Esaaya 31
31
Misira wanaa alla, wo ɓii Aadama tan
1Bone woodanii yahooɓe leydi Misira faa pilowoo mballa,
yowuɓe jikke muɓɓen dow pucci,
wattuɓe hoolaare muɓɓen e torkooji pucci saabe ɗuuɗal muɓɓen
e waɗɗiiɓe pucci saabe semmbe muɓɓen mawɗo,
de ndaarataa faro Ceniiɗo Israa'iila, pilataako Joomiraaɗo.
2Ammaa kanko du, na o woodi hakkillo.
O waddan torra dow bonɓe.
O fiirtataa ko o wi'i ɗuum.
O ummanto suudu bonɓe
e wallitooɓe waɗooɓe hakke.
3Misirankooɓe nganaa alla, wo ɓiɓɓe Aadama tan.
Pucci muɓɓen ɗiin du nganaa ruuhu, wo teewu tan.
Nde Joomiraaɗo foorti junngo muuɗum fu,
dannoowo fergoto, danneteeɗo saaman
de ɓe fuu ɓe timma.
Joomiraaɗo woni deenoowo Urusaliima
4Sabo inan ko Joomiraaɗo wi'i kam:
Hono no laddeeru, no ɓii laddeeru ubbirta dow ko nanngi,
fay ko durooɓe ɗuuɗɓe kawriti faa kaɓda e muuɗum ɗuum fu,
pelɓaali muɓɓen kulɓinaay ndu
ɗuuɗal muɓɓen taƴay nesi mawru.
Wo hono noon Joomiraaɗo Jom Kammu e Leydi oon jipportoo
dow waamnde Siyona e tile muuɗum faa waɗa konu.
5Hono no pooli mbeeyirta dow cuuɗi muɓɓen noon,
wo noon Joomiraaɗo Jom Kammu e Leydi oon reenirta Urusaliima.
O suuran de o danna.
O reenan de o hisina.
6Israa'iilankooɓe, njeccee to Laamɗo mo muurtanɗon sanne oon. 7Nyannde ndeen, mono fuu faɗɗan tooruuji muuɗum ɓoli gaɗiraaɗi kaŋŋe e cardi, ɗi juuɗe mooɗon hakkeeje ngaɗi ɗiin.
8Kaafaahi caaminoohi Asuura kiin wanaa ki ɓii-Aadama.
Wanaa kaafaahi ɓii-Aadama nyaamata ɗum.
Asuura doggan faa hisina hoore muuɗum e kaafaahi kiin.
Ndeen jokolɓe muuɗum ngollinte golle tiiɗɗe.
9Ko laatii ndeenaagu makko ɗuum saaman saabe kulol.
Ardiiɓe makko ndiwnan kulol yeeso darapo konu oon.
Noon Joomiraaɗo mo yiite muuɗum woni ley Siyona,
mo duɗal muuɗum woni ley Urusaliima oon wi'i.
Currently Selected:
Esaaya 31: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
