Esaaya 9
9
1Yimɓe yahannooɓe ley nimre nji'ii jayngol manngol.
Annoora yaynanii jooɗinooɓe ley leydi niɓɓundi kurum ndiin.
2A ɗuuɗinii ɓe, a mawninii seyo maɓɓe.
Iɓe ceyoo yeeso maaɗa
hono no yimɓe ceyortoo wakkati tayri,
hono no mbeltortoo wakkati yeɗondirgol jawdi teetaandi wayɓe.
3Sabo a ittii ɓe e maccungaaku ngu ɓe torrirtenoo,
a taƴii dorri ɗi ɓe nyappirtenoo dow balaaje,
a helii sawru ganyo hono nyannde ɓe njaalinoo Madiyan.
4Paɗe konunkooɓe dampannooɓe leydi
e saayooji muɓɓen daasotonooɗi e ƴiiƴam
fuu paɗɗaama e lewngol faa laatake nyaamdu yiite.
5Sabo en ndimanaama suka,
en kokkaama ɓiɗɗo gorko.
O hokkaama laamu,
O inndirte: Tindinoowo Caahiiɗo, Laamɗo Jom Semmbe,
Baabiiwo Duumiiɗo, Laamoriiɗo Jam.
6O yaajinan laamu Daawda de o hokka ɗum jam mo timmataa.
O semmbiniran jooɗorgal laamu muuɗum
e sariya goongaajo e fonnditaare gilla joonin faa abada.
Wo yidde Laamɗo Jom Kammu e Leydi mawnde ndeen tabintinta ɗum.
Haala ɓuuye Samariya
7Joomiraaɗo neldii suudu Yaakuuba konngol faa sappana ɗum.
Ngol saamii dow Israa'iila.
8Yimɓe fuu nanan kabaaru majjum,
yimɓe Efrayim e jooɗiiɓe Samariya
haalirooɓe mawnitaare e ɓettaare na mbi'a:
9Cuuɗi men peraaje caamii,
ammaa en nyiɓtorto e kaaƴe cehaaɗe.
Cuuɗi ɗi leɗɗe sikomor ɗeen kelaama,
ammaa en loomtiniran ɗi e ɗi leɗɗe seddere.
10Joomiraaɗo umminanan ɓe wayɓe Resin.
O hokkan ɗum'en kaɓitirɗe.
11Araminkooɓe faro lettugal,
Filistiyankooɓe faro gorgal,
kappii Israa'iila, de moɗi ɗum.
Ammaa e noon fuu, tikkere Joomiraaɗo feewaay,
junngo makko du na heddii dow maɓɓe.
12Yimɓe ɓeen du, njeccaaki to piyannooɗo ɗum'en oon,
ɓe pilaaki Joomiraaɗo, Jom Kammu e Leydi oon.
13Ndeen Joomiraaɗo taƴi hoore e lacol fuu ley Israa'iila,
o soppi licce tamarooje e soɗorko fuu nyalaande wootere:
14Nayeejo e tedduɗo ngoni hoore,
annabaajo jannginoowo fewre woni lacol.
15Ardiiɓe lenyol ngool lallinii ngol.
Ardanooɓe ɓeen du njoolake.
16Wo saabe ɗum de Joomiraaɗo hinnataako jokolɓe ɓeen.
O yurmataako atiime'en e rewɓe maayraaɓe goriraaɓe muɓɓen.
Sabo ɓe fuu ɓe bonɓe, waɗooɓe ko boni.
Haalaaji bonɗi tan mburtotoo e kunnduɗe maɓɓe.
Ammaa e noon fuu, tikkere Joomiraaɗo feeway,
junngo makko na heddii dow maɓɓe.
17Sabo bonnde yonki na heddii na huɓɓa
hono no yiite nyaamirta gi'e e tuppe
e cukkuri faa cuurki ummoo noon.
18Leydi ndiin huɓɓii saabe tikkere Joomiraaɗo, Jom Kammu e Leydi mawnde ndeen.
Yimɓe leydi ndiin du laatake hono nyaamdu yiite.
Fay gooto hisintaa sakiike muuɗum.
19Yimɓe na ngappitira kuse e nyaamo,
ammaa e noon fu, na keddodii e rafo.
Iɓe olloroo nano ammaa ɓe kaaray.
Mono fuu na ƴakka teewu junngo muuɗum.
20Manasa na nyaama Efrayim,
Efrayim du na nyaama Manasa.
Ɓe kawritii iɓe kaɓda e Yahuuda.
Ammaa e noon fuu, tikkere Joomiraaɗo feeway,
junngo makko du na heddii dow maɓɓe.
Currently Selected:
Esaaya 9: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
