1 Samuweli 10
10
1Tempu yenne Samuweli ohotukulaga garafwa mwemo mwali makura, liye mukutulela mulombwana Sawuli vamuru, liye mbejari. Eto ohomuwandelaga, liye ira: <<Yehova gunauhambiha weyo peno va ira ukale mwene wa atwaye Ana Izarayeli. Weyo unerege atonga atu a Yehova eto unerege avunela mmandani mwa amwidaniwa atene. Jikalawo jitonyihedo taru jinafuna we ona jooniheda ira Yehova uhuuhambiha ira ukale mwene wa atwaye. 2Yoroma peno eni namwalana veva, weyo wadowaga vande, unoafwanya alombwana ambinli wandamelana vevo vakoyiwe Rakeli, muwari mwa ilambo ya Benjami, sidadi ya Zeliza. Waafwanya, aliwa anouwandela weyo ira: <Aburu anno waasaka we kohomala oneya. Eniva babawo kanakukumuwa zela aburu kadimenle, mbwenye unakukumuwa eto zela weyo ira: <<Dire avi ira dingumanena mwanaga?>> > 3Jagamanle ireya eno, ionihedo yowelela, wagadowile sogolro, wafiya vamutengoni va karvaliyo unafwanyeya ilambo ya Tabori, unoafwanya alombwana araru anno anadowa ilambo ya Beteli ira kavelele mukuto wa Mulugu. Mulombwana mmohi utukunle mbuzi taru ding'onong'ono, mulombwana mmohiwa utukunle pawu taru, mulombwana waneraru utukunle tembe munafwanyeya vinyu. 4Waafwanya, aliwa anoulondjela eto anouvaha pawu mbinli. Eto kauvaha, inafwanela uwatchele pawu dile. 5Jaireya eno, ionihedo yogomiheda, weyo uvenye udowe mwango wenno unaitaniwa Jibeya wa Mulugu, wewo unafwanyeya misasa da anyakondo a aFilistewu. Wavolowaga musidadi mule, unofwanya nikuru na anamafiyiheda katitelaga nimburo notama na mukuto, kakumaga ibuwani. Unaafwanya kaimbaga joimbana jiwa jinafwanyeya jagali lira, makotcho, mafalauta na arpa. Eto tempu yenno aliwa anerege wonga ja Mulugu. 6Era eno mobaranya Munemba wa Yehova unokala na weyo, evale unoroma kana makalelo a namafiyiheda vamohi na aliwa eto weyo mwa tempu yenne unotchindjeya ira ukale nnga mutu muxa. 7Waona ira jionihedo jatene jiwongile miyo ji jihimala ireya, usakanye jatene jinafune we, tchoira Mulugu unakalege na weyo. 8Usogolre wakale Jiligali. Wadowa, wadidedihege wewo malambo matanu na menli ira dize. Miyo nnoza digumane na weyo ira divelele mukuto otumeya, vamohi na jovelela ja murendele.#10:8 divelele mukuto otumeya, vamohi na jovelela ja murendele: Yovelela yotumeya yali mukuto owatchela jotega. Mukuto watene otumeyiwa. Yovelela ya murendele yali yovelela yomutamalela Mulugu zela upama waye. Mutu akutaga mukuto wa murendele, ku wonga ira: <<Miyo nnomutamalela Mulugu zela murendele unna miyo.>> Mukuto wa murendele ule, wa vang'ono otumeyiwa, wa vang'ono adja ali namakuta, ohala adja ali maliba velela. Era eno, miyo nnouwandela inafuna we ira.>>
9Tempu yenne Sawuli alanyana liye na Samuweli, Mulugu ohotchindja murima wa mulombwana Sawuli. Eto siku nenne kadowaga sogolro, jionihedo jatene jene Samuweli jamuwandenle liye johoireya. 10Sawuli na namalabaye ule kagafiyile ilambo ya Jibeya, kohogumanana nikuru na anamafiyiheda. Evale liye agagumanne na anamafiyiheda ale, Munemba wa Mulugu ohovolowaga mwa liye. Noira enne na liyene ohovolowaga kala na aliwa, liye roma wongaga ja Mulugu. 11Evale atu kamuiziwile wanle kagamuonne enne, kohoroma wonga keraga: <<Kodi ipanduwile nni na Sawuli mwana Kixi ula? Kodi liye wire sanduwa kala namafiyiheda wa Mulugu?>> 12Eto mulombwana mmohiwa akala wewule ohowongaga, liye ira: <<Aa, nnga anamafiyiheda amohiwala? Kodi aliwa ira kakale anamafiyiheda, ababiwa kere kala anamafiyiheda?!>>#10:12 ababiwa kere kala anamafiyiheda?! Ku wonga ira ohokalawo aaruniha aliba tikiniheya na Sawuli muwari moawumbutcheda ira mutu para kala namafiyiheda, kunazela wa babaye, mbwenye unazela mofuna mwa Mulugu. Evale paromile wongiwa imariya yoira: <<Kodi na Sawuli wenne gu namafiyiheda?>>#10:12 Evale paromile wongiwa imariya: Atu wanle kawongetcha imariya yoira: <<Kodi na Sawuli wenne gu namafiyiheda?>> Mazwala ba mazu kawongetcha atu kamuonaga mutu airagana yengo yotikiniha yenno nne ababaye kahawadile atu irana.
13Evale Sawuli agamanle wonga ja Mulugu, ohovenyaga, liye dowaga gwela nimburo notama na mikuto nne. 14Agafiyile wewule, ohonfwanya titiyu waye. Evale Sawuli titiyu waye ule ohonfuka Sawuli na namalabole, liye ira: <<Kodi nyo mwali waani?>> Sawuli ohowakulaga, liye ira: <<Hiyo naasaka aburu eto kanaaonne. Nomala eno, hiyo dowa nfuka Samuweli ira aniwandele wali atu.>> 15Evale titiyu waye ule ohonfuka, liye ira: <<Nnafuna mudiwandele, mwaganfwannye Samuweli, uuwandenleni avi?>> 16Sawuli ohowakula, liye ira: <<Liye uniwandenle mwa ibaribari ira: <Aburu enyu kohooneya.> >> Mbwenye joira Samuweli ohomuhambiha ira akale mwene, Sawuli kamuwandenle.
Sawuli ohambihiwa vamentoni va anamwindji
17Mwa tempu yenne Samuweli ohaitanihaga Ana Izarayeli ira kagumane ilambo ya Mizipa vamentoni va Yehova. 18Kagagumanne Mizipa ule, ohawandela eraga: <<Yehova Mulugu wa aIzarayeli unawonga ira: Miyo duhukumanani nyo ilambo ya Ijipitu eto duhuwombolani mmandani mwa aIjipitu na mmandani mwa maumwene matene kauzuzumihani. 19Mbwenye nyo peno muhumuruna Mulugu wenyu mmohive wenno unauwombolani muwari mwa makani enyu matene na makatamiho enyu matene. Muruna uwa, nyo muhuwonga na Mulugu ira: <Hiyo nnafuna munivahe mwene.> Tempu tchenna ira mugumane nyo mwatene vamentoni va Yehova. Mwazaga, mukale ogaweya malogo malogo eto kada nlogo nizege nikuru nikuru.>>
20Noira eno, Samuweli ohaitanaga malogo matene ira kaze vevale. Kagazile, kohosakanyaga jogu ya ngari.#10:20 jogu ya ngari: Makalelo a jogu ya ngari kohoindjiva. Makalelo kajogarile atu, kaniiziwile. Makalelo amohi, kalremba mazina a atu atene vapapelini, kada mutu papeli naye naye. Aliwa ahela mapapeli matene musakwini. Nomala eno, aliwa kutchakutcha, landa papeli nimohi. Ule afwanyeya agalrembiwevo, gwenno aganyalri. Ku wonga jogu ya ngari. Voira makalelo a jogu ya ngari kohoindjiva, kaniiziwile makalelo kajogarile atu. Evale ngari yagwenle nlogo na Benjami. 21Noira eno, Samuweli ohosakanyaga jogu ya ngari muwari mwa nlogo na Benjami. Mwa enne agweliwe ngari ali ziza na Matiri. Noira eno, kohosakanyaga jogu ya ngari muwari mwa alombwana a muibalini mwa Matiri. Evale agweliwe ngari ali mulombwana Sawuli mwana Kixi. Mbwenye funa nvenda Sawuli evale, tchamuonnegevo. 22Noira enne, kohonfuka Yehova, aliwa ira: <<Kodi mutu usakulriwe uli veva?>> Yehova ohowakula, liye ira: <<He uli veva. Eni uvikoyile ule unafwanyeya mitolro ule.>> 23Evale aliwa kohotamangaga, aliwa dowa mulanda mulombwana Sawuli, aliwa muzana. Fwanyeya ira liye ali mulombwana olapa bure akwaranya atenene. Liye aimela, atenene kamugomela mmafudini. 24Mwa enne Samuweli ohowonga na atu atene eraga: <<Wenna gu mulombwana wenno Yehova umusakunlre liye! Muwari mwa hiyo kalimo mulombwana okwakwanela na liye.>> Evale atu atene kohokuwaga keraga: <<Mwene oye! Oye!>>#10:24 Mwene oye! Oye! Owu hehi Mwene akayena ingumi no tonga.
25Nomala eno, Samuweli ohawandelagamo jatene jafuna atu muirelaga mwene na jejo mwene jafuna liye airelaga aliwa. Nomala oholrembaga jatene ejo mulivuruni, liye tukula livuru nne dowa hela vamentoni va Yehova.#10:25 dowa hela vamentoni va Yehova: Agali hiyo kaniiziwile ira vamentoni va Yehova ali vavi, afwase Samuweli ahenle livuru nowonga zela makalelo a umwene muwari mwa Musasa wa Yehova owu hehi wandamelana Kaxa ya Yopangana ya Yehova. Noira eno, Samuweli ohabalaletcha atu atene, aliwa dowaga mmavande mwiwa. 26Eto mulombwana Sawuli ohovenya, adowaga waniwa ilambo ya Jibeya. Liye adowaga, ohoveleliwaga na alombwana amohiwa anno Mulugu aasakwinyile liye mmirimani mwiwa. 27Mbwenye alombwana amohiwa otakala mirima, kohowongaga keraga: <<Iyaa, kodi Sawuli okala ha wenne unowanda niwombola mmandani mwa amwidani?>> Aliwa eto kohomulramwisa Sawuli fiyeda hanvaha mivaho nnga dedo danvaha atu amohiwa.#10:27 kohomulramwisa Sawuli: Keraga eno, kohomutegela Mulugu mwasiwa Sawuli asakulriwe na Mulugu hiya liye vikunga ekave ira akale mwene. (Ezodu 22:28; Roma 13:1-6; 1 Peduru 2:17) Mbwenye Sawuli ohomiyalaga jaye nne kawongilegeve yengo.
Currently Selected:
1 Samuweli 10: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
