Banndi 15
15
1Jaabagol keesiniingol na jippina tikkere,
ammaa naawka na ummina ɓernde.
2Ɗemngal jom hakkillo na fooɗa ɓernde faro anndal,
de puuyɗo kaa, na ɓulna puuyndam.
3Gite Joomiraaɗo ina nji'a nokku fuu,
iɗe taykoo bonɓe e fonnditiiɓe.
4Haala peewka wo lekki nguurndam,
ammaa bonka kaa na halka ɓernde.
5Puuyɗo ina famɗina eeltol baaba mum,
ammaa jaɓoowo feloore laatoto jom caral.
6Jawdi keewndi ina woni ley suudu ponnditiiɗo,
de ɓeydaari bonɗo kaa, na wadda torra.
7Hunnduko jom hakkillo na yaltina anndal,
de ko puuyɗo kaa, worraa noon.
8Sadaka bonɓe na nyiddinii yeeso Joomiraaɗo,
ammaa du'aare dartiiɓe na weli mo.
9Laabi bonɓe ina nyiddinii yeeso Joomiraaɗo,
de jokkoowo ponnditiingol kaa, imo yiɗi ɗum.
10Jukkungo manngo na doomi celuɗo laawol goonga,
banyuɗo pelooje du maayan.
11Fay maayde e laahara
cuuɗaaki yeeso Joomiraaɗo,
sakko ɓernde ɓii-Aadama.
12Jalnortooɗo yiɗaa feleede,
o filataako tindinooje hakkilanteeɓe.
13Ɓernde welnde na laaɓina yeeso,
mettunde na nyawna joomum.
14Ɓernde jom paamal na tefa anndal,
hunnduko puuyɗo na heewi jaayre.
15Tampuɗo ina woni ley torra nyannde fuu,
ɓernde welnde wo weltaare wakkati fuu.
16Woodude seeɗa ley kulol Joomiraaɗo
na ɓuri jawdi ɗuunndi nder torra.
17Hiraande haako to yidde tawaa,
na ɓuri neemaade teewu ngaari payndi to nde walaa.
18Ɓernoowo law na fooɗa hamre,
de keesindiiɗo kaa na feewna nde.
19Laawol jaasuɗo na heewi gi'e,
de ngol dartiiɓe kaa, wo laaɓungol.
20Ɓiɗɗo jom hakkillo na seyna baaba mum,
de puuyɗo kaa, na famɗina inna mum.
21Puuyndam na weli mo walaa hakkillo,
jom paamal kaa, yaadu mum na dartii.
22Si waawɓe dabare ngalaa, dabare nyaamataa,
ammaa si iɓe ɗuuɗi, nde nyaaman.
23Jaabagol lobbol na hokka seyo,
haala kaalaaka wakkati kaanɗo.
24Jom caral ina njokka laawol ƴeeŋoowol to nguurndam,
ina sela jippotoongol to maayde.
25Joomiraaɗo ina sankita suudu mawnitiiɗo,
de imo reena halal maayraaɗo gorum.
26Miilooji bonɗi ina nyiddinii yeeso Joomiraaɗo,
haalaaji moƴƴuɗi kaa, ina mbeli mo.
27Suuno jawdi fewre na liɓa bone dow wuro,
calotooɗo yeeneede jawdi wuuran.
28Dartiiɗo ina miiloo de nootoo,
bonɗo kaa, na weƴƴa mbonka.
29Joomiraaɗo ina woɗɗii bonɓe,
ina hettindoo du'aare fonnditiiɓe.
30Ƴeewɗe gasuɗe na ceyna ɓernde,
kabaaru belɗo ina yamɗina ɓanndu.
31Kettintooɗo pelooje gasuɗe,
jooɗodoto e jom'en hakkillo.
32Caliiɗo tindinoore yawii hoore mum,
jaɓoowo pelooje kaa, heɓan paamal.
33Kulol Joomiraaɗo na tindina neɗɗo hakkillo,
sanaa neɗɗo leeƴina hoore mum, de teddinee.
Currently Selected:
Banndi 15: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
