2 Samuweli 11
11
Muselu wa Davi na Bateseba mwadi Uriya
1Yaka imohi, maromelo wene, tempu inadowetcha amwene kondoni, mwene Davi ohomurumaga musogolrelri waye wa anyakondo Jowabe vamohi na andimuwaye a izo na aIzarayeli atene ira kadowe kawane na aAmoni. Evale aliwa kohodowa roma agondjiha aAmoni ale. Evale anyakondo a Izarayeli kohodowa irindja sidadi ya Raba.#11:1 sidadi ya Raba ali sidadi yawerewerihiwe na muru mulukulu. Ule akuma na ule avolowa, avira va mulango wa muru ule. Mbwenye mwa tempu yenne mwene Davi ahanlege Jeruzalemu.
2Siku nimohi na tchiguwo, mwene Davi ohovenyaga vakamani vaye vavuma liye, liye gwela vazulu va palasiyo yaye ya umwene, roma wendawendaga evale. Mwa enne agali vazulu evale, ohomuonaga muhiyana mmohi eni ahambaga. Fwanyeya ira muhiyanole ali muhiyana oriyetchetcha. 3Evale mwene Davi aganfukedile muhiyanole, ohowandeliwa ira: <<Muhiyanole gu Bateseba, mwana Eliyami, mwadi Uriya, nkuda Eti!>> 4Mwa enne Davi oharumaga atu ira kamudowele. Evale muhiyanole ohozaga wa mwene Davi. Agazile, Davi ohomugoniha. Fwanyeya ira muhiyanole tempu yenne era kumamo wene mmahambelo mwa ahiyana. Noira enne, muhiyanole ohomaruwaga, liye dowaga vande.
5Noira enne, muhiyanole ohokana vambani. Evale aganna vambani, ohorumihaga milanyo wa Davi ira: <<Miyo vere we udigoniha, dihikana vambani!>> 6Davi agavwile mazwale, ohorumihaga milanyo wa mulombwana Jowabe kondoni wali liye ira: <<Umurume mulombwana Uriya, nkuda Eti ira aze uno.>> Evale mulombwana Jowabe ohomurumaga mulombwana Uriya ira adowe wa mwene Davi. 7Mwa enne mulombwana Uriya ohokumaga kondoni wali liye, liye dowaga wa Davi. Agadowile, Davi ohonfukedaga zela mulombwana Jowabe na aIzarayeli atene vamohi na makalelo a kondo. 8Eto noira eno Davi ohomuwandelaga Uriya eraga: <<Uvenye, udowe vande vawo ira wavihuwe mendo, wavume!>> Evale mulombwana Uriya ere novenyavo vande va mwene Davi vale, mobaranya mwene Davi ohorumihaga jengo ira kanvahe mulombwana Uriya.#11:8 ohorumihaga jengo ira kanvahe mulombwana Uriya: Zela jengo jarumihilege liye jile, hiyo kaniiziwile. Amohiwa anawanganyeda ira ali jodja ira adjege vamohi na muhiyanaye. 9Mbwenye mulombwana Uriya vande vaye kadowilegevo, agonnege vamohi na anamalaba a mwene Davi, va mulango vovolowela vande va mwene vale. 10Evale Davi agaiziwile ira mulombwana Uriya kadowile vande, ohonfukaga ira: <<Mulombwana Uriya, weyo vande vawo uvenyilevo wanle, nnga mwasiwa gwa nni wahafunele we dowa vande?>> 11Evale mulombwana Uriya ohowakulaga eraga: <<Kaxa ya Yopangana na anyakondo a aIzarayeli vamohi na anyakondo a Juda atene anafwanyeya mmusasani! Eto musogolrelri waga Jowabe vamohi na andimuwa atene a anyakondo anafwanyeya vamisasani mukokolani! Nnga vinakale jowandeya avi ira miyo divenye didowe vande darome dja no ng'wa eto amala digone vamohi na muhiyanaga? Miyo mbwenye nnolumbela na nzina nenyu vamohi no kalawo wenyu ira kavili jowandeya ira miyo nnoirana jejo!>> 12Mwa enne mwene Davi ohomuwandelaga Uriya eraga: <<Tabo, peno ukale veva na miyo. Era eno metchelo miyo nnouruma ira udowege!>> Mwa enne mulombwana Uriya ohokalaga Jeruzalemu ule siku nenne fiyeda mmetcheloni muwa. 13Noira enne mmetcheloni muwa, mwene Davi ohomuitanaga ira adje eto ang'we vamohi na liye. Agazile ohodja vamentoni va Davi eto Davi ohomulrezelrihaga. Mbwenye nzuwa nagavirile, mulombwana Uriya kadowilege waniwa, ohogonaga vanipawuni vaye vamohi na anamalaba a mwene vagona atu.
14Evale mmetcheloni muwa, mwene Davi oholrembaga karta, liye nvaheda mulombwana Uriya ira: <<Karta ni uwelelena kondoni wakoka wene, udowe wanvahede mulombwana Jowabe.>> 15Mukartani mule alrembilegemo mazu oira: <<Unauwandela gu miyo mwene Davi. Miyo nnafuna mwawanaga, umutukule mulombwana Uriya, akale sogolro wewo usimbwile kala kondo, mmuhiyewo ekave ira liye alatiwe, akwe!>> 16Mwa enne mulombwana Jowabe agawatchenle karta nne, muwari morindja sidadile ira kagudjule, ohomutukulaga mulombwana Uriya, liye dowa muhela nimburo neno vafwanyeya amwidaniwa a kopolo. 17Alombwana a musidadi mule kagakumile ira kawane na mulombwana Jowabe, evale kohokwaga alombwana angasi angasi a anyakondo a Davi. Muwari mwa ale kakwile, mulombwana Uriya wenno ali nkuda Eti ule, na liyene ohokwaga.
18Noira enne, Jowabe ohomuruma mutu mmohi ira akume kondoni ule, adowe amuwandele mwene Davi zela jatene jaireyile kondoni ule. 19Eto ohomuwandelaga wenno amurumile liye ule, ira: <<Wadowa, wamala muwandela mwene jatene jiireyile kondoni uno, 20eto wamuona mwene atakaleliwa, awongaga ira: <Kodi mwasiwa gwa nni muza musimbwaga wandamela musidadi mwewa ira muwane? Kodi nyo kamwaiziwile ira aliwa anoimela vazulu va muru wa sidadi ira kavokege mafumo ewa? 21Kodi nyo kamunaumbuwela zela makalelo akwile mulombwana Abimeleki, mwana Jerubezeti? Tchoira agali sidadi ya Tebeji, ohokala muhiyana mmohi ali vazulu va muru wa sidadi avokile mwanapelo, dowa nfwanya mulombwana Abimeleki, liye fiyeda kwa! Nnga mwasiwa ali wa nni nyo muza musimbwaga wandamela muru wa sidadile?> Weyo wanvwa mwene awongaga eno, umuwandele ira: <Eto namalaba wenyu Uriya nkuda Eti, na liyene uhukwa!> >>
22Evale maliba rumiwa ule ohovenyaga, liye dowaga wa mwene Davi. Aganfwanyile mwene Davi, ohomuwandelamo jatene jamurumile Jowabe ira adowe amuwandele mwene. 23Ohomuwandelaga Davi eraga: <<Ii, amwidanihu nafuna hiyo awanana kali olimba bure nikwaranya hiyo. Evale aliwa kohokuma musidadi ira nidowe nawane unde wa sidadile. Mbwenye hiyo nohakanyihedave ira niwande aweliheda va mulango va sidadile. 24Evale aliwa kohokana aliba mafumo kafwanyeya vazulu va muru wa sidadile, aliwa romaga nivoka hiyo na mafumo ewa. Mwa eno, anyakondo enyu amohiwa kohokwa. Eto munyakondo wenyu Uriya nkuda Eti, na liyene uhukwa!>> 25Evale mwene Davi agavwile mazu anne ohomuwandelaga maliba rumiwa ule eraga: <<Wanfwanya mulombwana Jowabe wamuwandele ira ahakukumuwe zela jejo jiireyile. Mwasiwa supada nafunaga pa, kannasakulra. So mbwenye inamukokomeza miyo tchoira inafwanela awane mwa kopolo ira awande gondjiha sidadile. Wadowa wamulimbihena mazu anno.>>
26Evale mwadi Uriya agavwile ira: <<Mamunawo Uriya uhukwa!>>, ohomunlelaga valukulu. 27Noira enne, mwadi Uriya ule agamanle mukumbanya mamunaye, Davi oharuma atu, aliwa mudowela, muzana vande vaye. Evale ohokala muhiyanaye, liye fiyeda mbala mwana wa mwanapongwe. Mbwenye jatene jasakannye Davi Yehova kaziveliwile.
Currently Selected:
2 Samuweli 11: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
