1 Samuweli 20
20
Yopangana ya Jonata na Davi
1Mwa tempu yenne Davi ohotawa Nayoti ilambo ya Rama wali Sawuli, liye dowa wafwanyeya Jonata. Aganfwannye Jonata, ohonfukaga eraga: <<Kodi miyo disakanyile yabure nni? Mulandu unna miyo gwa nni? Yotega tchivi isakanyile miyo yofwanela ira babawo adiharaharege ira adipe?>> 2Evale Jonata ohomuwakulaga eraga: <<Kuumbuwelege jejo. Weyo kunakwa! Tchoira babaga kanairana yengo ili yatene masiki iyeve nari iulukule ahanarome diwandela miyo. Kodi liye akala unodiwandeletcha jengo jatene, unoza adikuwe afunaga upa weyo? Jejo kajinaireya.>>
3Davi ohowongagave na Jonata eraga: <<Miyo nnalumbela ira babawo uhuiziwa ira weyo udifwewela murima. Nona liye hauwandelaga, mwasiwa uhuiziwa ira: <Mwanaga Jonata uhuwandana na Davi. Dera dimuwandele ira nnafuna dimpe Davi, liye unerege kana kukumuwa ulukulu mmirimani mwaye.> >> Davi ohowongagave eraga: <<Miyo mbwenye nnawonga vamentoni va Yehova okalawo eto nnawonga vamentoni vawo ira miyo na ibaribari eni ukwa unodihara, uli vakwikwive na miyo!>>
4Evale Jonata ohowonga na Davi, liye ira: <<Malringana inafuna we wonga, miyo nnoirana.>> 5Davi ohowakulaga, liye ira: <<Metchelo ti siku na pwando ya mwedi muxa. Eni ahakala mwene afunaga jodipa, miyo dogodowa dadje vamohi na mwene dahaovaga yengo. Mbwenye nnga liye unofuna jodipa, udihiye miyo ira metchelo davitale mmundani fiyeda ndawiyavano mmahiyuni muwa. 6Mbwenye babawo adifukedaga ira: <Davi liye hazavo vapwandoni vano mwasiwa gwa nni?>, umuwandele ira: <Liye udivepile miyo na ntindi ira dimuhiye adowe sidadi yaye Beleme tchoira atu a nlogo naye natene anafuna kavelele mukuto wa yaka.> 7Wawonga eno, unvwa liye arumela ira: <Ihikala pama!>, ku wonga miyo kadinna makani na liye. Mbwenye umuona liye atakaleliwa, weyo uvayele iziwa ira liye uhukanamo ira adiirele miyo yengo yabure. 8Nnouvepa ira udiirele miyo namalaba wawo upama, mwasiwa weyo wohosakanya yopangana yowandana na miyo vamentoni va Yehova. Mbwenye akala miyo duhusakanyela ibure, weyo udipe wa mwinnya, hiyaniha no divaheda mmandani mwa babawo ira adipe.>>
9Jonata ohomuwandela ira: <<Kuumbuwelege jejo! Kodi ahakanlege miyo diiziwa wanle ira babaga unofuna jouirela yabure, miyo vano kadaza duwandela?>> 10Davi ohowakula eraga: <<He, mogodiwandela. Nnga va, kodi babawo awakula motakaleliwa, unafuna za diwandela bani?>> 11Evale Jonata ohomuwandela Davi, liye ira: <<Ndowemo minda!>> Noira enne, kohomaruwa, aliwa dowa mmundani. 12Kagadowile mmundani mule, Jonata ohomuwandelaga Davi, liye ira: <<Miyo nnolumbela na nzina na Yehova Mulugu wa Izarayeli ira metchelo owu hehi ndawiyavano, miyo nnodowa damuwombeze babaga. Inaufunana liye yakala yengo yapama, ora yokala ha yenna miyo nnoza duwandele. 13Eto babaga afunaga jouirela yabure, miyo dahauwandele ira uvuluwe nari dahautawihe, Yehova aditonge na makalelo anafuna liye! Yehova ausogolrelre weyo na makalelo nnga amusogolrelra liye babaga malambo a mundulrimu. 14Miyo dakalagawove, dahakwe, nnafuna weyo udionihe zivela wohomala na makalelo nnga zivela unna Yehova ira miyo dahapiwe. 15Mbwenye dakwa, miyo dafuna ira ora Yehova inaza liye aapemo amwidanawo atene anafwanyeya mwilamboni yatene ya vati, weyo waaonihe atu atene a vande vaga zivela wawo wohomala malambo matene.>>#20:15 waaonihe atu atene a vande vaga zivela wawo wohomala malambo matene: Ira Jonata awonge na makalelo anno, liye ohokana ibaribari ira afuna kala mwene vamalroni va babaye ali Davi. Jonata kafunne Davi aairele ahimaye makalelo abure muwari moweliha kunyakunya zela jabure jaira babaye. Fwanyeya ira Davi agavahiwe umwene, liye ohoirana nnga mwanvepile nfwaye. (2 Samuweli 9:1-7) 16Jonata eto ohosakanya yopangana ira awandane na Davi na atu a muibalini mwaye eraga: <<Miyo so nnafuna Yehova aawelihede kunyakunya amwidani atene a Davi.>>
17Evale Jonata ohomuwongana Davi ira: <<Miyo nnafuna ulumbele akoka zela zivelana wehu.>> Jonata amulumbelihaga Davi fendo yanembinli ali na mwasa oira liye omuziveliwa nfwaye Davi ule nnga mwaviziveliwela liye mwinnya.
18Mwa enne Jonata ohowonga na Davi, liye ira: <<Metchelo ti siku na pwando ya mwedi muxa. Eto weyo wahakalevo, anouona ira: <Davi kazilevo.> mwasiwa mpando wawo kalivo unafuna garativo, unakalave eno vahali mutu. 19Ndawiyavano weyo udowe nimburo nenne navitanle we fendo ile, tempu yaromile makatamiho ala, udowe wavitale hela wa mabwe anaitaniwa Ezeli anafwanyeya wewule. Udidedihege wewo. 20Ndawiyavano miyo nnomuwandelamo babaga jatene jidiwandenle we. Damuwandelamo, yenno inadiwakule liye, nnoza duwandele. Makalelo anafuna miyo uwandela ba ala. Miyo nnafuna divokelewo mabweni ule mafumo mararu nnga nnafuna disurume yoterenarina ile.#20:20 disurume yoterenarina ile: Tempu yenno atu kotukula yengo, dowa ihela olapela wene. Amala aliwa vokaga mafumo ewa ira kakome vari va yengwele. Ku wonga ali nnga makalelo oterenari na mafumo ira kadowaga kondoni nari masayelo, kawande voka pama. Ali ira kahavonyege. 21Dera eno, nnomuruma muzombwe mmohi dire: <Kadowa wasayele mafumo divokile miyo ale.> Mwa eno, tempu inazege liye ira adode mafumo ale, udivwa miyo diwongaga ira: <Kudowege sogolro. Uzege uno. Tchoira mafumo davokile miyo kali pandi ya uno unafwanyeya we uno>, ku wonga ira jengo jihikala pama. Weyo podi kumawo nibweni ule. Miyo nnawonga vamentoni va Yehova okalawo ira udivwa miyo diwonga eno, kuove yengo ili yatene, kilivo yorutcha. 22Mbwenye udivwa miyo dimuwandelaga muzombwe ule diira: <Kadowagave, mafumo kamorele sogolro uwa ule>, ku wonga jengo kajili pama. Wadivwa diwonga eno, inafwanela weyo ugundeye udowege, tchoira tempu yenno Yehova unauruma ira udowege. 23Yehova gunafuna nihidedelagave umboni kala no kala ozela yopangana yehu nnasakanya hiyo peno ila.>> 24Noira enne, Davi ohodowaga mmundani, liye vitala wewule, nnga mwemo mwapanganele liye na nfwaye Jonata.
Jonata ohomutawiha Davi
Mwa enne nohofiyaga siku na pwando ya mwedi muxa. Evale mwene Sawuli ohozaga vameza, liye garati ira adje. 25Evale atu atenene kagagumanile, kada mutu ohogaratigi vampandoni vaye. Mwene Sawuli ohogaratigi mpando waye wakaletcha liye wandamelana ntchihini, liye muwandamela musogolrelri waye Abineri. Mwanaye Jonata liye kala sogolro waye. Fwanyeya ira vampandoni va Davi kavagaratilege mutu. 26Mbwenye Sawuli agaonne enne siku noroma nne kawongilegeve yengo, mwasiwa aumbuwelaga ira: <<Wenna afwase ikala mwana sanganiko iviringanihile liye, imutakalihile ira ahawande za peno.>>#20:26 Wenna afwase ikala mwana sanganiko iviringanihile liye: Mazu a Levitiku 7:21 anoniwandela ira aIzarayeli kafunaga sakanya pwando yodja nyama yohala ya mukuto, kababiha vitcheniha na makalelo kaiziwile atu. Muwari movitcheniha mule, vamohi viwa mutu kawanda kala wapama fiyeda mmetcheloni muwa. Ku wonga siku neno kavakala jowandeya ira ayewo pwandoni ule. 27Mmetcheloni muwa, siku nanembinli na pwando ya mwedi muxa, Sawuli ohoonaga ira nimburo na Davi nalive enne nnga mwaonele liye munziloni muwa. Evale Sawuli agaonne enne, ohonfuka mwanaye Jonata, liye ira: <<Nnga mwasiwa gwa nni mwana Jese ule ahazaga nzilo, nne peno ira adje pwando vamohi na hiyo atene?>> 28Evale Jonata ohomuwakula eraga: <<Davi udivepile na ntindi ira adowe waniwa Beleme. 29Liye adivepaga awongile ira: <Miyo nnavepa ira didowe Beleme mwasiwa metchelo atu a nlogo naga anafuna kavelele mukuto wa Yehova musidadi eto mbalaga urumihile milanyo ira miyo didowe. Akala unodifwewela murima, nnouvepa ira udihiye miyo didowe daaone abalaga.> Miyo murumeliha. Nona peno vampandoni va ahafwanyeyagavo.>>
30Evale Sawuli agavwile mazu anne, ohotakaleliwaga na makalelo ohokala a masika zela mwanaye Jonata eraga: <<We mwana mwanambwa we! Kodi weyo unaumbuwela ira miyo kadiiziwile ira weyo uhuwandana na Davi mwana Jese? Na mwasa wenno, weyo uhuvitatamulela manyazo vamohi na mmawo wenno uubanle. 31Weyo kunaiziwa ira mwana Jese wenno ahakwe, weyo kuza ukala mwene eto kuza ukana umwene muwari mwa ilambwela?! Kadowa wamutukule, umuzena tchineneva, akwe!>> 32Jonata ohonfuka babaye Sawuli eraga: <<Kodi Davi unapiwele nni? Liye utegile nni?>> 33Evale Sawuli agavwile mazu anfukaga mwanaye ule, ohosimbwaga mutakaleliwa mwanaye ule ante liye fiyeda tukula mwanango nvokana ira ampe. Jonata agaonne enne, pa evale vawandile liye kana ibaribari ira: <<Na ibaribari baba unofuna ira ampe Davi!>> 34Evale Jonata ohovenya vameza vale otakaleliwene na makalelo ohokala a masika. Siku nenne nagali siku nanembinli na pwando ya mwedi muxa, mbwenye Jonata kadjilege na mwasa okumbanya waye zela nfwaye Davi. Tchoira babaye Sawuli ohomuruwana Davi.
35Mmetcheloni muwa mulombwana Jonata ohovenyaga na mabebehi, liye mutukula mwana muzombwe, mudowana mmundani mule ira agumane na Davi nnga mwapanganne atu. 36Agafiyile mmundani mule, ohomuwandela mwana muzombwe ule, liye ira: <<Udowe wadode mafumo anno nnafuna miyo voka.>> Nomala enne, mwana muzombwe ule ohotamangaga, Jonata liye voka nifumo nimohi mukwaranyiha dowa morela sogolro uwa. 37Evale mwana muzombwe ule agafiyile vali nifumo vale ira adode, Jonata ohokuwa eraga: <<Nifumo nimorele sogolro uwa wo. 38Kuimele evo! Kabaranya, udowege sogolro!>> Evale mwana muzombwe ule ohododaga mafumo ale, liye welawo. 39Mbwenye muzombole kaiziwilege yengo tchivi. So mbwenye Jonata na Davi baiziwile na mwasa wa yopangana yewa.
40Evale Jonata ohotukulaga mafumo ale, liye nvaheda mwana muzombwe ule ira: <<Katukula mafumo ala, udowegena musidadi.>> 41Mwana muzombwe ule agavennyevo, Davi ohovituwa hela wa mabwe waligi liye ule, liye dowa vali Jonata vale, liye mukokorela fendo taru afiyihaga kove yaye vati. Evale aliwa kohobejarigina kanlaga. Eto nla wa Davi wohosimbwaga, hiyaniha no nla wa Jonata. 42Evale Jonata ohomuwongana Davi eraga: <<Udowe mwa murendele mwasiwa hiyo nihimala lumbela na nzina na Yehova ira: <Yehova gunafuna kala mboni zela wandana wa miyo na weyo eto zela ahimaga na ahimawo kala no kala.> >> Nomala enne, Davi ohovenyihanaga adowaga eto Jonata ohowelelaga musidadi mwakoka mwene.
Currently Selected:
1 Samuweli 20: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
