2 Amwene 3
3
Tonga wa mwene Jorawu
1Mwene Jozafa agamanle yaka 18 aatongaga aJuda, tchi tempu Jorawu mwana Akabe aromile liye atonga aIzarayeli sidadi ya Samariya. Jorawu atongile yaka kumi na mbinli. 2Liye ohosakanya jabure vamentoni va Yehova. Mbwenye ubure waye kwasimbwile fiyeda nnga wa babaye nari ubure wa mmaye. Tchoira liye ohobwanyula ikwamutu yosema ya Baali yenno yasakanyile babaye. 3Masiki eno liye ohoirana yotega imohive ya Jerobowawu mwana Nebati, wenno aategihile aIzarayeli.#3:3 Jerobowawu mwana Nebati, wenno aategihile aIzarayeli: Jerobowawu ohosakanya ana ng'ombe mbinli ira dikale amilugu a aIzarayeli, liye awandela atu ira katamalelege. Nione 1 Amwene 12:26-33. Yotega yenno liye kahiyile.
Mwene Jorawu ohagumaniha amwene afwaye ira kadowe kawane na akuda Mowabe
4Mulombwana Meza, mwene wa akuda Mowabe, ali maliba fuwa mabila. Mwa enne liye muwari mogondjihiwa na aIzarayeli, aveleletcha wa mwene wa Izarayeli ana mabila okwakwana 100.000 vamohi na mawoya a mabila a alombwana 100.000. 5Fwanyeya ira mwene Akabe agakwile, mwene wa akuda Mowabe ule ohokonda tongiwa na Jorawu mwene muxa wa Izarayeli. 6Agaonne enne, mwene Jorawu ule ohokumaga Samariya tempu imohive yenne, liye dowa agumaniha anyakondo atene a Izarayeli. 7Eto ohorumihaga milanyo wa mulombwana Jozafa mwene wa Juda ira: <<Mwene wa akuda Mowabe unakonda tongiwa na miyo. Kodi weyo unodikamiheda ira nidowe kondoni nawane na akuda Mowabe?>> Evale mwene wa Juda ule ohowakula ira: <<Miyo kadinna makani, nnodowa vamohi na nyo. Miyo nnogumanela dikale na nyo, anyakondo aga anokala vamohi na anyakondo enyu eto kavalo daga nnokala vamohi na kavalo denyu!>> 8Noira enne, mulombwana Jorawu ohonfukaga eraga: <<Nnga nnafuna nihare ndila ivi?>> Evale liye ohowakula ira: <<Nnafuna nihare pandi ya kokola ya Edomu.>>
Mwene Jorawu ohodowa nfuka Elizewu zela makalelo kafuna atu gomela
9Mwa enne Jorawu mwene wa Izarayeli na Jozafa mwene wa Juda vamohi na mwene wa Edomu, kohomaruwaga kawendawendaga ante malambo matanu na menli. Mwa enne anyakondo kanna atu vamohi na anavinyama ewa kohomaleliwaga mahindje. 10Evale mwene wa Izarayeli ule owongaga eraga: <<Nihikwa hiyo! Kodi eni Yehova kanigumanihile hiyo amwene araru ira anivahede mmandani mwa akuda Mowabe?!>> 11Evale mwene Jozafa ohonfukaga, liye ira: <<Kodi uli hiyo uno kaliwo namafiyiheda wa Yehova ira ninfuke Yehova muwari mwa liye?>> Evale munyakondo mmohi wa mwene wa aIzarayeli ohowakulaga eraga: <<Uno ukalawo namafiyiheda mmohi unaitaniwa Elizewu mwana Safati, wenno ali nkamihedi wa Eliya.>>#3:11 wenno ali nkamihedi wa Eliya: MaBibiliya amohiwa anawonga ira: Wenno akutuleletcha mahindje mmandani mwa Eliya. 12Eto mwene Jozafa ohorumelelaga awongaga eraga: <<Mazu a Yehova anafwanyeya na liye.>>#3:12 Mazu a Yehova anafwanyeya na liye: Ku wonga Yehova unawonga muwari mwa liye. Noira enne, mwene wa Izarayeli, na mulombwana Jozafa, vamohi na mwene wa Edomu kohodowaga ira kawonge na Elizewu.
13Kaganfwanyile, Elizewu ohowongaga na mwene wa Izarayeli ule eraga: <<Miyo kadinna pandi na weyo. Udowe waafukege anamafiyiheda a babawo na anamafiyiheda a mmawo.>> Mbwenye mwene wa Izarayeli ule ohomukalelagave ntindi eraga: <<Nari, miyo kannarumela dowa afuka anamafiyiheda amohiwa. Tchoira Yehova uhunigumaniha hiyo amwene araru ira anivahede mmandani mwa akuda Mowabe.>> 14Evale mulombwana Elizewu ohowonga eraga: <<Miyo nnawonga vamentoni va Yehova wa Makuru Matene, wenno nnamulaba miyo ira ahakala mulombwana Jozafa mwene wa Juda aza, miyo kadauing'ana nne kadaubalra.>> 15Noira enne, ohowongagave eraga: <<Kadowani mwanvende maliba imba arpa mmuzena.>> Evale maliba arpa agazile, aimbaga, kopolo da Yehova dohomuzelaga Elizewu. 16Evale ohoromaga wonga eraga: <<Yehova unawonga ira: <Mudowe munkolopani mule, mwatimbe miliha didjindji.> 17Tchoira Yehova unawonga ira: <Miliha nnafuna nyo timba nnomala zala mahindje aharumbwile muzongwe nne mwahaonne nipevo niombaga. Mwa eno, nyo atene munofiyeda ng'wa mukwakwane vamohi na anavinyama enyu atene.> 18Eto jejo jinafuna ireya kahi yengo vamentoni va Yehova. Eto unouvahedani akuda Mowabe mmandani mwenyu. 19Eto nyo munofiyeda gudjula sidadi dewa dowerewerihiwa na muru vamohi na sidadi dindimuwa dosakulreya eto munogwada mitengo diwa dapama datene eto munovuhelela visime diwa datene da mahindje eto minda diwa datene dapama, nyo munomala vokedamo mabwe.>>#3:19 minda diwa datene dapama, nyo munomala vokedamo mabwe : Ilambo yali atu yohokana mabwe pwi. Ira atu kalime pama, karoma gumaniha mabwe kamba kamba. Vokedamo mabwe unawongiwa va ku wonga ali ira anyakondo ale kamale balaletcha mabwe pwi mmundani mule fiyeda aliwa hawandaga limamo na mwasa wa mabwe ale. 20Elizewu agawongile eno, mmetcheloni muwa na mabebehi, yagafiyile ora yenno inaveleletcha atu jovelela ja jodja, mahindje kohoromaga za kakumelaga pandi ya Edomu. Evale ilambo yatene yafwanyeyaga atu ile yohozalaga mahindje.
Gondjihiwa wa akuda Mowabe
21Evale akuda Mowabe kagavwile ira amwene araru ale kohomaruwa ira kadowe kawane na aliwa, kohagumanihaga alombwana atene kanna idadi yowanda dowa kondoni. Atene anne kagamanle gumana, kohodowaga mmadilreni mwa ilambo ya Mowabe na ilambo ya Edomu. 22Mwa enne, mmetcheloni muwa, akuda Mowabe ale kagavenyile na mabebehene, kagaonne nzuwa nimoneyaga mahindje ale, aliwa kaing'ana mahindje ale, kaona kagali ofilene kalaga nnga sangiri. 23Mwa enne kohokuwaga keraga: <<Kaing'anani sangiri! Eni amwene araru ale kera wana oka oka, aliwa fiyeda panana. Kavenyani atene nidowe natukulewo jengo jiwa jatene.>> 24Mbwenye akuda Mowabe ale kagafiyile vamisasani va aIzarayeli vale, aIzarayeli kohamarulaga, aliwa roma apa, fiyeda akuda Mowabe ale aliwa roma tawa. Evale aIzarayeli ale kohofiyeda avolowela akuda Mowabe ale mwilamboni mwewa, aliwa apagave. 25Eto kohogudjulaga sidadi da akuda Mowabe ale eto kada mutu otukulaga nibwe naye naye, aliwa vokelaga minda dapama da akuda Mowabe ale eto kohovuhelelaga visime diwa da mahindje eto kohogwihaga mitengo datene dapama dapama. So mbwenye sidadi yahabwanyunle atu, ali sidadi yaitaniwa Kiri-Harezeti. Evale aliba voka mabwe ale a amwene araru ale, kohoirindjaga sidadile, aliwa roma wanaga ira kagondjihe. 26Mwa enne mwene wa Mowabe agaonne ira: <<Eni nnagondjihiwa!>>, ohagumanihaga alombwana 700 okana masupada ira kadowe kawane na mwene wa Edomu evo vafwanyeya liye ira kawande ona tempu yotawa. Mbwenye tchawandile. 27Mwa enne liye ohomutukulaga mwanaye oroma wa mwanapongwe, wenno afuna hala vamalroni vaye liye agakwile, liye mpa, musakanya mukuto otumeya vamuruni va sidadile. AIzarayeli kagaonne ejile, kohokagana kukumuwa ulukulu zela jejo jairile mwene wa Mowabe ule.#3:27 AIzarayeli… kohokagana kukumuwa ulukulu zela jejo jairile mwene wa Mowabe ule. Inorutcha onelramo mwa ibaribari yaireyile eva. Tchoira maBibiliya amohiwa anawonga ira wohokala uwali waafwannye aIzarayeli. Kalaga nnga akuda Mowabe kagamuonne mwene wewa ampaga mwanaye, kohoatakaleliwa aIzarayeli, aliwa roma wanaga na kopolo. Na mwasa wenne, aIzarayeli kohomaruwaga, aliwa welelaga waniwa.
Currently Selected:
2 Amwene 3: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
