1 Tesalonika 5

Inafwanela ahima a Mulugu kawendege mmoneyani

1Abalihu, zela matempu na malambo anafuna za Yesu, kinafuneya ira nulrembelreni jengo jidjindji. 2Tchoira nyo muhumala iziwa ira siku na Nabwiya nnaza nize nnga mbava azaga na mahiyu. 3Atu kawongaga ira: <<Peno mbwenye kaninna makani. Ninna murendele>>, pa evale vanafuna za tolowa wewa morurumutcha, nnga jopa ja muhiyana afunaga bala. Kinakana makalelo ovuneya.

4Mbwenye nyo abalihu kamuli atu a muisini. Nona siku na Nabwiya kannaururumutchani nnga mbava. 5Nyo mwatene muli ahima a muwareyani, muli ahima a muntanani. Hiyo kanili atu a mmahiyuni eto kanili atu a muisini. 6Muwari moira kanili atu a mmahiyuni, kanigone nnga vini atu amohiwa, mbwenye inafwanela nikaleni orurumuwene eto nikaleni okozeyene. 7Tchoira ale anagona, anagona na mahiyu eto ale analrezelra, analrezelra na mahiyu. 8Mbwenye hiyo vano muwari mokala atu a ntana, inafwanela nikale okozeyene. Ira nikale okozeyene, inafwanela nitukule kamiza ya momba, niware. Kamiza inawongiwa ti nroromelo nehu no zivelana wehu. Nitukule eto kapaseti, niware. Kapaseti unawongiwa tchi yoing'anela yehu ira nivulusiwe.#5:8 kamiza ya momba… kapaseti ti jengo jowanana kondo. Tchoira mutu omuroromela Yesu unokana kondo inawana liye ira arambele jabure eto airegena japama. Nione Efezo 6:11-18; 1 Timoteyo 6:12; 2 Timoteyo 4:7.

9Tchoira Mulugu anisakulraga wanle, kanisakunlre ira nize nione takaleliwa waye wohokala wa masika, nari. Mulugu mbwenye unisakunlre hiyo vano ira nize niwatchele vulusiwa muwari mwa Nabwiya wehu Yesu Kiristu, 10wenno unikwenle. Masiki nikalewo, masiki nikwe, Yesu unikwenle ira nikalewo vamohi na liye. 11Nona inafwanela mutukule mazwala, muwandege kokomezana eto muwandege limbihana nngave vineretcha nyo.

Mazu ogomiheda okokomeza

12Hiyo nnoukokomezani nyo abalihu ira inafwanela mwarihedege andimuwa enyu analaba mabasa a Nabwiya, anausogolrelrani, anaulimbihani. 13Inafwanela mwarihedege aliwa pama moaziveliwa na mwasa wa mabasa analaba atu. Eto inafwanela muwendege na murendele nyoka nyoka mukalele nyo.

14Hiyo abalihu jimohi jinoukokomezani hiyo ti ji. Mwawendaga, mwamuona nfwinyu ohofuna hinda mabasa, inafwanela mmuwongena ira ahindege mabasa. Mwamuona nfwinyu owaheya, mmulimbihe. Mwamuona nfwinyu ovuta, mmukamihede. Inafwanela eto mukale atu ovilela na atu atenene. 15Mwamuona nfwinyu ira unafuna amuwelihede nfwaye kunyakunya, muwande muhiyiha. Mwaairelege atu atene upama masiki mukalele nyo nari atu atene.

16Inafwanela muhagalalege ora ili yatene, 17mulobelege ora ili yatene mohogoma 18eto mmutamalelege Mulugu zela jatene jinauirelani liye. Tchoira nyo mweragana eno, munalaba mabasa Mulugu ufunne liye zela hiyo atu nnafwanyeya muwari mwa Yesu Kiristu.

19Kamutimihe mabasa Munemba Otchena unalaba liye. 20Kamulramwise mazu ofiyihediwa. 21Mbwenye muxefwege jatene jinavwa nyo. Mwagaxefwile, muhidede ipama iwa. 22Eto muwande rambela yabure ili yatene.#5:21-22 muxefwege jatene jinavwa nyo: Ku wonga atu omuroromela Yesu kagumana, kavwa mazu ofiyihediwa, inafwanela kahanarumele, karome xefwa, kaone akala jinakokomeziwa jikumile muwari mwa mazu a Mulugu owu hehi. Eva anakokomeza ira muhidede ipama iwa… muwande rambela yabure ili yatene, tchoira aliba nama zela ja Mulugu kohoindjiva. (Galasiya 1:6-9; 2 Timoteyo 3:5; Titu 1:10-11)

23Mulugu wenno unanivaha murendele amale utchenihani ira siku nnafuna za Nabwiya wehu Yesu Kiristu, mufwanyeye mwapama, roma munemba wenyu, mmirimani mwenyu na maningwinyu, jatene jejo jifwanyeye mwapama. 24Mulugu wenno uuitanileni gororomeleya. Na ibaribari liye unoutchenihani.

25Abalihu hiyo nnouvepani ira munilobelelege. 26Mwaalondjelege abalihu atene na beju dotchenihiwa.#5:26 Mwaalondjelege abalihu atene na beju dotchenihiwa: Malambo a mundulrimu muwari molondjelana, atu a muibalini mmohive eto mutu na nfwaye kohokana makalelo olondjelana na beju. Na vanove muwari mwa atu anafwanyeya muwari mwa Kiristu inafwanela kakayena makalelo olondjelana ooniha muibalini muli atu muwari mwa Kiristu. Nione Roma 16:16; 1 Korinto 16:20. 27Miyo nnourumani vamentoni va Nabwiya ira mutukule mazu a karta ni, mwaavwihe abalihu atene.

28Sayi da Nabwiya wehu Yesu Kiristu dikale na nyo.

Kukala mazu a karta noroma nalrembiwele atu omuroromela Yesu a Tesalonika.

Currently Selected:

1 Tesalonika 5: iLolo

Highlight

Copy