2 Amwene 11
11
Ataliya ohapiha atu a muibalini mwa mwene
1Mwene Akaziya mmaye, wenno aitaniwa Ataliya, agavwile ira: <<Mwanawo Akaziya uhukwa>>, ohovenyaga dowa apiha alombwana atene a muibalini mwa Akaziya ira mwene akale liyene. 2Mbwenye mwana mmohi gwavuluwile. Tchoira tempu yavenyile Ataliya aapaga ahima atene a mwene, mwene Jeyorawu mwanaye wa muhiyana aitaniwa Jeyozeba,#11:2 Jeyozeba ali mwadi namakuta Joyada. Nione 2 Koronika 22:11. Sogolro nnovwa ira mamunaye Joyada gwamuhambihile mwana wenno amukoyile Jeyozeba ira akale mwene. murongola wa Akaziya, ohomutukulaga mwana mmohi wa Akaziya aitaniwa Jowasi, wenno afuna piwa na afwaye, liye dowa nfungela na makayaya waye kwartuni. Mwa enne kohomukoya mwanole ira Ataliya ahawande mpa. 3Noira enne, Jeyozeba ule ohodowaga mutawiheda mwanole muNyumbani mwa Yehova fiyeda yaka tanu na imohi. Mwa tempu yenne Ataliya gwatonga mwilamboni mwa Juda mule.
Namakuta Joyada ohomuhambiha Jowasi umwene
4Evale yagafiyile yaka yanetanu na mbinli, namakuta Joyada ohaitanihaga andimuwa a anyakondo, vamohi na andimuwa a agwarda. Atene anne kohozaga, liye avolotchiha muNyumbani mwa Yehova mule. Aliwa kagavolowile, kohosakanyaga yopangana mwemule ira kamuhambihe Jowasi umwene, liye alumbeliha, nomala eno ohaonihaga mwanole. 5Liye eto oharuma eraga: <<Miyo duitanneni ira mulabe mabasa anafuna miyo uwandelani ala: Siku na sabado nafiya, nnafuna nimuhambihe Jowasi umwene. Muwari mwa agwarda anavolowa mabasani siku na sabado, kagaweye makuru mararu. Nikuru noroma kakale aliba ing'anela vande va mwene, 6nikuru nanembinli kadowe kakale mulango wa Suri eto nikuru naneraru kadowe kakale pandi ya unduli wa agwarda oing'anela vande va mwene ale. 7Era enne makuru menli amohiwa ohala anno anaweruwetcha siku na sabado, aliwa kamuing'anelege mwene Jowasi muwari mwa Nyumba ya Yehova. 8Era eno nyo aliba muing'anela mwene Jowasi, inafwanela munvelele pandi datene nnayege liye, mwagamuwerewerile, mwagamuhenle vari, mwaganna jowanana jenyu mmandani. Eto mutu wenne unavende jovolowa vari vale, inafwanela apiwe!>>
9Mwa enne siku na sabado nne nagafiyile, andimuwa a agwarda ale kohoirana nnga mwemo mwawongele namakuta Joyada ule. Kada mundimuwa ohotukulaga nikuru naye, roma aliba dowa laba mabasiwa siku na sabado vamohi na ale kakuma muwari mwa mabasiwa. Atene anne kohozaga wa namakuta Joyada. 10Evale namakuta ule ohavahaga mwanango na defeza dedo dali da mwene Davi, jejo jafwanyeya muNyumbani mwa Yehova. 11Mwa enne agwarda atene, kada mutu ohotukulaga jowanana jaye mmandani mwaye, aliwa tandana, romela pandi ya muwononi odjana wa Nyumba ya Yehova, aliwa vitandaga ante aliwa dowa iwerewera Nyumba ya Yehova ante aliwa dowa fiya vaibuwani fiyeda pandi ya muwononi woromana wa Nyumba ya Yehova ile. Aliwa mala vikoza ira kamuing'anele mwene. 12Noira enne, namakuta ule ohomukumihaga mwana mwene ule, aliwa muwariha tchapowa wa umwene, aliwa nvaha Livuru na Malamulo, aliwa muhambiha umwene. Noira eno, kohoromaga kuwa kaimbaga manda keraga: <<Mwene oye! Oye!>>
Piwa wa Ataliya
13Ataliya agavwile kuwa wa agwarda ale vamohi na atu, ohomaruwaga, liye dowa Nyumba ya Yehova wewo wafwanyeya atwale. 14Funa ing'ana jinaireya, unamuona mwene Jowasi agaimenle vanimbozoni nnga ilemelelo yanna amwene,#11:14 agaimenle vanimbozoni nnga ilemelelo yanna amwene: Malambo a mundulrimu amwene atene a Juda kohokana vanimbozoni viwa vaimeletcha atu. Nimbozo nenne nalaba ira mutu aimela evale, atu kamuone ira liye gu mwene. eto andimuwa a anyakondo ale vamohi na aliba imba palraza kagamuwerewerile mwene, atu atene a mwilamboni mule kahagalalaga, kaimbaga palraza. Mwa enne Ataliya ohokawulaga jowara jaye, liye roma kuwa eraga: <<Dihimala panganeliwa miyo! Dihimala panganeliwa.>> 15Evale namakuta Joyada ule ohawandela andimuwa a anyakondo ale eraga: <<Kamutukuleni muhiyanole, mudowe mwampe unde wa ntando na Nyumba ya Yehova ni. Mutu wenne unavende jomuhara, mumpe na supada.>> Namakuta ule eto ohowonga ira: <<So mbwenye kamumpele va Nyumbani ya Yehova va.>> 16Mwa enne kohomutukulaga muhiyanole, aliwa mudowana mulango ovolowela nimburo nakala kavalo da mwene, aliwa dowa mpela wewule.
Joyada ohawandaniha akoka aJuda na Yehova
17Noira enne, namakuta Joyada ule ohosakanyaga yopangana vamentoni va Yehova ira atu atene vamohi na mwene ule kakale atu a Yehova. Eto ohosakanya yopangana yoawandaniha atwale vamohi na mwene ule. 18Noira enne, atu atene a mwilamboni mule kohovolowaga nyumba ya mulugu Baali, aliwa ibwanyula nyumba yatene, vamohi na vibuwa daye datene, vamohi na vikwamutu josema jaye.#11:18 kohovolowaga nyumba ya mulugu Baali, aliwa ibwanyula nyumba yatene : Fwanyeya ira wohokala nyumba da Baali mbinli, imohi yali muwari mwa ilambo ya Juda, imohiwa yali ilambo ya Izarayeli. Nyumba inawongiwa va tcha Juda. Mbwenye Jewu gwabwanyula nyumba ya Baali yali Izarayeli. (10:27) Eto kohompaga mulombwana Matani namakuta wa Baali vasogolro va vibuwa da Baali.
Noira eno, namakuta Joyada ohasakulraga agwarda amohiwa ira kaing'anelege Nyumba ya Yehova ile. 19Evale ohatukulaga andimuwa a anyakondo ale, vamohi na asogolrelri ewa, na agwarda atene vamohi na atu atene a mwilamboni mule, aliwa mutukula mwene, kuma va Nyumba ya Yehova vale, aliwa vira va mulango va agwarda, mudowana nyumbani wa mwene. Noira eno, mwene ohodowaga garati vampandoni vaye va umwene. 20Evale atu atene a mwilamboni mule kohagalalaga. Mwa enne kagampile Ataliya na supada wandamelana vande va mwene vale, ilambwele yohovuma, aliwa garateya mwa murendele. 21Jowasi tempu yahambihiwa liye umwene anna yaka tanu na mbinli.
Currently Selected:
2 Amwene 11: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
