Esaaya 52
52
Haala gartol Joomiraaɗo ley Urusaliima
1Umma, umma!
Aan galluure Siyona, ɓorna semmbe maaɗa!
Aan Urusaliima, galluure seniinde,
ɓorna kaddule maaɗa ŋarɗuɗe ɗeen!
Sabo mo taadaaka e tuunɗo fuu naatataa e maaɗa katin.
2Fiɗɗu sollaare maaɗa de ummoɗaa.
Jooɗaa, aan Urusaliima!
Haɓɓitin ɓoggi kaɓɓaaɗi e daande maaɗa,
aan Siyona ɓiɗɗo debbo nanngaaɗo!
3Sabo inan ko Joomiraaɗo wi'i:
On connaama saabe ɓolum,
wooɗi du wanaa cardi waawi rimɗinde on.
4Sabo inan ko Laamɗo Joomiraaɗo wi'i:
Puɗɗam fuu, yimɓe am njehiino leydi Misira faa njooɗowoo toon.
Caggal ɗuum Asuurankooɓe torri ɗum'en dow ɓolum.
5De joonin le, noy ngaɗanmi?
Konngol Joomiraaɗo.
Yimɓe am nanngaama dow ɓolum!
Torrooɓe ɗum'en ɓeen na kuuɓa.
Konngol Joomiraaɗo.
Innde am na bonkee wakkati fuu!
6Saabe ɗuum de yimɓe am ɓeen annditan innde am.
Saabe ɗuum de ɓe paaman nyannde majjum
ko miin woni kaaloowo oon.
Inani kam!
7Koyɗe jottinoowo kabaaru lobbo na ŋarɗi dow baamle!
Gooynotooɗo jam, kumpitoowo kabaaru lobbo,
gaddoowo kisindam, bi'oowo Siyona:
Laamɗo maaɗa wo kaananke!
8Hettina doomooɓe maaɗa ɓeen na kuuɓa.
Iɓe ƴeewnoo e daande wootere iɓe ilinoroo seyo,
sabo ɓe nji'irii e gite maɓɓe
Joomiraaɗo na yeccoo Siyona.
9Onon bille Urusaliima, kawritee ilinoree seyo!
Sabo Joomiraaɗo waaltinan ɓerɗe yimɓe muuɗum.
O rimɗinan Urusaliima.
10Joomiraaɗo ɓanginii baawɗe muuɗum e senaare muuɗum yeeso lenyi fuu.
Keeri leydi fuu nji'an kisindam Laamɗo meeɗen.
11Ndillee! Ndillee! Mburtee ɗoo!
Taa meemee ko tuuni!
Mburtee e mayre!
Laaɓinee ko'e mooɗon,
onon ronndotooɓe gineeji Joomiraaɗo.
12On mburtortaako e haro haro, on ndoggataa,
sabo Joomiraaɗo ardoto on.
Laamɗo Israa'iila reeniran on gaɗa.
Haala maccuɗo Joomiraaɗo
13Inan, maccuɗo am heɓan daliili.
O teddinte, o toownete, o heɓan teddeengal manngal.
14Hono no kulol nanngiri yimɓe heewɓe saabe makko,
ko alhaali makko waylitinoo faa nanndaa e tagaaɗo,
yeeso makko wa'aano hono ngo ɓii-Aadama katin,
15noon ƴiiƴam makko laaɓinirta lenyi ɗuuɗɗi.
Kaanankooɓe ommban kunnduɗe muɓɓen yeeso makko,
sabo ɓe nji'an ko ɓe kumpitaakano,
ɓe paaman ko ɓe nanayno abada.
Currently Selected:
Esaaya 52: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
