Esaaya 19
19
Annabaaku dow Misira
1Annabaaku dow leydi Misira.
Inan Joomiraaɗo dow ruulde yaawunde,
imo wara ley leydi Misira.
Tooruuji Misira na ndiwna yeeso makko.
Ngorgu Misirankooɓe taayii ley deedi muɓɓen.
2Mi umminan fitina hakkunde Misirankooɓe
de mono fu haɓda e sakiike muuɗum
mono fuu nyakkondira e banndum,
galluure ummanto galluure,
laamu ummanoo laamu.
3Hakkillooji Misirankooɓe njiiɓondiran.
Mi halkan dabareeji maɓɓe.
Ɓe ndaarnowan to tooruuji e gollidooɓe e beeli maayɓe,
e daggadaaɓe e sukunyaaɓe.
4Mi wattan Misirankooɓe e juuɗe laamiiɗo mo walaa yurmeende.
Kaananke kirƴuɗo dawranan ɓe.
Noon Joomiraaɗo, Laamɗo Jom Kammu e Leydi oon wi'i.
5Diyeele lallan e maayo.
Gooruwol manngol ngool hoortan faa yoora.
6Ndiyam calɗi gooruwol ngool luuɓan.
Calɗi Nil koortan faa nde'a.
De huɗo e soɗorko daande maayo fuu ɗayla.
7Buuluuɗe piilol Nil e daande muuɗum,
huunde fuu ko fuɗata ɗakkol gooruwol manngol ngool fuu
yooran de henndu ruuyna ɗum.
Faa'e heddataako.
8Liƴƴotooɓe uuman.
Faɗɗooɓe liƴƴorɗi ley gooruwol Nil ɓeen fuu mbullan.
Feertooɓe ɓoggi dow ndiyam ɗaam fuu pooƴan.
9Waɗirooɓe kaddule e leppi buge ɓeen cemtan.
Rewɓe mottooɓe e worɓe sannyooɓe fuu nga'an hono nyawɓe.
10Sannyooɓe ley leydi ndiin fuu niisete.
Gollooɓe yoɓeteeɓe fuu mettorte.
11Si goonga kaanankooɓe So'an na laatii fuuyɓe,
tinndinooɓe kaananke Fira'awna na laatii jamaare haaŋaaɓe.
Noy cuusirɗon wi'ude Fira'awna:
Miin mi jom hakkillo, miɗo jeyaa e ƴuwdi kaanankooɓe arandeeɓe.
12Aan kaananke, toy jom'en hakkillo maaɗa ɓeen ngoni?
Ndelle ɓe anndine wooɗi du yimɓe fuu paama
ko Joomiraaɗo, Jom Kammu e Leydi oon anniyii waɗude leydi Misira.
13Mawɓe leydi So'an laatake fuuyɓe.
Ardiiɓe Memfis na kiila ko'e muɓɓen.
Hooreeɓe lenyi Misira ɓeen na majjina ɗum.
14Joomiraaɗo wattii e maɓɓe ruuhu jiilol
faa ɓe lallinira Misira e golleeji muuɗum ɗiin fuu,
hono no culiiɗo tallortoo nder tuure muuɗum noon.
15Fay gooto waawataa waɗude faa'e ley Misira katin,
gilla suka faa e mawɗo,
gilla jom jawdi faa e talkaajo.
Haala ko waranta Misira jaango
16Nyannde ndeen leydi Misira laatoto hono rewɓe ɓe kulol nanngi faa na ndiwna wakkati nji'i junngo Joomiraaɗo Jom Kammu e Leydi na sappii ɗum'en. 17Leydi Yahuuda laatoto kulol Misira. Nde innde Yahuuda inndaa yeeso Misira fu, diwnan saabe ko Joomiraaɗo Jom Kammu e Leydi anniyii waɗude Misira ɗuum.
18Nyannde ndeen, galluuje Misira joy kaalan ɗemngal yimɓe Kanaana de ɓe kunoo ɓe kaɓɓondiran e Joomiraaɗo Jom Kammu e Leydi. Galluure wootere inndirte Galluure Halkere.
19Nyannde ndeen Joomiraaɗo nyiɓante sakkirde hakkunde leydi Misira. O darnante du bimmbeere faro keerol leydi ndiin. 20Ɗum laatoto maande e seedaaku saabe Joomiraaɗo Jom Kammu e Leydi nder leydi Misira toon. Nde ɓe mbullitowii to Joomiraaɗo saabe torrooɓe ɓe fu, o neldan ɓe kisinoowo jaɓtinanoowo ɓe de danna ɓe. 21Joomiraaɗo anndinan Misirankooɓe mo laatii. Kamɓoy du paaman moy woni Joomiraaɗo. Ɓe ɗowtoranto mo e sadakaaji e dokke. Ɓe ngaɗan kunayeeje to Joomiraaɗo de ɓe kiɓɓina ko ɓe kunii ɓe ngaɗan ɗuum. 22Noon Joomiraaɗo tappirta Misirankooɓe ammaa o dannan ɗum'en. Ɓe njeccoto to Joomiraaɗo de kam du jaɓɓoo ɓe, danna ɓe.
23Nyannde ndeen laawol seekete hakkunde leydi Misira e ndi Asuura. Yimɓe Asuura njahan Misira, Misirankooɓe du, njahan Asuura de yimɓe Misira e ɓe Asuura kawrita ɗowtanoo Joomiraaɗo.
24Nyannde ndeen Israa'iila laatoto leydi tataɓirdi hakkunde leyɗe barkinaaɗe ley duuniyaaru, tawti Misira e Asuura. 25Joomiraaɗo Jom Kammu e Leydi barkinan wi'a: Barke woodana Misira, lenyol am e Asuura, golle juuɗe am e Israa'iila, ndonngu am.
Currently Selected:
Esaaya 19: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
