Esaaya 50
50
Laamɗo na woodi baawɗe hisinde
1Inan ko Joomiraaɗo wi'i:
Toy talkuru ceergal ndu kokkumi innii on nduun woni?
Yalla moy e hakkunde joganiiɓe kam nyamaale ɓeen connirmi on?
Wo saabe lutti mooɗon de connaɗon.
Wooɗi du, wo saabe hakkeeji mooɗon de innii on seeraa.
2Mi warii, de ko saabii de fay gooto tawaaka?
Mi noddii, de ko saabii de fay gooto nootaaki?
Yalla junngo am na raɓɓiɗi faa waawataa hisinde on naa?
Yalla mi walaa semmbe baawɗo dannude on naa?
Si mi felɓii maayo fu, ngo yooran.
Miɗo waɗa gooruuji laatoo leydi njoorndi.
Liƴƴi majji mbaatan saabe ɗomka.
Ɗi nyolan saabe rafi ndiyam.
3Miɗo ɓoorna kammu nimre
de mi suddira ɗum e bootooru.
Haala maccuɗo Joomiraaɗo,
4Laamɗo Joomiraaɗo hokkii kam ɗemngal kaaloowal ko wi'i,
faa mi annda no cemmbinɗiniranmi tampuɗo.
Subaka fuu imo findina kam.
Imo findina nowru am
faa mi hettindoo hono no taalibaaɓe kettinortoo noon.
5Laamɗo Joomiraaɗo omtii nowru am
de miin du, mi muurtanay mo,
mi tottitaaki yeeso makko.
6Mi wattii kunkuuru am e juuɗe fiyooɓe kam,
boke am du e juuɗe ɗoofooɓe waare am.
Mi tottitaaki jennooje e tuttaaɗe.
7Ammaa Laamɗo Joomiraaɗo wallii kam.
Saabe ɗuum de mi semtay.
Wo saabe ɗuum de njoornumi yeeso am hono tuntere
sabo miɗo anndi mi semtintaake.
8Carantooɗo kam goonga oon na ɓadii!
Moy suusi dilude kam feloore?
En njaada sariya!
Moy waawi ɗalude kam goonga?
Joomum ɓattoo kam!
9Laamɗo Joomiraaɗo wallan kam.
Moy waawi hiitaade kam?
Ɓe fuu ɓe kalkan, ɓe ceekoo hono tekkere.
Mooƴu nyaaman ɓe.
10Moy hakkunde mooɗon woni kuloowo Joomiraaɗo,
kettinantooɗo maccuɗo muuɗum?
Jahoowo ley nimre,
mo jayngol walanaa ɗum fuu watta hoolaare muuɗum e innde Joomiraaɗo
de yowa jikke muuɗum e Laamɗo muuɗum.
11Onon huɓɓooɓe yiite,
onon fiɗooɓe kure kuɓɓooje,
on naatidan e yiite mooɗon ngeen,
onon e kure mooɗon ɗe kuɓɓuɗon ɗeen fuu!
Wo e junngo am ɗum hewtortoo on.
On pukkodoto e torra!
Currently Selected:
Esaaya 50: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
