1 Samuweli 24
24
Davi kafunile jompa mwene Sawuli
1Sawuli agamanle wana na aFilistewu, akumaga wene kondoni, ohowandeliwa ira: <<Eni mulombwana Davi unafwanyeya muisalesaleni mwa Eni-Jedi.>> 2Evale mwene Sawuli ohasakulragamo muwari mwa aIzarayeli alombwana oiziwa wana pama 3.000, liye aruma ira kamuhare Davi na atu aawendetchana liye. Evale aliwa kohovenyihana kadowaga wandamelana mabwe eni anaitaniwa Mabwe a Mbuzi da Mukokolani wewo wali Davi. 3Nimburo nenne yohokalawo ndila yodowa nifukwe nimohi eni wandamelana makolra kaheletchamo atu mabila kakumbuzaga. Tempu yenne Davi vamohi na alombwana aawendetchana liye, kohovolowa nifukwe nenne, aliwa vitala muwari bure. Evale Sawuli ohovolowa nifukwe nimohive neno mofuna ira aoze,#24:3 mofuna ira aoze: Oza uwa ku oza wonnya. Owu hehi mofuna ira avume. Tchoira inawongiwa eva tapulela uwa ihirutcha. ahaiziwaga ira Davi na atwaye kavitanlege muwari muwa.
4Evale alombwana kawendetcha na mulombwana Davi kagamuonne Sawuli agazile nifukweni wafwanyeya atu ule, kohomuwandelaga mulombwana Davi keraga: <<Peno mbwenye inaireya yenno yawongile Yehova ira: <Miyo nnouvaheda mwidanawo mmandani mwawo ira umuirele yenno inanfunana we!> >>#24:4 yenno yawongile Yehova: Alombwana a Davi kafuna nnga Davi ampe Sawuli. Muwari mwa eno, aliwa kamunukeda Mulugu mazu amohiwa ahawongile liye. Tchoira hiyo kanivwile ira Mulugu ohowonga na Davi ira: <<Miyo nnosakanya ira weyo uwande mpa Sawuli.>> So aliwa yenno kere wonga wene muwari momutuja Davi ira ampe. Mbwenye Davi kampilege, so avenyilege momuzembela, liye gwada magomo wa kapa ya mwene Sawuli, mwinnya ahaonagawo. 5Davi eto agagwadile kapa ya Sawuli ile, ohoromaga kumbanya mmirimani mwaye moira: <<Tchali yofwanela miyo gwada kapa yaye.>> 6Eto nomala ohowongaga na alombwana anne kafwanyeya na liye eraga: <<Miyo nnafuna ira Yehova awande dikamiheda ira miyo dahamuirele yabure ili yatene mbwiyaga Sawuli wenno Yehova umuhambihile liye ira akale mwene mwasiwa Yehova gumuhambihile.>> 7Mwa enne Davi ohaonelrihedagamo atu kafwanyeya na liye ale, liye akondihaga ira kahamuirele yabure mwene Sawuli.
Evale Sawuli ohovenyaga, liye kuma nifukweni ule, tukula ndilaye, liye dowaga. 8Mwa enne Sawuli agakumile, adowaga, Davi na liyene ohokumaga, liye roma muitanaga, liye ira: <<Mbwiyeni so mwene!>> Sawuli funa ing'ana mundulri, unamuona Davi. Evale Davi muwari momuriheda nnga mwene, ohomukokorelaga, aoramihedaga kove yaye vati. 9Evale Davi ohowongaga na Sawuli eraga: <<So mwene, kodi mwasiwa gwa nni nyo avuruwanaga atu anne anauwandelani ira: <Davi unafuna aupeni!>? 10Kaing'anani, peno eva eni nifukweni ule, Yehova ohodivaheda nyo mmandani mwaga. Atu anawenda na miyo kohodiwongana ira dupeni, mbwenye miyo kadifunile irana jejo. Eto dohawandela miyo ira: <Kannafuna muirela yabure mbwiyaga, mwasiwa liye gu mwene Yehova umuhambihile liye.> 11Kaing'anani babani, magomo wa kapa yenyu ila mmandani mwaga mu! Miyo gugwadile magomo wa kapa yenyu, mwagali nifukweni ule, mbwenye kadifunne upani. Nona peno munowanda iziwa eto munowanda kana ibaribari ira miyo kannafuna jowanaga na nyo andimuwa, nne kannafuna uirelani yabure ili yatene. Miyo dohoiziwa ira nyo na ibaribari munadisaka miyo ira mudipe. Mbwenye masiki eno, miyo kadusakanyeleni yabure. 12So mbwenye Yehova anitonge va hiyo ambinli wenne umutegenle nfwaye! Yehova eto autongeni na mwasa wa jabure jatene jidiirele nyo. Miyo mbwenye kannafuna uirelani yabure ili yatene.>>
13Davi ohowongagave eraga: <<Ikala imariya inawongiwetcha ira: <Yabure inaza muwari mwa atu abure!> Mbwenye miyo kannauireleni ibure na mwasa wa ubure mudiirele nyo. 14Nyo so mwene wa Izarayeli kaing'anani wenno munamuharahara nyo eto munamusaka nyo! Miyo dera diing'ane, miyo munadiharahara nyo nnafwanyeya dagali mwanambwa okwene, nari itutu yengo yohokana mabasa. 15So peno mbwenye jatene eji nnahiya mmandani mwa Yehova. Liye mwinnya gunafune ona jatene eji vamohi no mutonga wenno umutegenle nfwaye. Liyene gunafuna oniha ira miyo kadinna mulandu eto kadiirilena yabure. Eto liye gunafuna divunela mmandani mwenyu.>>
16Davi agamanle wonga jatene jejile, Sawuli ohowongaga, liye ira: <<Kodi unawonga kahi weyo mwanaga Davi?>> Evale Sawuli ohoromaga nla mokuwa. 17Nomala enne, ohomuwandela Davi, liye ira: <<Weyo uli wapama dikwaranya miyo. Weyo unadiireletcha japamave, agali miyo nnausakanya na makalelo abure. 18Weyo siku na peno uhudiirela upama, agali Yehova ohodivaheda mmandani mwawo ira udiirena yadifunana we eto we kudipile. 19Tchoira kaliwo mutu unamuhinda mwidanaye, amala amuhiya adowaga eno, ahamuirele yabure! Yehova aurelihe na mwasa wa jatene jidiirele we peno! 20Peno miyo dihikana ibaribari ira weyo unokala mwene. Eto watongaga, umwene wa aIzarayeli unerege wenda mwapama. 21Mbwenye miyo peno nnouvepa ira ulumbele na nzina na Yehova ira weyo wakala mwene, kuza udimeliha nzina naga muibalini mwa ababaga muwari moatolotcha ahimaga atene.>>
22Evale Davi oholumbelaga. Nomala eno, Sawuli ohowelelaga vande. Davi na alombwanaye mbwenye tchawenle na Sawuli. Aliwa kohowelela mundulri dowa nimburo nofwanela tawelamo.
Currently Selected:
1 Samuweli 24: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
