Fuɗɗoode 46

No Yaakuuba e koreeji muuɗum ngardi Misira

1Israa'iila eggidi e ko mari fuu. O yottii Beerseba, ɗoon o waɗani Laamɗo baabiiko Isiyaaka kirsamaaji.

2Laamɗo haaldi e Israa'iila ley koyɗol jemma majjum, wi'i:

— Yaakuuba! Yaakuuba!

Yaakuuba nootii, wi'i:

— Inani kam.

3Laamɗo wi'i:

— Miin woni Laamɗo, miin woni Laamɗo bammaa. Taa hulu yaade Misira, sabo wo toon ɗuuɗinanmi ƴuwdi maaɗa. 4Mi yaadan e maaɗa Misira, mi wurtinoyte du. Si a maayii du, wo juuɗe Yuusufi pay culmata#46:4 Ɗum na holla, e juuɗe Yuusufi, o maayata. gite maaɗa de mooɓe.

5Yaakuuba ummii Beerseba. Ɓiɓɓe Israa'iila nanni baaba muɓɓen Yaakuuba e ɓiɓɓe muɓɓen e rewɓe muɓɓen ley torkooji ɗi Fira'awna neldi ngadda ɗum'en ɗiin. 6Ɓe kooƴi daabaaji maɓɓe e jawdi maɓɓe ndi ɓe keɓunoo ley leydi Kanaana. Yaakuuba yehi Misira, kam e koreeji muuɗum fuu. 7O dillidi e ɓiɓɓe makko worɓe e taaniraaɓe makko worɓe e ɓiɓɓe makko rewɓe e taaniraaɓe makko rewɓe e koreeji makko fuu, ɓe njehi leydi Misira.

8Inan ɓiɓɓe Israa'iila warɓe Misira, ɗum woni Yaakuuba e ɓiɓɓe muuɗum. Afo Yaakuuba wo Ruben. 9Inan ɓiɓɓe Ruben worɓe: Henok e Pallu e Hesron e Karmi. 10Ɓiɓɓe Simeyon worɓe wo: Yemu'el e Yamin e Ohada e Yakin e Sohar e Sawulu, ɓii Kanaaninke debbo. 11Ɓiɓɓe Lewi worɓe wo: Gerson e Kehat e Merari. 12Ɓiɓɓe Yahuuda worɓe wo: Er e Onan e Sela e Peres e Jerak. Ammaa Er e Onan maayii leydi Kanaana. Ɓiɓɓe Peres worɓe wo: Hesron e Hamul. 13Ɓiɓɓe Isakar worɓe wo: Tola e Puwa e Yoba e Simron. 14Ɓiɓɓe Jabulon worɓe wo: Sered e Elon e Yahalel. 15Ɓeen ngoni ɓiɓɓe Leya worɓe ɓe o rimani Yaakuuba nde ɓe ngonnoo Padan-Aram, kamɓe e Dina ɓiyiiko debbo. Ɓiɓɓe e taaniraaɓe ɓe Yaakuuba heɓidi e deekum Leya ɓeen fuu wo 33 worɓe e rewɓe. 16Ɓiɓɓe Gad worɓe wo: Jifiyon e Haggi e Suni e Esbon e Eri e Arod e Areeli. 17Ɓiɓɓe Aser wo: Yimna e Yiswa e Yiswi e Beriya e Serak, sakiike maɓɓe debbo. Ɓiɓɓe Beriya worɓe wo: Heber e Malkiyel. 18Ɓeen ngoni ɓiɓɓe Jilpa mo Laban hokkunoo ɓiyum Leya, ɓeen Jilpa rimani Yaakuuba. Ɓe fuu wo ɓe 16. 19Ɓiɓɓe Rahiina dee Yaakuuba, worɓe wo: Yuusufi e Benyamin. 20Ɓiɓɓe Yuusufi worɓe rimaaɓe leydi Misira ɓeen wo: Manasa e Efrayim. Wo Asanata, ɓii Potifera almaami wuro Oona oon rimani ɓe Yuusufi. 21Ɓiɓɓe Benyamin worɓe wo: Bela e Beker e Asbel e Geera e Na'aman e Eki e Roos e Muppim e Huppim e Arda. 22Ɓiɓɓe e taaniraaɓe ɓe Yaakuuba heɓidi e deekum Rahiina ɓeen fuu wo 14. 23Ɓii Dan gorko wo Husim. 24Ɓiɓɓe Naftali worɓe wo: Yassiyel e Guni e Yeser e Sillem. 25Ɓeen ngoni ɓiɓɓe Bilha mo Laban hokkunoo ɓiyum Rahiina. Ɓeen Bilha rimani Yaakuuba. Ɓe fuu wo ɓe njeɗɗo. 26Ɓiɓɓe e taaniraaɓe Yaakuuba, yaaduɓe e muuɗum Misira, fuu wo yimɓe 66, deekiraaɓe ɓiɓɓe muuɗum limaaka. 27Ɓiɓɓe Yuusufi worɓe rimaaɓe Misira wo ɗiɗo. Yimɓe suudu Yaakuuba yottiiɓe Misira fuu wo 70.

28Yaakuuba neli Yahuuda ardoo yaha to Yuusufi, faa Yuusufi sappoo ɗum laawol Goosan. Nde Yaakuuba e koreeji muuɗum njottinoo leydi Goosan ndeen, 29Yuusufi segilii torkooru pucci muuɗum, yehi faa jakkitowoo bammum Goosan toon. Nde o yi'unoo ɗum ndeen, o mumilii ɗum, o woyi faa ɓooyi. 30Israa'iila wi'i Yuusufi:

— Joonin miɗo waawi maayude, sabo mi yi'ii yeeso maaɗa, mi faamii aɗa wuuri.

31Yuusufi haalani mawniraaɓe muuɗum worɓe e yimɓe suudu bammum fuu, wi'i:

— Mi yahan mi haalanowa Fira'awna haala mooɗon, mi wi'a ɗum: «Sakiraaɓe am, yimɓe suudu baaba am wonnooɓe leydi Kanaana ɓeen ngartii ɗo am ɗoo. 32Worɓe ɓeen wo durooɓe daabaaji, margol woni gollal muɓɓen. Ɓe ngaddii be'i maɓɓe e baali maɓɓe e na'i maɓɓe e ko ɓe njogii fuu.» 33Si Fira'awna noddii on, ƴamii on ɗume woni golleeji mon fu, 34mbi'on: «Minen maccuɓe maa, wo min ekintinaaɓe durngol gilla cukaaku amin faa warde joonin, minen e baabiraaɓe amin fuu.» Noon keɓirton jooɗaade ley leydi Goosan, sabo durooɓe dammuuli fuu wo tuunɓe yeeso Misirankooɓe.

Currently Selected:

Fuɗɗoode 46: FBF

Highlight

Copy

Compare