1 Amwene 5

Mwene Salomawu ohomuwongana mulombwana Hirawu ira anvendele viga domangana Nyumba ya Yehova

1Fwanyeya ira mulombwana Hirawu, mwene wa Tiru ohowandana na Davi. Mwa enne agavwile ira mwene Davi uhukwa eto kamuhambihile mwanaye ira atongege vamalroni va babaye, oharumaga anamalabaye ira kadowe wa Salomawu. 2Evale mwene Salomawu ohorumihaga milanyo wa mwene Hirawu eraga: 3<<Nyo muhumala iziwa pama ira babaga Davi kawandile manga nyumba para nzina na Yehova Mulugu waye nitamaleliwegemo, na mwasa wa kondo danna liye awanaga na amwidanaye fiyeda Yehova atukula amwidanaye ahela vati va manyalo aye.#5:3 atukula amwidanaye ahela vati va manyalo aye. Mazu a Jozuwe 10:24 ananiwandela ira Jozuwe ohawandela andimuwa a aIzarayeli ira: mutukule manyalo enyu munyingale mmakohini mwa amwene ala. Yali ionihedo zela makalelo aIzarayeli kaagondjihile atu amwidani muwari mwa kopolo da Mulugu. 4Mbwenye Yehova Mulugu waga uhuwanda divaha vuma pandi datene. Miyo kadinna amwidani anaawanana miyo, nne ubure uli watene. 5Mwa eno, miyo nnafuna dimange nyumba para nzina na Yehova Mulugu waga nnga mwemo mwawongele Yehova na babaga Davi ira: <Mwanawo wenno nnafuna miyo muhela mpando wa umwene vamalroni vawo, liye gunafuna za manga Nyumba para nzina naga!> 6Mwa eno, miyo dafuna ira mwaawandele anamalaba enyu ira kakale vamohi na anamalabaga, kadowe kadigwadelege viga da seduru mwango wa Libano. Era eno miyo nnoapagalri anamalabinyu malringana jejo jinafune nyo. Tchoira muhumala iziwa ira muwari mwa atwaga kilimo atu owanda tcheka pama viga nnga atwinyu anakala muwari mwa sidadi yenyu ya Sidoni.>>

7Evale mwene Hirawu agavwile milanyo dokumela wa Salomawu dile, ohoziveliwaga valukulu. Mwa enne ohowongaga eraga: <<Atamaleliwe peno Yehova wenno unvahile mwene Davi mwana wa zelru ira aatongege aIzarayeli oindjivetchetcha!>> 8Noira eno, ohowelihaga milanyo daye para mwene Salomawu eraga: <<Miyo dihimala watchela milanyo dinyu. Mwa eno, miyo nnorumela yovepa yawo. Nnodowa dagwadihe viga da seduru vamohi na viga da faya. 9Era eno anamalabaga anotukula kumana mwango Libano, kadowena bara Mediteraniyo, era eno, anerege mangiha misumbu kabwinihege mwiko, katutumulege fiyeda nimburo neno nnafuna we ira kadowe kahiyege. Era eno anamalabaga anerege tapula mingohi diwa, anamalaba awo katukulege kadowegena. Mbwenye yodivaha inafuna miyo, so dafuna ira mudivahe jodja para anamalaba aga atene a vande vaga.>> 10Mwa enne mulombwana Hirawu ohonvaha mwene Salomawu viga da seduru vamohi na viga da faya dedo dafuna liye. 11Evale kada yaka, mwene Salomawu onvaha Hirawu masakwi 50.000 a utu wa tirigu na malituru 400.000 a azeti wapama wa mitengo da azeti ira Hirawu na anamalabaye kadjege. 12Yehova ohonvaha Salomawu zelru nnga mwapanganne liye. Mwa enne Salomawu ohosakanya yopangana yowandana na Hirawu, aliwa wendaga mwa murendele.

Mwene Salomawu ohogumaniha jomangana ja Nyumba ya Yehova

13Mwa enne mwene Salomawu ohasoka alombwana 30.000 a Izarayeli ira kalabege mabasa okanyihediwa. 14Nomala enne, ohomusakulraga mulombwana Adonirawu ira akale musogolrelri wewa. Evale mwene Salomawu ohagawaga atu atene anne makuru mararu, kada nikuru atu 10.000. Evale kada nikuru kamala mwedi mmohi kagali vamabasani mwango Libano, medi minli kagali vande. 15Eto mwene Salomawu ohokana atu 80.000 ogwada mabwe mmwangoni eto ohakana atu amohiwa 70.000 otukula mabwe. 16Eto fwanyeya ira kohokalawo alombwana amohiwa 3.300 aasakunlre liye ira kawandege asogolrelra atu atene kahinda mabasa matene anne. 17Evale mwene Salomawu oharuma alombwana ogwada mabwe ale ira kagwadege mabwe malukulu, kagali mabwe apama ofwanela sakanyana aliserisi wa Nyumba ya Yehova. 18Mwa enne anamalaba a mulombwana Hirawu na a Salomawu vamohi na alombwana amohiwa a sidadi da Jebali kohogwada mabwe vamohi na matabwa ira kawande mangana Nyumba ya Yehova.

Currently Selected:

1 Amwene 5: iLolo

Highlight

Copy

Compare