfuna murongoliyo Tamari, ukale ogonantene nnga uli murenda enne. Evale tempu inafuna venya babawo ira aze aupande, adowaga umuwandele ira: <Miyo nnafuna mwamuwandele murongolaga Tamari aze apiye yodja vande evano, dimuing'anaga. Amala liyene aze adidjihe na mandaye ira didje.> >>
6Evale mulombwana Aminoni agavwile zelru dedile, ohodowa gonanti kalaga nnga ali murenda. Evale mwene agazile ira ampande, Aminoni ohonvepaga, liye ira: <<Babani so miyo nnafuna mwamuwandele murongolaga Tamari ira aze asakanye mabolu a vang'ono diing'anaga, adidjihe na mandaye ira miyo diwande dja.>>
7Noira eno, babaye ule ohorumihaga mazu wa Tamari vande vali liye oira: <<Udowe vande va murongoliyo Aminoni, wamusakanyele jodja.>> 8Evale Tamari ohomaruwaga, liye dowa vande va murongoliye ule. Agafiyile wa murongoliye ule, anfwanyilege Aminoni ule agali ogonantene. Evale ohokandaga tirigu, liye bulrundja mabolu murongoliye ule aing'anaga, noira enne liye mala afiritari. 9Agamanle afiritari, ohokutulamo mpanelani mwapiya liye mule, murongoliye ule aing'anaga. Mbwenye liye ahanadowena nvaheda ira adje, mulombwana Aminoni ohokondaga. Nomala enne ohowongaga ira atu atene amohiwa kakumemo mmba mule. Evale atene kagakumile, 10ohomuwandelaga murongoliye Tamari ule eraga: <<Kazana kwartuni waga wewuno mabolu ale ira udidjihe na mandawo.>> Evale Tamari ohotukula mabolu ale, liye dowana ira anvahede murongoliye ule vakamani vali liye. 11Evale murongoliye ule agazilena mabolu ale vakamani vale, mulombwana Aminoni ohomuhindaga Tamari ule awongaga eraga: <<Murongolaga, miyo nnafuna digone vamohi na weyo.>> 12Evale Tamari ohomuwakulaga eraga: <<Nari, miyo kannafuna! Weyo uli murongolaga, kuditakalihe. Eto hiyo aIzarayeli kavili jowandeya ira nnoirana jejo! Kusakanye yotakaletchetcha nnga yenna! 13Weyo wagona na miyo nnafuna diye uvi na manyazo okala nnga anno? Nne masiki na wenne unofiyeda kala zimora wa aIzarayeli atene. So udowe wamuwongena mwene unvepe ira anitelihe. Tchoira unorumela.>> 14Mbwenye mulombwana Aminoni kafunileve vwa jejile. Voira liye ali wa kopolo mukwaranya murongoliye ule, ohomugonihaga momuhindela. 15Mbwenye Aminoni agamugonihile, ohoroma muida na makalelo ohokala a masika fiyeda ira ida wamwidile liye wohokwaranya muziveliwa amuziveliwa liye voroma. Mwa enne ohomuwandelaga, liye ira: <<Kavenya, ukume udowege!>> 16Mwa enne Tamari ule ohowakulaga, liye ira: <<Nari, tchoira ditamangiha tchi yengo eto itakanle kwaranya yabure yodigoniha iirile we.>> Liye mbwenye kafunilegeve vwa jejile. 17Ohomuitanaga muzombwe amulaba, liye ira: <<Kamutukule muhiyanola, umukumihede unde wo, wamala ufunge musuwo na kunya.>> 18Evale namalabole ohozaga, liye nkumiheda unde, liye funga musuwo. Fwanyeya ira Tamari awarilege bata yolapa bure yenno yakumile zulu ante manyaloni. Tchoira tempu yenne ahima a mwene a ahiyana ohoteliwa kawara na makalelo anne. 19Evale agakumile mmba mule, ohovizoliha murwaye ndora, liye kawula bataye yolapa ile, liye pwatela mandaye, liye nlaga adowaga vande. 20Evale murongoliye Abisalawu agamuonne anlaga enne azaga, ohonfukaga, liye ira: <<Katchiye, kodi murongoliyo Aminoni wire ugoniha? Kamiyala, kukukumuwe, tchoira liye gu murongoliyo.>>#13:20 kodi murongoliyo Amoni wire ugoniha? Murongoliye Abisalawu ule para liye nfuka enne ohoiziwa ira: <<Murongolaga uhugonihiwa.>> na mwasa oira Tamari avolowaga mmba mule ohokagana jowara jatonyiheda ira liye ali ahanagone na mulombwana. Eto akumaga, fwanyeya ira yawarile liye ile ohokawula, liye vizoliha ndora. Eto para Abisalawu za wonga ira: Kamiyala, kukukumuwe, tchoira liye gu murongoliyo, ammiyaliha muwari moira: <<Miyo vasogolro nnompa gajule.>> Mwa enne Tamari ohokalaga mudiye vande va murongoliye Abisalawu vale aganna kumbanya. 21Evale mwene Davi agavwile zela jatene jaireyile, ohotakaleliwaga na makalelo ohokala a masika. 22Eto Abisalawu kawelenle wonga akoka na Aminoni nne yengo yapama nne yabure mwasiwa liye omuida na mwasa omugoniha murongoliye Tamari momuhindela.
Abisalawu ohomuweliheda kunyakunya mbalaye Amoni
23Vagavirile yaka mbinli dompumbula, mulombwana Abisalawu ohokana atu kasata mabilaye sidadi ya Bali-Azori, wandamelana Efarayimi. Mwa enne ohaitanaga ahima atene a mwene Davi ira kadowe kadje pwando wewule.#13:23 Abisalawu ohokana atu kasata mabilaye… Mwa enne ohaitanaga ahima atene a mwene Davi ira kadowe kadje pwando wewule. Ira liye aaitane abalaye atene, kaaitanenle ira kamukamihede mabasaye nari. Liye aaitanele ira kadowe kadje pwando. Tchoira tempu yenne mutu asataga mabilaye vokala pwando ilukulu. Nione eto 1 Samuweli 25:2-8. 24Eto Abisalawu ohovenyaga, liye dowa nfwanya mwene Davi, liye muwandela ira: <<Mbwiyeni, miyo namalaba wenyu nnasata mabilaga! Nnauvepani ira nyo na anamalaba enyu muze pwandoni masatelo ule.>> 25Mbwenye mwene ohomuwakulaga Abisalawu, liye ira: <<Nari mwanaga! Hiyo nadowa atene, nnosimbwa usimeliha!>> Evale Abisalawu ohomukanyihedagave mwene ira adowewo. Mbwenye liye kafunilege, so anvahilege mareliho aye bahi.
26Evale Abisalawu ohomuwongaganave babaye ule eraga: <<Babani voira nyo muhukonda dowawo, so nnavepa mmuhiye Aminoni ira adowewo!>> Evale mwene ule ohonfukaga, liye ira: <<Kodi mwasiwa gwa nni we funaga ira Aminoni adowe vamohi na nyo?>> 27Mbwenye voira Abisalawu ohomukanyiheda babaye ule ira amuhiye Aminoni adowe, babaye ule ohomurumelihaga Aminoni. Evale Aminoni vamohi na ahima a Davi amohiwa oindjiva kohodowaga. 28Evale Abisalawu ohawandelaga anamalabaye, liye ira: <<Nyo mwamuona mulombwana Aminoni aganna iyeziyezi, agali ohagalalene na vinyu, mwadivwa miyo duwandelani ira: <Kampeni!>, inafwanela mumpe. Kamuove, mwasiwa unaurumani gu miyo! Inafwanela mukale olimba kopolo ira muirena yenno inafuna miyo uwandelani.>> 29Evale anamalaba a Abisalawu ale kohoirana nnga mwemo mwawandeliwele atu, aliwa mpa mulombwana Aminoni. Evale mulombwana Aminoni agapiwe, ahima atene a Davi kohovenyaga, kada mutu liye gwela vakavaruni#13:29 vakavaruni: kavaru gu mwanainyama inapanduwa muwari mogumana wa buru wa mulombwana na kavalo ya muhiyana. vaye, aliwa tawa.
30Evale aliwa kagatawile, kahanafiye wa babiwa, kohokalawo atu kadowilege muwandela babiwa Davi ule ira: <<Eni mulombwana Abisalawu uhumala apa ahimawo atene! Kalivo uhanle nne mmohi!>> 31Mwene Davi agavwile enne ohovenyaga, liye kawula jowara jaye, liye gonati vati. Eto anamalabaye atene kafwanyeya vamohi na liye, na aliwene kohokawulaga jowara jiwa. 32Mbwenye mulombwana Jonadabe#13:32 Jonadabe ali wenne anvahile mulombwana Amoni zelru yomugonihana Tamari. mwana Simeya Davi mbalaye, ohomuwandelaga mwene Davi, liye ira: <<Mbwiyeni nyo kamukale okukumuwene ira ahiminyu atene kohokwa nari. Miyo nnaonamo ira ukwile gu mmohi bahi mulombwana Aminoni! Mwasiwa mulombwana Abisalawu aromileve kana yofunafuna yoira ampe romela siku Aminoni amugonnena liye murongoliye Tamari momuhindela. 33Nona inafwanela nyo mbwiyeni so mwene mwahakukumuwe ira atene kohokwa! So mbwenye ukwile gu Aminoni bahi!>>
34Eto fwanyeya ira mulombwana Abisalawu ohotawaga. Mwa tempu yenne muzombwe wenne anna mabasa oing'anela ndila#13:34 muzombwe wenne anna mabasa oing'anela ndila: Ora yenno musidadi mokala mutu akana mabasa oing'anela ndila ira aone yengo ili yatene yabure yafuna azela ira aawandele afwaye. ohaonaga atu oindjivene kaviraga ndila yafwanyeya pandi ya mwangoni. 35Mwa enne Jonadabe ohomuwandelaga mwene Davi, liye ira: <<Kaing'anani so mwene ahiminyu ale anazale. Na ibaribari pu mwemo nnga mwawongela miyo!>> 36Evale mulombwana Jonadabe amarihaga wonga pafiyaga ahima a mwene Davi, aliwa roma tomola kuto. Evale mwene Davi vamohi na anamalabaye atene kohoromaga nla valukulu vene.
37Mulombwana Abisalawu vampile liye mbalaye Aminoni, tawa watawile liye ule, adowile kala na mwene wa ilambo ya Jesuri aitaniwa Talimayi, mwana Amiyude.#13:37 adowile kala na… Talimayi, mwana Amiyude: Ku wonga mulombwana Abisalawu atawenle wa mbwiyaye. Tchoira Talimayi ali mmaye babaye. Nione 2 Samuweli 3:3. Eto mwene Davi okalave amukumbanyaga mwanaye Aminoni malambo matene. 38Evale mulombwana Abisalawu agatawenle ilambo ya Jesuri ule, ohomalawo yaka taru. 39Mwa enne eto mwene Davi ohoromaga musauwela mwanaye Abisalawu mwasiwa kumbanya waye zela mwanaye Aminoni wohomala, liye onaga ira umala kwa, kanawela.
Currently Selected:
2 Samuweli 13: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
