Wurtagol 3
3
No Laamɗo noddiri Muusaa
1Muusaa na durannoo dammuuli esum Yetiro almaami Madiyan (noddirteeɗo Rewel oon). Nyannde gomma o yaari dammuuli ɗiin faa yeeso ladde yoornde faro gorgal. O yottii waamnde Sinayi#3:1 Sinayi wo Horeb ley ayaare ndee. Inɗe ɗiɗi ɗeen fuu wo waamnde wootere. inndirteende waamnde Laamɗo ndeen. 2Maleyka Joomiraaɗo ɓangani mo ley lewngol yiite hakkunde wuumoore. O haynii, o yi'i inan wuumoore ina huɓɓa ammaa yiite ngeen nyaamataa nde. 3Muusaa wi'itii:
— Mi ɓattitoto mi ndaara huunde haayniinde ndee, ko waɗi yiite ngee nyaamataa wuumoore ndee.
4Nde Laamɗo Joomiraaɗo yi'unoo o ooncake faa o ndaara fu, noddi mo ley wuumoore ndeen, wi'i:
— Muusaa! Muusaa!
O jaabii, o wi'i:
— Inani kam.
5Ndeen Laamɗo wi'i:
— Taa ɓattita ɗoo. Ɓorta paɗe maaɗa sabo nokkuure ɗo ndariɗaa ɗoon wo seniinde.
6O wi'i katin:
— Miin woni Laamɗo baaba maaɗa, Laamɗo Ibrahiima e Isiyaaka e Yaakuuba.
Ndeen Muusaa suddi yeeso muuɗum sabo hulii ndaarude Laamɗo.
7Joomiraaɗo wi'i:
— Goonga, mi yi'ii mettorgal yimɓe am ley Misira. Mi nanii bullaali maɓɓe saabe torrooɓe ɓe. Miɗo anndi torraaji maɓɓe. 8Saabe ɗuum de njippiimi faa mi danna yimɓe am e baawɗe Misirankooɓe, mi itta ɓe leydi Misira, mi yaara ɓe leydi lobbiri njaajundi, leydi ndi kosam e njuumndi ilata e muuɗum, nokkuure ɗo Kanaaninkooɓe e Hittiyankooɓe e Amorinkooɓe e Perisinkooɓe e Hewinkooɓe e Yebusinkooɓe njooɗii. 9Inan bullaali Israa'iilankooɓe njottake kam. Katin du mi yi'ii ɓillaare nde Misirankooɓe ɓilli ɓe. 10Mi nelete to Fira'awna faa mburtinaa yimɓe am Israa'iilankooɓe ɓeen leydi Misira.
11Ammaa Muusaa wi'i Laamɗo:
— Miin wo mi moy faa mi yaha to Fira'awna, mi wurtina Israa'iilankooɓe leydi Misira?
12Laamɗo wi'i o:
— Mi wondan e maaɗa. Inan maande holloore wo miin neli ma. Nde mburtinɗaa yimɓe ɓeen Misira fu, on fuu on ngaran teddinon kam dow waamnde ndee.
13Ndeen Muusaa wi'i Laamɗo:
— Ndelle si mi yehii to yimɓe Israa'iila, mi wi'ii ɓe: «Laamɗo maamiraaɓe mooɗon neli kam to mooɗon.» Si ɓe ƴamii kam noy woni innde maa, ɗume njaabotoomi ɓe?
14Laamɗo wi'i Muusaa:
— Miin Woni Mo Ngonumi.
O wi'i katin:
— Inan ko mbi'ataa Israa'iilankooɓe: Inndirteeɗo Miin-Woni oon neli kam to mooɗon.
15Laamɗo wi'i Muusaa katin:
— Inan ko mbi'ataa Israa'iilankooɓe: Wo Joomiraaɗo, Laamɗo#3:15 Joomiraaɗo e ibraninkoore na hasii ƴuuri e «Miin woni». maamiraaɓe mooɗon, Ibrahiima e Isiyaaka e Yaakuuba neli kam to mooɗon. Ndee woni innde am faa abada. Wo e mayre yimɓe jamaanuuji fuu mbaawiri noddirde kam. 16Joonin njahaa kawrondinowaa mawɓe Israa'iilankooɓe mbi'aa ɗum'en: Wo Joomiraaɗo, Laamɗo maamiraaɓe mooɗon, mo Ibrahiima e Isiyaaka e Yaakuuba oon ɓangani kam. O wi'i kam o yi'ii torraaji ɗi torreteɗon ley leydi Misira. 17Ɗum saabii mbi'umi mi wurtinan on e mettorgal mooɗon ley leydi Misira, mi yaara on leydi Kanaaninkooɓe e Hittiyankooɓe e Amorinkooɓe e Perisinkooɓe e Hewinkooɓe e Yebusinkooɓe. Ndiin woni leydi ndi kosam e njuumndi ilata e muuɗum. 18Israa'iilankooɓe kettindante. Ndeen njaadaa e mawɓe Israa'iilankooɓe to kaananke Misira, mbi'on ɗum: Joomiraaɗo, Laamɗo Ibraninkooɓe ɓanganii min. Miɗen ŋaare, kokkaa min laawol min njaha ley ladde yoornde haddi balɗe tati faa min ngaɗana Joomiraaɗo, Laamɗo amin kirsamaaji.
19Ammaa miɗo anndi kaananke Misira jaɓataa njahon sanaa wo doolɗa. 20Ndelle mi foortan junngo am mi fiira Misira e maandeeji kaayniiɗi ɗi ngaɗanmi ley muuɗum fuu. Caggal ɗuum o yoppan on ndillon. 21Mi waɗan keɓon moƴƴere yeeso yimɓe Misira faa nde mburtoytoɗon leydi maɓɓe ndiin fu, taa mburtoɗon juuɗe ɓole. 22Israa'iilanke debbo fuu yaha to Misiranke debbo koddo muuɗum, e to debbo janano beeruɗo e suudu muuɗum de ŋaaroo kujje gaɗiraaɗe kaŋŋe e cardi e kaddule. Ɓornon ɗum fuu sukaaɓe mooɗon worɓe e rewɓe. Noon ɓolirton Misirankooɓe.
Currently Selected:
Wurtagol 3: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
